ލަންޑަން (ޑިސެމްބަރު 25) - މެންޗެސްޓާ ޔުނައިޓެޑްގެ 25 ޕަސެންޓް ހިއްސާ އިނގިރޭސިވިލާތުގެ މަހުޖަނެއް ކަމަށްވާ ޖިމް ރެޓްކްލިފަށް 1.3 ބިލިއަން ޕައުންޑަށް ވިއްކާލުމަށް އެ ކްލަބުން އެއްބަސްވެއްޖެ އެވެ.
ޔުނައިޓެޑުން އިއްޔެ ނެރުނު ބަޔާނެއްގައި އިތުރަށް ބުނެފައިވަނީ ކުރިއަށް އޮތްތަނުގައި އެ ކްލަބުގެ "ފުޓްބޯލް އޮޕަރޭޝަންސް"ގެ ހުރިހާ މަސައްކަތަކެއް ކުރިއަށްދާނީ ރެޓްކްލިފްގެ ކުންފުނި ކަމަށްވާ އިނިއޮސްގެ ބެލުމުގެ ދަށުންނެވެ.
ޔުނައިޓެޑްގެ މައިނޯރިޓީ ހިއްސާ ހޯދަން ރެޓްކްލިފް ކުރި މަސައްކަތް މި ކާމިޔާބުވީ 13 މަސް ފަހުންނެވެ. ޔުނައިޓެޑް ގަތުމަށް ގަތަރުގެ މަހުޖަން ޝޭހު ޖާސިމް ބިން ހަމަދު އަލް ތާނީ މަސައްކަތްކުރި ނަމަވެސް، އޭނާ ވަނީ ފަހުން އެ މަސައްކަތް ހުއްޓާލައިފަ އެވެ.
ކެމިކަލް އުފެއްދުމުގައި މަޝްހޫރު އިނިއޮސް ކުންފުނީގެ ޗެއާމަން ކަމަށްވާ ރެޓްކްލިފް، 71، ޔުނައިޓެޑްގެ ފެސިލިޓީސްތައް ރަނގަޅުކުރުމަށް އިންވެސްޓްކުރާނެ އެވެ.
"އަހަރަމެންގެ ބޭނުންވަނީ ދުނިޔޭގެ އެންމެ މަތީ ފެންވަރުގެ ފުޓްބޯޅަ ކްލަބެއްގެ އޮޕަރޭޝަންސް މި ކްލަބުގައި އުފެއްދުން," ރެޓްކްލިފް ބުންޏެވެ.
"އަހަރަމެންގެ އަމާޒަކީ އިނގިރޭސިވިލާތާއި ޔޫރަޕް އަދި ދުނިޔޭގެ އެންމެ މަތީ ފަންތީގެ ކްލަބަކަށް ޔުނައިޓަޑް އަލުން ހެދުން."
ރެޓްކްލިފް މައިނޯރިޓީ ހިއްސާ ހޯދިޔަސް، ޔުނައިޓެޑްގެ މައި ހިއްސާދާރުންގެ ގޮތުގައި ގްލޭޒާ އާއިލާ ދެމިއޮތުމަކީ ޔުނައިޓަޑްގެ ސަޕޯޓަރުން ރުހޭ ކަމެއް ނޫނެވެ. ކްލަބުގެ ސަޕޯޓަރުންނާއި ގްލޭޒާ އާއިލާއާ ދެމެދު އޮތް ގުޅުން ވަނީ މި ފަހަކަށް އައިސް ގޯސްވެފަ އެވެ.
