މެންޗެސްޓާ (ޑިސެމްބަރު 13) - ޔުއެފާ ޗެމްޕިއަންސް ލީގުގެ ގްރޫޕްގެ ފުލަށް ގޮސް ޔޫރަޕްގެ މުބާރާތްތަކުން ކެޓުމުން މާލީ ގޮތުން ބޮޑު ގެއްލުމެއް މެންޗެސްޓާ ޔުނައިޓެޑަށް ލިބޭނެކަމަށް ބެލެވިއްޖެ އެވެ.
މެދުކެނޑުމަކަށް ފަހު ޗެމްޕިއަންސް ލީގުގައި ކުޅުނު ޔުނައިޓެޑުން ގްރޫޕް ސްޓޭޖް ނިންމާލަން ޖެހުނީ ހަ މެޗުގެ ތެރެއިން ހަތަރު މެޗުން ބަލިވެ، އެންމެ ހަތަރު ޕޮއިންޓް ލިބިގެންނެވެ. އެ ޓީމުން 12 ގޯލު ޖެހިއިރު ބައިކޮޅަށް 15 ގޯލު ވަނީ ވަދެފަ އެވެ.
ޔޫރަޕްގެ މުބާރާތްތަކުން ކެޓުމުން އެ ކުލަބަށް ލިބޭ އާމްދަނީގެ ބޮޑުބައެއް އުނިވާނެ އެވެ. އެ ގޮތުން ޔޫރަޕްގެ މުބާރާތްތަކުގެ މެޗުތަކުން ލިބޭ އާމްދަނީ އާއި މެޗުތައް ދައްކައިގެން ލިބޭ އާމްދަނީގެ އިތުރުން ޔުއެފާއިން ކުލަބުތަކަށްދޭ ފައިސާ ވެސް މަދުވާނެ އެވެ.
ޗެމްޕިއަންސް ލީގުގެ ގަދަ 16 އަށްދާ ކޮންމެ ޓީމަކަށް 8.2 މިލިއަން ޕައުންޑު ލިބެ އެވެ. ޔުނައިޓެޑަށް މި ފައިސާ ނުލިބުމުގެ އިތުރުން މުބާރާތުގައި އިތުރަށް ކުރިއަށްގޮސް ކޮންމެ ނޮކްއައުޓް ބުރަކުން ލިބޭ ފައިސާ ވެސް ޗެމްޕިއަންސް ލީގުން ކަޓާފައިވާތީ ނުލިބޭނެ އެވެ. ޔުއެފާ ޗެމްޕިއަންސް ލީގުގެ ޗެމްޕިއަންކަން ހޯދާ ޓީމަކަށް އިނާމް ފައިސާގެ ގޮތުގައި 45 މިލިއަން ޕައުންޑް ލިބެ އެވެ.
ޔޫރަޕްގެ މެޗުތައް ކުޅެން ނުޖެހުމަކީ ޔުނައިޓެޑަށް ޓިކެޓު ވިއްކައިގެން ލިބޭ އާމްދަނީ އަށް ވެސް އަސަރުކުރާނެ ކަމެކެވެ. ޗެމްޕިއަންސް ލީގުގެ ދެ ވަނަ ބުރުގައި ވަރުގަދަ ޓީމަކާ ދެކޮޅަށް އެޓީމުން ކުޅެން ޖެހިއްޖެނަމަ ކޮންމެ މެޗަކަށް އާމްދަނީގެ ގޮތުގައި 12 މިލިއަނެއްހާ ޕައުންޑް ލިބެ އެވެ.
މެޗުތައް ބްރޯޑްކާސްޓްކޮށްގެން ލިބޭ ފައިސާވެސް ޔުއެފާ އިން ޓީމުތަކަށް ބާހާލަ އެވެ. އެ ގޮތުން މި އަހަރު 257 މިލިއަން ޕައުންޑް ބަހާލާއިރު، މީގެ ތެރެއިން ޔުނައިޓެޑަށް ލިބޭނީ މަދު އަދަދެކެެވެ. އިނގިރޭސި ކުލަބުތަކަކީ ޔޫރަޕްގެ އެހެން ކުލަބުތަކަށް ވުރެ މަޝްހޫރު ކުލަބުތަކަކަށް ވުމާ އެކު ބްރޯޑްކާސްޓް ފައިސާ ބެހުމުގައި އިނގިރޭސި ކުލަބުތަކަށް އިސްކަން ދެ އެވެ. އެ ގޮތުން އިނގިރޭސި ކުލަބުތަކަށް ލިބޭ ފައިސާގެ އަދަދުވެސް އިތުރެވެ.
ދެން އޮތީ ޔޫރަޕްގެ ކުލަބުތަކުގެ ރޭންކިންއަށް ބަލައި ޓީމްތަކަށްދެވޭ ބޯނަސް ފައިސާ އެވެ. ފާއިތުވެދިޔަ 10 އަހަރު ކުލަބުތަކުން ދެއްކި ކުޅުމަށް ބަލައި މިއަހަރު 515 މިލިއަން ޕައުންޑް ބެހުމަށް އޮތީ ނިންމާފަ އެވެ. ޓީމްތައް ރޭންކްކޮށް ފައިސާ ބަހާއިރު، އެެންމެ ދަށް ރޭންކް ޓީމަށް 1.28 މިލިއަން ޕައުންޑް ލިބެ އެވެ. އެންމެ މަތިން ރޭންކްކުރެވިފައިވާ ޓީމަށް 42.3 މިލިއަން ޕައުންޑް ލިބޭނެ އެވެ.
ޔޫރަޕްގެ އެންމެ ބޮޑެތި ކުލަބުތަކުގެ ތެރޭގައި ހިމެނޭ ޔުނައިޓެޑް ޔޫރަޕްގެ މުބާރާތްތަކުން ކެޓުމާއިއެކު ކޯޗު އެރިކް ޓެން ހާގަށް އަމާޒުވެފައިވާ ފާޑުކިޔުންވަނީ ގިނަވެފަ އެވެ.
