މެންޗެސްޓާ (ޑިސެމްބަރު 29) - މެންޗެސްޓާ ޔުނައިޓެޑްގެ ޓީމާ ގުޅޭ ކަންކަމުގައި ބަސްބުނުމުގެ ބާރު، ދާދި ފަހުން އެ ކްލަބްގެ 25 ޕަސެންޓް ހިއްސާ ގަތް އިނގިރޭސި މަހުޖަނު، ޖިމް ރެޓްކްލިފް އަށް ދީފި އެވެ.
އިނގިރޭސި ބިލިއަނަރު، ޖިމް ރެޓްކްލިފްގެ އިނިއޯސް ކުންފުންޏާ އެކު، އެއްބަސްވުމަކަށް އަތުވެފައިވާ ކަމަށް ޔުނައިޓެޑުން ވަނީ އިއުލާނުކޮށްފަ އެވެ. އިނިއޯސް އަށް ޔުނައިޓެޑްގެ 25 ޕަސެންޓް ހިއްސާ ވިއްކާލީ ގާތްގަނޑަކަށް ދެ ބިލިއަން ޑޮލަރަށް ކަމަށް ރިޕޯޓްތައް ބުނެ އެވެ.
އިނިއޯސްއާ އެކު، ޔުނައިޓެޑްގެ ޑީލްގެ ހުރިހާ ކަމެއް ފުރިހަމަވާން ހަ ހަފްތާއެއްހާ މުއްދަތެއް ނަގާނެ އެވެ. އެކަމަކު، މި ވަގުތު ތެރޭގައި ވެސް ޔުނައިޓެޑްގެ ބަައެއް ކަންކަމުގެ ކޮންޓްރޯލް ނަގަން އިނިއޯސް އިން ވަނީ ނިންމައިފަ އެވެ. އެ ގޮތުން، ޔުނައިޓެޑްގެ ޓީމާ ގުޅޭ ކަންކަމުގައި މިހާރު ވެސް ގޮތެއް ނިންމާނީ އިނިއޯސް އިންނެވެ.
މާނަ އަކީ ޖެނުއަރީ ޓްރާންސްފާ މާކެޓްގައި ޔުނައިޓެޑުން ޑީލެއް ހިންގާނަމަ އިނިއޯސްގެ ހުއްދަ ހޯދަން ޖެހޭނެ އެވެ. އަދި ޔުނައިޓެޑްގެ ކޯޗު އެރިކް ޓެން ހާގްގެ މުސްތަގުބަލާ މެދު ގޮތެއް ނިންމުމުގެ ބާރު ވެސް އޮތީ އިނިއޯސް އަތުގަ އެވެ.
އިނިއޯސް އިން ޔުނައިޓެޑްގެ ހިއްސާ ގަތްފަހުން، އެ ކްލަބުން ކުޅުނު ފުރަތަމަ މެޗުން ވަނީ އެސްޓަން ވިލާ އަތުން ފަަހަތުން އަރައި 3-2 އިން މޮޅުވެފަ އެވެ. އެ މެޗު ބަލަން އިނިއޯސްގެ ބައެއް ވެރިން ޔުނައިޓެޑްގެ ސްޓޭޑިއަމް، އޯލްޑް ޓްރެފޯޑަށް ވަނީ ގޮސްފަ އެވެ.
ރެޓްކްލިފްގެ އިނިއޯސް އިން މީގެ ކުރިން އިނގިރޭސި ޕްރިމިއާ ލީގުގެ ޗެލްސީ ގަންނަން ވެސް ވަނީ މަސައްކަތް ކޮށްފަ އެވެ. އެކަމަކު، އެކަން ކާމިޔާބެއްނުވި އެވެ.
ރެޓްކްލިފް: އޭނާ އަކީ ޔުނައިޓެޑްގެ ވަރަށް ބޮޑު ސަޕޯޓަރެއް ކަމަށް ވަނީ ބުނެފައި.
އިނިއޯސް އިން މިހާރު ހިންގަމުން އަންނަ ދެ ކްލަބަކީ، ފްރެންޗް ލީގުގެ ނީސް އާއި ސްވިޒަލެންޑްގެ ލުސޭން ސްޕޯޓް އެވެ. އަދި އިނިއޯސް އިން އަންނަނީ، ގްރެނަޑިއާސް ސައިކްލިން ޓީމަށް ވެސް ފަންޑް ކުރަމުންނެވެ.
ރިޕޯޓްތައް ބުނާގޮތުން ރެޓްކްލިފް ވަނީ ޖެނުއަރީ ޓްރާންސްފާގައި ޔުނައިޓެޑުން ހަރަދުކުރަން ބަޖެޓެއް ދޭން ނިންމައިފަ އެވެ. އަދި ޔުނައިޓެޑްގެ ޑީލްގެ ކަންކަން ނިންމާލުމަށް ފަހު، އެ ކްލަބްގެ ފުޓްބޯޅަ ހިންގުމުގެ އޮނިގަނޑަށް ޒަމާނީ ބަދަލުތަކެއް ގެންނަން ވަނީ މަޝްވަރާކޮށްފަ އެވެ.
ޔުނައިޓެޑް މިހާރު ހިންގަމުން އަންނަ އެމެރިކާގެ ގްލޭޒާ އާއިލާ އިން 2005 ވަނަ އަހަރު އެ ކްލަބް ގަތީ 1.4 ބިލިއަން ޑޮލަރަށެވެ. މިހާރު އެ ކްލަބްގެ އަގު ފަސް ބިލިއަން ޑޮލަރަށް ވުރެ މަތީގައި އުޅޭނެ ކަމަށް ބެލެވެ އެވެ.
އެކަމަކު، ދާދި ފަހުން ގަތަރުގެ މަހުޖަނު ޝެއިހް ޖާސިމް، ޔުނައިޓެޑް ގަންނަން ފަސް ބިލިއަން ޑޮލަރަށް ވުރެ އިތުރަށް ހުށަހެޅުމުން ވެސް ގްލޭޒާ އާއިލާ އިން ވަނީ އެ ޑީލަށް ފުރަގަސްދީފަ އެވެ. ޝެއިހް ޖާސިމް ބޭނުންވީ ޔުނައިޓެޑްގެ 100 ޕަސެންޓް ކޮންޓްރޯލް ނަގާ ޑީލެކެވެ.
