އެފްއޭއެމް އެމްޕީއެލް ދެ ވަނަ ޑިވިޝަން ފުޓްބޯޅަ މުބާރާތުގައި ނިއު ރޭޑިއަންޓް ސްޕޯޓްސް ކްލަބުން ކުޅެން އޮތް ފުރަތަމަ މެޗު، މިއަދު މާލެ ސަރަަހައްދަށް ކުރަމުން އަންނަ ވިއްސާރައިގެ ސަބަބުން ކެންސަލްކޮށްފި އެވެ.
ގަލޮޅު ދަނޑުގައި މިއަދު، 3:50 ގައި ނިއު އިން ކުޅެން އޮތީ ދަ ގްރާންޑޭ ސްޕޯޓްސް ކްލަބާ އެވެ. އެ މެޗު ފެށެން ކުޑަވަގުތުކޮޮޅަކަށް ވެފައި އޮއްވައި، އެފްއޭއެމުން އަންގާފައިވަނީ ދެ ޓީމުގެ އޮފިޝަލުންނާ މަޝްވަރާ ކުރުމަށް ފަހު، މެޗު ފަސް ކުރަން ނިންމާފައިވާ ކަމަށެވެ. އެއިރު ދެ ޓީމުގެ ކުޅުންތެރިން ވަނީ މެޗަށް ދަނޑަށް ވެސް ހާޒިރުވެފަ އެވެ.
އެފްއޭއެމުން ދެ ކްލަބަށް ވެސް އަންގާފައިވަނީ މެޗު ރީޝެޑިއުލް ކުރެވޭނެ ތާރީހެއް، ވަރަށް އަވަހަށް އަންގާނެ ކަމަށެވެ. ގަލޮޅު ދަނޑުގެ ލައިޓްތަކުގެ މައްސަަލަ ހައްލުނުވާތީ، ދެ ވަނަ ޑިވިޝަން ފުޓްބޯޅަ މުބާރާތް ހަމައެކަނި ކުޅެނީ ހަވީރު ވަގުތުގަ އެވެ.
ނިއުގެ ފުރަތަމަ މެޗު ކެންސަލްކުރަން ޖެހުމުން، ދެން އެ ޓީމުން ފުރަތަމަ މެޗަށް ނުކުންނަން އިތުރު އިންތިޒާރެއް ކުރަން ޖެހޭނެ އެވެ.
މިއީ ރާއްޖޭގެ އެންމެ ކާމިޔާބު އަދި އެންމެ ސަޕޯޓަރުން ގިނަ ކްލަބް، ދެ ވަނަ ޑިވިޝަނުގައި ވާދަކުރާ ދެ ވަނަ ސީޒަނެވެ. މި ފަހަރު ނިއު އޮތީ، ގްރޫޕް ބީގަ އެވެ. އެ ގްރޫޕްގައި ދެން އޮތީ، ބީޖީ ސްޕޯޓްސް ކްލަބް، ދަ ގްރާންޑޭ، ކްލަބް ޓީނޭޖް އަދި ޓެންޓް ސްޕޯޓްސް ކްލަބް އެވެ. މި ގްރޫޕުގެ ފުރަތަމަ މެޗުން ބީޖީ އަތުން ޓެންޓް ވަނީ 1-0 އިން މޮޅުވެފަ އެވެ.
ނިއު އިން މި ފަހަރުގެ ދެ ވަނަ ޑިވިޝަން ފުޓްބޯޅަ މުބާރާތުގައި ވާދަކުރާނީ އަހުމަދު ނިމާދު (ނިމާ)ގެ އިރުޝާދުގެ ދަށުންނެވެ.
ޖޭޖޭ ބަލިކޮށް ކުޑަހެންވޭރަށް ފަސޭހަ ފެށުމެއް
އެފްއޭއެމް ދެ ވަނަ ޑިވިޝަން ފުޓުބޯޅަ މުބާރާތުގައި، އިއްޔެ ހަވީރު ކުޅުނު މެޗުން، ޖޭޖޭ ސްޕޯޓްސް ކުލަބް 5-0 ގެ ނަތީޖާއަކުން ބަލިކޮށް ކުޑަހެންވޭރު ޔުނައިޓެޑުން ވަނީ ފެށުން ރަނގަޅުކޮށްފަ އެވެ.
