މެންޗެސްޓާ (ޑިސެމްބަރު 12) - ޔުއެފާ ޗެމްޕިއަންސް ލީގުގައި ބަޔާން މިޔުނިކާ ދެކޮޅަށް ކުޅެން އޮތް މުހިންމު މެޗުގެ ކުރިން މެންޗެސްޓާ ޔުނައިޓެޑްގެ މިޑްފިލްޑަރު ކަސެމީރޯ ފިޓުވެއްޖެ އެވެ.
އެކަށީގެންވާ ނަތިޖާތަކެއް ނުނެރެވި ޗެމްޕިއަންސް ލީގުން ކެޓުމުގެ ބިރު ބޮޑުވެފައިވާ ޔުނައިޓެޑު މި ވަގުތު އޮތީ އުނދަގޫ ހާލަތެއްގަ އެވެ. އެ ގޮތުން ކުޅުންތެރިންނާއި ކޯޗުންނާ ދެމެދު މައްސަލަ ޖެހިފައިވާ ކަމަށް މީޑިއާގައި އަޑުފެތުރިފައިވާއިރު، އެންމެ ފަހުން ޕްރިމިއާ ލީގުގައި ކުޅުނު މެޗުން ވެސް ވަނީ ބަލިވެފަ އެވެ.
މި ސީޒަންގެ ޗެމްޕިއަންސް ލީގުގައި ޔުނައިޓެޑުން ކުޅުނު ފަސް މެޗުގެ ތެރެއިން މޮޅުވީ އެންމެ މެޗަކުންނެވެ. އެއް މެޗު އެއްވަރުވިއިރު، ތިން މެޗުން ވަނީ ބަލިވެފަ އެވެ. ދެ ވަނަ ބުރުން އެ ޓީމަށް ފުރުސަތު ލިބެން އޮތް ހަމައެކަނި ގޮތަކީ ބަޔާން މިޔުނިކް އަތުން މޮޅުވުމުގެ އިތުރުން ގްރޫޕްގެ އަނެއް މެޗުގައި ގަލަސަތަރާއި އާއި ކޯޕެންހާގެން އެއްވަރުވުމެވެ.
މި ހާލަތުގައި އޮތް ޔުނައިޓެޑަށް ލިބޭނެ އެއް ހިތްހަަމަޖެހުމަކީ އަނިޔާގައި ހުރި މިޑްފިލްޑަރު ކަސެމީރޯ ފިޓުވުމެވެ. ކަސެމީރޯ އަކީ މިދިޔަ އަހަރާއި މި ސީޒަންގައިވެސް ޔުނައިޓެޑްގެ މުހިންމު ކުޅުންތެރިއެކެވެ.
ބްރެޒިލްގެ ގައުމީ ޓީމާ އެކު މިދިޔަ އޮކްޓޯބަރު މަހު ފަރިތަކުރަނިކޮށް އަނިޔާވި ކަސެމީރޯ، 31، އަށް މިދިޔަ ދޮޅުމަހެއްހާ ދުވަހު މެޗެއް ނުކުޅެވެ އެވެ. ފައިގެ ކުޑަ ހުޅަށް ލިބުނު އަނިޔާ އަށް ފަރުވާ ހޯދުމަށް ފަހު ކަސެމީރޯ މިހާރު އަންނަނީ ފަރިތަކުރުންތަކުގައި ބައިވެރިވަމުންނެވެ.
ޑިފެންސް ލައިނަށް ބަލާއިރު ސީޒަންގެ ކުރީކޮޅު އަނިޔާގެ މައްސަލަތައް ގިނަކޮށް ފެނުނު މެންޗެސްޓާ ޔުނައިޓެޑުގެ ކުޅުންތެރިން މަޑު މަޑުން އަންނަނީ ފިޓުވަމުންނެވެ. އެ ގޮތުން ސަޖިއޯ ރެގިލޯން އާއި ލޫކް ޝޯ މިހާރު ހުރީ ފިޓްކޮށެވެ. އާރޮން ވެން ބިސާކާގެ ބޭނުންވެސް މިހާރު ޓެން ހާގަށް ހިފޭނެ އެވެ. އޭގެ އިތުރުން، އާޖެންޓީނާގެ ޑިފެންޑަރު ލިސަންދްރޯ މާޓިނޭޒްވެސް އަންނަނީ ފަރިތަކުރުންތަކުގައި ބައިވެރިވަމުންނެވެ.
