ލަންޑަން (ޑިސެމްބަރު 11) - ބޯންމައުތު އަތުން އަމިއްލަ ދަނޑުގައި 3-0 އިން ބަލިވި މެޗުގައި މެންޗެސްޓާ ޔުނައިޓެޑްގެ ހުރިހާ ކުޅުންތެރިންގެ ފަރާތުން ފެނިގެންދިޔައީ ބަލައިގަންނަން އުނދަގޫ ކުޅުމެއް ކަމަށާއި އެކަމަށް ސަޕޯޓަރުންގެ ކިބައިން މާފަށް އެދޭ ކަމަށް ޔުނައިޓެޑްގެ ކެޕްޓަން ފެނާންޑޭސް ބުނެފި އެވެ.
މިއީ، ބޯންމައުތުގެ ތާރީހުގައި އެ ޓީމުން ޔުނައިޓެޑްގެ ދަނޑު އޯލްޑް ޓްރެފޯޑްގައި މޮޅުވި ފުރަތަމަ ފަހަރެވެ. އަނެއްކޮޅުން މިއީ، ޔުނައިޓެޑުން މި ސީޒަނުގައި ކުޅުނު 23 މެޗުގެ ތެރެއިން ބަލިވި 11 ވަނަ މެޗެވެ. މިއީ ޔުނައިޓެޑްގެ މުއްސަނދި ތާރީހުގައި ވެސް އާދަޔާހިލާފަށް ދަށްކޮށް ފެށުނު ސީޒަނެކެވެ. އެހެންވެ، ސަޕޯޓަރުންގެ ނުރުހުން ކްލަބްގެ ކަންކަމަށް ވަނީ އަމާޒުވެފަ އެވެ.
"އަހަރެން ޔުނައިޓެޑްގެ (ސަޕޯޓަރުން) ކިބައިން މާފަށް އެދެން. ފެނުނީ ދަށް ކުޅުމެއް. މި ބުނަނީ އަހަރެން ހިމެނޭ ގޮތަށް، އެހެން ކުޅުންތެރިންގެ ވާހަކައެއް ނޫން، މުޅި ޓީމުގެ ވާހަކަ،" މި ސީޒަނުގައި ޔުނައިޓެޑްގެ ކެޕްޓަން ބޭންޑް އަޅައިގެން ކުޅެމުން އަންނަ ފެނާންޑޭސް ބުންޏެވެ.
"މިއީ އަހަރެެމެން ޗެލްސީއާ ދެކޮޅަށް ދެއްކި ވަރުގެ ކުޅުމާ އެއްވެސް ވަރަކަށް އެއް ހަމައެއްގައި ބެލޭނެ ކުޅުމެއް ނޫން. މި ކަންކަން ރަނގަޅުކުރަން ޖެހޭ،"
ޔުނައިޓެޑުން ވަނީ ބޯންމައުތު އަތުން ބަލިވި މެޗުގެ ކުރިން އަމިއްލަ ދަނޑުގައި ޗެލްސީ އަތުން 2-1 އިން މޮޅުވެފަ އެވެ.
"އަހަރެމެން އަބަދުވެސް މެޗަކުން މޮޅުވެފައި. ދެން ކުޅޭ މެޗުގައި މި ފެންނަނީ ދަށްކޮށްދާތަން. މިއީ ވިސްނުންތެރިކަމާ އެކު ކޮންމެ މެޗަކަށް ފޯކަސް ނުކުރާތީ ވާ ކަމެއްތޯ، އަހަރެމެން އެންމެން ޓީމެއްގެ ގޮތުގައި ބަަލަންޖެހޭ،" ފެނާންޑޭސް ބުންޏެވެ.
ބޯންމައުތާ ދެކޮޅަށް ކުޅުނު މެޗުގައި ފެނާންޑޭސް އަށް ދެއްކި ރީނދޫ ކާޑަކީ މި ސީޒަނުގައި އޭނާ އަށް ދެއްކި ފަސް ވަނަ ރީނދޫ ކާޑެވެ. މި ކާނޑާ އެކު ފެނާންޑޭސް ވަނީ ލީގުގައި ދެން ކުޅޭ މެޗަށް ސަސްޕެންޑްވެފަ އެވެ. ޔުނައިޓެޑުން ލީގުގައި ދެން ކުޅޭ މެޗަކީ އެއް ވަަނައިގައި އޮތް ލިވަޕޫލާ ދެކޮޅަށް އެ ޓީމުގެ ދަނޑުގައި ކުޅޭ މެޗެވެ.
ޔުނައިޓެޑުން މި ހަފްތާގައި ނަތީޖާ ނެރެން މަޖުބޫރު މެޗެއްގައި ޗެމްޕިއަންސް ލީގުގައި ބަޔާން މިއުނިކާ ދެކޮޅަށް އަމިއްލަ ދަނޑުގައި ކުޅޭނެ އެވެ. ޔުނައިޓެޑަށް ޗެމްޕިއަންސް ލީގުގެ ގްރޫޕް ސްޓޭޖު ފަހަނައަޅައި ދެވެން އޮތީ އެ ޓީމު ކުޅޭ މެޗުން ބަޔާން އަތުން މޮޅުވެ، ގްރޫޕްގެ އަނެއް މެޗުން ކޯޕެންހާގެން އާއި ގަލަސަތަރާއި އެއްވަރުވެގެންނެވެ.