ފުޓުބޯޅައިގައި ނަން މަޝްހޫރު ކުޅުންތެރިން ހިމެނޭ ކުޑަހެންވޭރު ޓީމަށް ބަލާއިރު, އެ ޓީމުގެ ސްކޮޑުގައި މީގެ ކުރިން ގައުމީ ޓީމަށް ކުޅުނު ހަސަން އަދުހަމް (ސަޑޭ) އަދި ޓީސީ ސްޕޯޓްސް ކުލަބަށް ކުޅުނު ތަޖުރިބާކާރު ކުޅުންތެރިޔާ މުހައްމަދު އައްޒާމް ހިމެނެ އެވެ. އަދި ފުޓްސަލްގައި ނަން މަޝްހޫރު ޖުމައިލް ޖަމީލް (ޖުމްބެ) ވެސް ހިމެނެ އެވެ.
ގަލޮޅު ދަނޑުގައި އިއްޔެ ހަވީރު ކުޅުނު މުޅި މެޗު ކަހަލަ ގޮތަކަށް ކޮންޓްރޯލް ނަގައިގެން ކުޅުނީ ކުޑަހެންވޭރެވެ. އެކަމަކު، މި މެޗުގެ ފުރަތަމަ ހާފުގައި ޖޭޖޭގެ ޑިފެންޑަރުން ވަނީ ކުޑަ ހެންވޭރުގެ ހަމަލާތައް ހުއްޓުވުމުގައި ތަފާތު ދައްކައިފަ އެވެ. މި މެޗުގެ ފުރަތަމަ ހާފު ނިންމާލީ ކުޑަހެންވޭރުން ލީޑުގައި އޮވެގެންނެވެ. މެޗުގެ 27 ވަނަ މިނެޓުގައި މި ގޯލު ކުޑަހެންވޭރަށް ކާމިޔާބު ކޮށްދިނީ ކެޕްޓަން ޝަހީމް އަބްދުލް ގާދިރު ނަގައިދިން ހުރަހަކުން މިޑްފީލްޑަރު، އަލީ ޝަމާލް އަބްދުالله (ޝަންމު) އެވެ.
މެޗުގެ ދެ ވަނަ ހާފުގައި ކުޑަހެންވޭރު ކުޅުންތެރިންގެ އެޓޭކުތައް ވަރުގަދަކުރިއިރު, އެ ޓީމުގެ ކަނާތް ފަރާތުން ޖުމްބެގެ ބޭނުން ހިފައި ގިނަ އެޓޭކުތަކެއް ކުރިއެވެ. ދެ ވަނަ ހާފު ފަށައިގެން ތިން ވަނަ މިނެޓުގައި ކުޑަހެންވޭރުން ވަނީ އެ ޓީމުގެ ދެ ވަނަ ގޯލު ކާމިޔާބު ކޮށްފަ އެވެ. ޖުމްބެ, ދެ ކުޅުންތެރިން ކައިރިން ނައްޓާލުމަށްފަހު, ނަގައިދިން ހުރަހަކުން މި ލަނޑު އެ ޓީމަށް ކާމިޔާބު ކޮށްދިނީ ކެޕްޓަން ޝަމާލް އެވެ.
އޭގެ ފަހުން މެޗުގެ 59 ވަނަ މިނެޓުގައި ޖުމްބެ އޭރިއާ ބޭރުން ފޮނުވާލި ބާރު ހަމަލާ އަމާޒުވީ ގޯލުގެ ހުރަސް ދަނޑިއަށެވެ.
މެޗުގައި ކުޑަހެންވޭރުން ކާމިޔާބުކުރި ތިންވަނަ ގޯލަކީ ޖޭޖޭގެ ޑިފެންޑަރުންނަށް ހެދުނު ގޯހެއްގެ ފައިދާ ނަގާ ޝަޑޭ ކާމިޔާބުކުރި ލަނޑެކެވެ.
މެޗުގެ 66 ވަނަ މިނެޓުގައި ޖުމްބެ ދެ ކުޅުންތެރިން ކައިރިން ނައްޓާލުމަށް ފަހު ނަގާދިން ހުރަހަކުން ޝަހީމް ވަނީ އެ ޓީމުގެ ހަތަރު ވަނަ ލަނޑު ކާމިޔާބުކޮށްފަ އެވެ. އަދި ކުޑަހެންވޭރުން ކާމިޔާބުކުރި ފަސް ވަނަ ގޯލު އެ ޓީމަށް ކާމިޔާބުކޮށްދިނީ މި މެޗުގައި މޮޅު ކުޅުމެއް ދެއްކި ޖުމްބެ އެވެ.
