އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓުގައި ވާދަކުރަން ބޭނުންވާ މީހުންނަށް އެކަމަށް އެދި ހުށަހަޅަން ދިން މުއްދަތު އެ ޕާޓީން މިއަދު އިތުރުކޮށްފި އެވެ.
މަޖިލިސް އިންތިހާބުގައި އެމްޑީޕީގެ ޓިކެޓުގައި ވާދަކުރަން ބޭނުންވާ ކެނޑިޑޭޓުންނަށް ފޯމު ހުށަހަޅަން ކުރިން ދިން ސުންގަޑިއަކީ އަންނަ ހޯމަ ދުވަހުގެ ހަވީރު 4:00 އާ ހަމައަށެވެ. މިއަދު ނެރުނު އިއުލާނުގައި މުއްދަތު ދައްމާލީ އަންނަ ހޮނިހިރު ދުވަހުގެ 4:00 އާ ހަމައަށެވެ.
މުއްދަތު އިތުރުކުރި ސަބަބާ ގުޅިގެން "އަދަދު"ން ސުވާލުކުރުމުން އެމްޑީޕީގެ ޗެއާޕާސަންގެ ނައިބު އިދާރީ އިބްރާހީމް ވަހީދު ވިދާޅުވީ އިތުރު ދުވަސްތަކެއް ދިނީ ކުށުގެ ރެކޯޑު ސާފުކުރަން އިތުރު މުއްދަތު ބޭނުންވެގެން އެކަމަށް އެދޭތީ ކަމަށެވެ.
"ހުރިހާ ރަށެއްގެ ކޯޓަކުން ކުށުގެ ރެކޯޑު ޗެކުކުރުން ޑީޖޭއޭއަށް ފަސް ދުވަސް ބޭނުންވާތީ ބައެއް ބޭފުޅުން އެގޮތަށް އިތުރުކޮށްދޭން އެދޭތީ މުއްދަތު އިތުރުކުރަން ނިންމީ" އޭނާ ވިދާޅުވި އެވެ.
އެމްޑީޕީގެ އެތެރޭގެ އިންތިހާބެއްގައި ވާދަކުރަން ކުށުގެ ރެކޯޑު ހުށަހަޅަން ޖެހޭ ގޮތަށް ހެދި މިއީ ފުރަތަމަ ފަަހަރެވެ.
މިކަން ކުރި ސަބަބާ ގުޅޭގޮތުން އެމްޑީޕީން ބުނީ މި ބަދަލު ގެނައީ އިލެކްޝަންސް ކޮމިޝަނުން ކުށުުގެ ރެކޯޑް ސާފުކުރާ ގޮތް ބަދަލުކޮށްފައި ވާތީ އާއި ޕްރައިމަރީން ހޮވޭ މީހުންގެ ކުށުގެ ރެކޯޑު ސާފުކުރަން އިތުރު ދުވަސްތަކެއް ނަގާތީ ކަމަށެވެ.
އިލެކްޝަންސް ކޮމިޝަނުން ކުށުގެ ރެކޯޑު ބަލާ ގޮތަށް ގެނައި ބަދަލަކީ މާލޭގައި ހުރި ސުޕީރިއާ ކޯޓްތަކާއި އެ މީހަކު ނިސްބަތްވާ ރަށުގެ ކޯޓްތަކުގެ ރެކޯޑުތަކުގެ އިތުރުން އެހެން ހުރިހާ ރަށެއްގެ ކޯޓުތަކުން ކުށުގެ ރެކޯޑުތައް ސާފުކުރަން ލާޒިމުކުރުމެވެ.
އެމްޑީޕީގެ މަޖިލިސް ޕްރައިމަރީ އިންތިހާބު ބާއްވާނެ ދުވަހެއް އަދި އިއުލާނެއް ނުކުރެ އެވެ.
