ކުރީ ސަރުކާރުގެ "ގެދޮރުވެރިޔާ" ސްކީމުގެ ދަށުން އެކުލަވާލާފައިވާ ޕޯޓަލްގެ އެކްސެސް އެންޓި ކޮރަޕްޝަން ކޮމިޝަނަށް ދީފި އެވެ.
ކުރީ ސަރުކާރުން ދޫކުރަން އިއުލާނުކޮށްފައިވާ 4000 ފްލެޓުގެ ދާއިމީ ލިސްޓު ނެރުނީ, މިދިޔަ ނޮވެމްބަރު ފަހެއްގަ އެވެ. އެ ލިސްޓާއެކު ގިނަ ޝަކުވާތަކެއް ފެންމަތިވުމުން, އޭސީސީން ވަނީ ޝަކުވާ ހުށަހަޅަން އެކަށީގެންވާ މުއްދަތެއް ދިނުމަށްފަހު ނޫނީ މައްސަލަ ކުރިއަށް ނުގެންދަން އަންގާފަ އެވެ.
އެހެން ނަމަވެސް ގެދޮރުވެރިޔާ ޕޯޓަލްގެ އެކްސެސް އެ ކޮމިޝަނަށް ނުލިބޭތީ, މައްސަލަ ތަހުގީގު ކުރުން އޮތީ މަޑުޖެހިފަ އެވެ. ހައުސިން މިނިސްޓްރީން ގެދޮރުވެރިޔާ ޕޯޓަލްގެ އެކްސެސް ހިއްސާކުރުމާއެކު މައްސަލައިގެ ތަހުގީގުގައި އިތުރަށް ބަލަންޖެހޭ ކަންކަން ބަލަމުންދާ ކަމަށް އޭސީސީން ބުނެ އެވެ.
ގެދޮރުވެިރޔާ ސްކީމުގެ މައްސަލާގައި އޭސީސީން މަޖިލީހުގެ ޕެޓިޝަން ކޮމިޓީއަށް ހާޒިރުކުރުމުން އެ ކޮމިޝަނުގެ ރައީސް އާދަމް ޝާމިލް ވިދާޅުވި ގޮތުގައި, ކޮމިޝަނުން މައްސަލައިގެ ތަހުގީގު ކުރަމުން ދަނީ ގެދޮރުވެރިޔާ ސިސްޓަމަށް އެކްސެސް ލިބިގެންނެއް ނޫނެވެ. އަދި މިހާތަނަށް ހޯދި މައުލޫމާތުތައް ހޯދާފައި ވަނީ މިނިސްޓްރީގެ ލޮގިންތައް ބޭނުންކޮށްގެން ކަމަށް އޭނާ ވިދާޅުވި އެވެ.
"އަޅުގަނޑުމެންނަށް މުޅި ސިސްޓަމަށް އެކްސެސް ލިބުމަކީ ވަރަށް މުހިންމު ކަމެއް އަޅުގަނޑުމެން މިކަން ބެލުމަށްޓަކައި. އެކަން އަޅުގަނޑުމެން ހީކުރި ވަރަށް ވުރެ ޓެކްނިކަލް،" ޝާމިލް ވިދާޅުވި އެވެ.
ފްލެޓު ލިސްޓުގެ ސައްހަކަމާމެދު އޭސީސީން ވެސް ސުވާލު އުފައްދާފައިވާއިރު، ކޮމިޓީގައި މެންބަރުން ސާފުކުރަން އެންމެ ބޮޑަށް ބޭނުންވީ އެ ކޮމިޝަނުން ކުރަމުންދާ ތަހުގީގު ނިންމާނެ ދުވަހެއް ހޯދުމެވެ. އެ ސުވާލު ތަކުރާރުކޮށް ކުރުމުން ވެސް ކޮމިޝަންގެ ރައީސް އާދަމް ޝާމިލް ޖަވާބެއް ނުދެއްވި އެވެ.
މައްސަލަ ބަލާތާ މަސް ދުވަސް ވާން ކައިރިވެފައިވީ ނަމަވެސް, ތަހުގީގު ނިންމޭނެ ތާރީހެއް ވިދާޅުވެވެން ނެތް މައިގަނޑު ސަބަބަކީ އޭނާ ފާހަގަކުރެއްވި ގޮތުގައި ޕޯޓަލްއަށް އެކްސެސް ނުލިބުން ފަދަ ދަތިތަކާ ކުރިމަތިލާން ޖެހުމެވެ.
