އަންނަ މަހުގެ 31 ވަނަ ދުވަހު ބާއްވަން ނިންމާފައިވާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިހާބުގައި ވާދަކުރަން ފޯމު ހުށަހެޅި ދެ ކެންޑިޑޭޓުން އަތުގައި ވެސް ކްލަބް ވެލެންސިއާގެ ތާއީދު އޮތް ކަމަށް ސިޓީއެއް އޮތްކަން ހާމަވެއްޖެ އެވެ.
އެފްއޭއެމް އިންތިހާބުގައި ވާދަކުރަން ފޯމު ހުށަހެޅުމަށް ސުންގަނޑި ހަމަވެފައިވަނީ މިއަދު، 14:00 ގަ އެވެ. އޭގެ ކުރިން ފޯމު ހުށަހަޅާފައިވަނީ އެންމެ ފުރަތަމަ، އެފްއޭއެމްގެ ކުރީގެ ރައީސް، ރައްޔިތުންގެ މަޖިލީހުގެ މަހިބަދޫ ދާއިރާ މެމްބަރު، އަހުމަދު ތޯރިގު (ޓޮމް) އެވެ. އޭގެ ގަޑިއިރެއް ފަހުން، އީގަލްސްގެ ވައިސް ޗެއާމަން، އެފްއޭއެމްގެ ރައީސް ބައްސާމް އަދީލް ޖަލީލްގެ އެކްސްކޯގެ މެމްބަރު، މުފާވިޒު ހާޝިމް (މުފާ) ވަނީ ކެންޑިޑެސީ ފޯމު ހުށަހަޅައިފަ އެވެ.
އެފްއޭއެމް އިންތިހާބުގައި ވާދަކުރަން، ފޯމު ހުށަހަޅާއިރު ފުރިހަމަކުރަން ޖެހޭ ޝަރުތުތަކެއް އޮވެ އެވެ. އެ ގޮތުން، ކޮންމެ ކެންޑިޑޭޓަކު ވެސް، ފުރަތަމަ ޑިވިޝަނުން މަދުވެގެން ތިން ކްލަބްގެ އެންޑޯޒްމެންޓް (ތާއީދު އޮތްކަމުގެ ލިޔުމެއް) ހޯދަން ޖެހެ އެވެ.
ވެލެންސިއާގެ ތާއީދު އޮތްކަމުގެ ލިޔުން، ޓޮމް އާއި މުފާ އަތުގައި ވެސް އޮތްކަމަށް ދެ ޓީމުން ވެސް ވަނީ ބުނެފަ އެވެ.
ދާދިފަހުން އިންތިހާބުވި ވެލެންސިއާގެ އާ ޗެއާމަން، ކުރީގެ ކުޅިވަރު ނޫސްވެރިޔާ، އަބްދުﷲ އަޒްމީން، ވަނީ މިއަދު، ޓޮމްގެ ކެންޑިޑެސީ ފޯމު ހުށަހަޅަން އައިއިރު، އޭނާއާ އެކު، އެފްއޭއެމް ހައުސް އަށް ވަޑައިގެންފަ އެވެ.
ވެލެންސިއާގެ ތާއީދު އޮތް ދެ ސިޓީއެއްގެ ވާހަކައާ ގުޅޭގޮތުން، "އަދަދު" އިން ސުވާލުކުރުމުން އަޒްމީން ވިދާޅުވީ، ވެލެންސިއާ ބޯޑު މެމްބަރުންގެ މެދުގައި ނެގުނު ރިޒޮލިއުޝަނެއްގައި މެޖޯރިޓީން ތާއީދު ކުރަން ނިންމާފައިވަނީ ޓޮމް އަށް ކަމަށެވެ.
"ވެލެންސިއާ ބޯޑުން ނިންމާފައި އޮތީ، ޓޮމް އަށް ތާއީދުކުރަން. އެއީ، ވެލެންސިއާގެ ނިންމުމަކީ،" ސައްހަވާނެ ލިޔުމަކީ ކޮބައިތޯ ސާފުކޮށްދިނުމުގެ ގޮތުން އަޒްމީން ވިދާޅުވި އެވެ.
ވެލެންސިއާ އިން ދީފައިވާ މި ދެ ސިޓީއާ މެދު ގޮތެއް ނިންމާނީ އިލެކްޓޯރިއަލް ކޮމިޓީންނެވެ.
