މަގުބޫލު ގޭމު ގްރޭންޑް ތެފްޓް އޮޓޯ (ޖީޓީއޭ) ސިކްސްގެ ޓްރެއިލާ ލީކުވުމުގެ ސަބަބުން، ތަވާލުކޮށްފައިވާ ވަގުތަށް ވުރެ 15 ގަޑިއިރު ކުރިން ޓްރެއިލާ ނެރެފި އެވެ.
ދުނިޔޭގެ އެންމެ މަގުބޫލު އަދި އެންމެ ގިނަ ބަޔަކު އިންތިޒާރު ކުރާ ގޭމް ސީރީޒް، ޖީޓީއޭ ސިކްސްގެ ޓްރެއިލާ ނެރުމަށް ހަމަޖެހިފައިވަނިކޮށް، ޓްރެއިލާގެ ދަށް ކޮށްލިޓީ ވީޑިއޯތަކެއް ވަނީ އިންޓަނެޓުގައި ދައުރުވާން ފަށައިފަ އެވެ. އެ ހިސާބުން އެ ގޭމު ނެރޭ ކުންފުނި "ރޮކްސްޓާ ގޭމްސް" އިން ވަނީ އެކަމުގެ ސަބަބުން އަސްލު ޓްރެއިލާ ނެރެން ނިންމާފައިވާ ކަމަށާ، ހުރިހާ ފަރާތްތަކުން ވެސް އެ ޓްރެއިލާ ބެލުމަށް އެދިފަ އެވެ.
ރޮކްސްޓާ އިން ނެރެފައިވާ 90 ސިކުންތުގެ ޓްރެއިލާ އިން ދައްކަނީ ގޭމުގައި ހިމެނޭ ބައެއް މީހުންނާ ތަންތަނެވެ. އެގޮތުން, ޖީޓީއޭގެ "ވައިސް ސިޓީ"ގައި އެތުރިފައިވާ މި ގޭމުގެ، ބަތަލާކީ ލޫސިއާ ނަމަކަށް ކިޔާ އަންހެނެކެވެ.
މި ސީރީޒްގެ ކުރިން ނެރުނު ގޭމު، "ޖީޓީއޭ ފައިވް" ނެރެފައިވަނީ 2013 ގަ އެވެ. އެ ގޭމަށް ވަނީ ދެވަނަޔަށް އެންމެ ގިނައިން ވިކިފައިވާ ގޭމުގެ މަގާމު ލިބިފަ އެވެ.
އަދި އައު ގޭމަކަށް ގިނަ ބަޔަކު އިންތިޒާރު ކުރަމުން ދަނިކޮށް، ޖީޓީއޭ ސިކްސްގެ މަސައްކަތްކުރަމުންދާ ކަން ރޮކްސްޓާ އިން ހާމަކުރީ 2022 ގަ އެވެ. އެ އަހަރު ވެސް ވަނީ އެ ގޭމުގެ 90 އަށް ވުރެ ގިނަ ވީޑިއޯ ލީކުވެފަ އެވެ.
މި ގޭމު ނެރުމަށް ހަމަޖެހިފައިވަނީ 2025 ގަ އެވެ. އަދި ޕްލޭސްޓޭޝަން ފަހެއް، އެކްސްބޮކްސް ސީރީޒް އެކްސް އަދި އެސްގައި މި ގޭމު ކުޅެވޭނެކަމަށް ރޮކްސްޓާ އިން ވަނީ ބުނެފަ އެވެ.