ޓޮމްގެ މިއަދު ކެންޑިޑެސީ ހުށަހެޅިިއިރު، އޭނާގެ ޓީމުގައި ހިމެނެނީ، ރައީސަކަށް ޓޮމްގެ އިތުރުން، ނައިބު ރައީސަކަށް ކުރީގެ އެއް ވަަނަ ގޯލްކީޕަރު، އިމްރާން މުހައްމަދު (ކީޕަރު)، މާޒިޔާގެ ސީއީއޯ އަދި ބައްސާމްގެ ދެ ވަނަ ދައުރުގެ އެކްސްކޯގައި ނައިބަކަށް ހުންނެވި، ހުސައިން ޝާފިއު (ކޮއްކީ) އެވެ. ޝާފިއު އަކީ ބައްސާމްގެ އެކްސްކޯ އިން އިސްތިއުފާ ދިން ފަސް މެމްބަރުންގެ ތެރެއިން އެންމެ ފުރަތަމަ މަގާމުން ދުރުވި ފަރާތެވެ.
ޓޮމްގެ ޓީމުގައި އެކްސްކޯ މެމްބަރުންގެ ގޮތުގައި، އެފްއޭއެމް އިންޓަރިމް ރައީސް އަހުމަދު ޝާހިރު، އެފްއޭއެމްގެ ކުރީގެ ޖެރެނަލް ސެކްރެޓަރީ، އަބްދުލް ހަމީދު އަބްދުލް ގަފޫރު (އައްޑޯ)، އަންހެން މެމްބަރެއްގެ ގޮތުގައި މަހިބަދޫ ސްޕޯޓްސް ކްލަބްގެ އުލާ އިބްރާހިމް، މެމްބަރެއްގެ ގޮތުގައި ޓީސީ ސްޕޯޓްސް ކްލަބްގެ މުހައްމަދު މިފްތާހު އަދި މެމްބަރުންގެ ގޮތުގައި އަލީ ރިޒްވާން އާއި އަބްދުﷲ ނާސިހު އެވެ.
އެފްއޭއެމްގެ ރައީސަކަށް މި ފަހަރު، އެ އެސޯސިއޭޝަންގެ މިހާރުގެ ރައީސް، ބައްސާމް، ކުރިމަތިނުލާނެކަން އިއުލާނުކުރައްވާފައިވާއިރު، އޭނާގެ ތާއިދާ އެކު، އިންތިހާބަށް ނުކުތީ މުފާ ކަމަށް ވަނީ އެނގިފަ އެވެ. އެ ގޮތުން، ބައްސާމްއާ އެކު، އެފްއޭއެމް ލީޑަޝިޕްގަޔާއި ފުޓްބޯޅައިގެ އެކި ކަންކަމުގައި މަސައްކަތްކުރި ގިނަ ފަރާތްތަކެއް މުފާގެ ޓީމުގައި ހިމެނެ އެވެ.
މިދިޔަ ދެ ދައުރުގައި ވެސް، އެފްއޭއެމްގެ އެކްސްކޯގައި މަސައްކަތްކުރި، މުފާ ހުށަހެޅި އެކްސްކޯ ގައި އެފްއޭއެމް އެންމެ ފަހުން އޮތް އެކްސްކޯގައި މަސައްކަތްކުރި އަހްމަދު ޝަކީބު (ޑޮކް) އާއި ކުރިން އެކްސްކޯއިން އިސްތިއުފާދިން، ކްލަބް ގްރީން ސްޓްރީޓްސްގެ ރައީސް މުއާވިޔަތު ހަލީލު (މުއާބެ) ހިމެނެ އެވެ. މުއާބެ، ހިމަނާފައިވަނީ މުފާގެ ޓީމުގެ ނައިބު ރައީސްގެ ގޮތުގަ އެވެ. ދެން ނައިބު ރައީސަކަށް ހިމެނީ، ބުރު ސްޕޯޓްސްގެ މުހައްމަދު އަހްސަން އެވެ.
މުފާގެ ކެންޑީޑެސީ ފޯމުގައި ދެން، އެކްސްކޯ މެމްބަރުންގެ ގޮތުގައި ހިމަނާފައިވަނީ ބުރުގެ މެނޭޖަރު އަރުޝަދު އަޝްރަފު، ކުޑަހެންވޭރު ޓީމުން ކުރީގެ ގައުމީ ޓީމުގެ ފޯވާޑް ހަސަން އަދުހަމް (ސަޑޭ) އާއި ޔުނައިޓެޑް ވިކްޓަރީގެ ރައީސް، އިސްމާއީލް ޝަފީއު (އިއްސެ) އާއި ބުރުގެ މުހައްމަދު ހަސަން އެވެ. ދެން އަންހެން މެމްބަރުގެ މަގާމަށް ހިމަނާފައިވަނީ، ގައުމީ އަންހެން ފުޓްބޯޅަ ޓީމުގެ ކުރީގެ ކުޅުންތެރިޔާ އަދި މިހާރު ކޯޗިންގައި ފާހަގަކުރެވޭ، މަރްޔަމް މިރްފަތު އެވެ.
