އިރުގެ ހަކަތައިން ކަރަންޓު އުފައްދައި ބޭނުންކުރުމަށް ގޭބިސީތަކަށް ފުރުސަތު ފަހިކޮށްދިނުމުގެ ގޮތުން "މަގޭ ސޯލާ" ނަމުގައި ޕްރޮގްރާމެއް އެނާޖީ މިނިސްޓްރީން އިއްޔެ އިފްތިތާހުކޮށްފި އެވެ.
މަގޭ ސޯލާ ޕްރޮގްރާމަކީ ކަރަންޓު ބިލަށް ކުރާ ހޭދަ ކުޑަކުރުމަށާއި ތެލުން އުފައްދާ ހަކަތަ ބޭނުންކުރާ މިންވަރު މަދުކުރުމަށް އަމާޒުކޮށްގެން ސަރުކާރުން ހިންގާ ޕްރޮގްރާމެއް ކަމަަށް އެނާޖީ މިނިސްޓްރީން ބުންޏެވެ. މި ޕްރޮގްރާމް ހިންގަން ރާވާފައި ވަނީ ސަރުކާރާއި ޔުޓިލިޓީ ކުންފުނިތަކާއި ބޭރުގެ އެހީދޭ ފަރާތްތަކާ ގުޅިގެންނެވެ.
މި ޕްރޮގްރާމް ފަރުމާކޮށްފައި ވަނީ ގޭބިސީތަކުގައި ހަރުކުރާ ސޯލާ ޕީވީ ނިޒާމުތަކަށް އިންސްޓޯލްމަންޓަށް ފައިސާ ދައްކާ ގޮތަށެވެ. ސޯލާ ޕީވީ ނިޒާމުތައް ހަރުކުރާނީ އެ ރަށެއްގައި ކަރަންޓުގެ ހިދުމަތް ފޯރުކޮށްދޭ ޔުޓިލިޓީ ކުންފުނިންނެވެ. އެގޮތުން މި ޕްރޮގްރާމް ހިންގާނީ ސްޓެލްކޯ އާއި ފެނަކަ މެދުވެރިކޮށެވެ.
މަގޭ ސޯލާ ޕްރޮގްރާމްގެ ފުރަތަމަ ފިޔަވަހީގެ ދަށުން ޖުމްލަ ތިން މެގަވޮޓުގެ އަވިން ކަރަންޓު އުފައްދާ ނިޒާމުތައް ގޭބިސީތަކަށް ފޯރުކޮށްދެވޭނެ އެވެ. ސަރުކާރުން މިކަން ކުރަން ރާވާފައި ވަނީ ގޭގޭގެ ފުރާޅުތަކުގައި ތިން ކިލޯވޮޓާއި ފަސް ކިލޯވޮޓުގެ ނިޒާމުތައް ހަރުކޮށްގެންނެވެ. ސަރުކާރުން ވަނީ ރަށްރަށުގައި ހަރުކުރަން ބޭނުންވާ ސޯލާ ޕީވީ ނިޒާމު ފޯރުކޮށްދޭން ބަޔަކު ހޯދަން ބީލަން ވެސް އިއްޔެ ހުޅުވާލާފަ އެވެ.
"މަގޭ ސޯލާ" ޕްރޮގްރާމް އިފްތިތާހުކުރުމުގެ ތެރެއިން: މި ޕްރޮގްރާމުގައި ބައިވެރިވެވޭނީ ޔުޓިލިޓީ ކުންފުނިތައް މެދުވެރިކޮށް -- ފޮޓޯ/އެނާޖީ މިނިސްޓްރީ
އެނާޖީ މިނިސްޓްރީން މައުލޫމާތު ދީފައިވާ ގޮތުގައި އަވިން ހަކަތަ އުފައްދާ ނިޒާމުތައް ހަރުކުރާ ގޭބިސީތަކަށް ބިލުކުރާނީ ނެޓް މީޓަރިން އުސޫލުގެ ދަށުންނެވެ. މި އުސޫލުގެ ދަށުން ބިލު ކުރާނީ ގޭބިސީއެއްގައި ބޭނުންކުރި ކަރަންޓު ޔުނިޓުގެ އަދަދުން ސޯލާ ޕީވީ ނިޒާމުން އުފެއްދި އަދަދު އުނިކުރުމުން ބާކީވާ ޔުނިޓުތަކަށެވެ. ކަރަންޓު ބިލުން އުނިވާ އަދަދު، އިންސްޓޯލްމަންޓް އުސޫލުން ގަނެފައިވާ ޕީވީ ނިޒާމުގެ އަގު ހަމަވަންދެން ކޮންމެ މަހެއްގެ ކަރަންޓު ބިލުގައި ހިމެނޭނެ އެވެ.
މީގެ ސަބަބުން ރައްޔިތުންނަށް ލިބޭނެ ފައިދާތައް ކިޔައިދެއްވަމުން އެނާޖީ މިނިސްޓަރު ތޯރިގު އިބްރާހިމް ވިދާޅުވި ގޮތުގައި، މިހާ އަވަސްކޮށް މުހިންމު ކަމެއް ކަމުގައި ދެކިގެން މި މަސައްކަތް ސަރުކާރުން ފެށީ ސީދާ ރައްޔިތުންގެ ޖީބަށާއި ސަރުކާރުގެ ބަޖެޓަށް ވެސް ފަސޭހަތަކެއް ވާނެތީ އެވެ.
"ކުޑަ މިސާލެއް ވެސް އަޅުގަނޑު އަރުވާނަން. މިސާލަކަށް ކަރަންޓު ބިލަށް ހޭދަކުރާ މިންވަރު ކުޑަކުރުމަށްޓަކައި، މިސާލަކަށް ކަރަންޓު ބިލަށް 300 ޔުނިޓު އަރާ ގެއެއް ކަމުގައި ވެއްޖިއްޔާމުން، ދެ ކިލޯވޮޓުގެ މީގެ ސޯލާ ޕެނަލް ހަރުކޮށްފި ނަމަ 90 އިންސައްތަ ކަރަންޓު ބިލަށް ކުޑަވެގެން ދާނެ،" އޭނާ ވިދާޅުވި އެވެ.
ތޯރިގު އިތުރަށް ވިދާޅުވީ ސަރުކާރުގެ އަމާޒަކީ މި ޕްރޮގްރާމުގެ ފުރަތަމަ ފިޔަވަހި ނިމޭއިރު ސޯލާ ޕެނަލް ހަރުކުރަން ބޭނުންވާ ހުރިހާ ގޭބިސީތަކަށް އެ ފުރުސަތު ފަހިކޮށްދިނުން ކަމަށެވެ. ފަސޭހަ އިންސްޓޯލްމަންޓް އުސޫލެއްގެ ދަށުން މިކަން ތައާރަފުކުރަން ޕްރޮގްރާމެއް ފެށީ ވެސް ވީހާ ވެސް ގިނަ ބަޔަކަށް އެ ފުރުސަތު ފަހިކޮށްދިނުމުގެ މަގުސަދުގައި ކަމަށް އޭނާ ފާހަގަކުރެއްވި އެވެ.
އެނާޖީ މިނިސްޓަރު ތޯރިގު އިބްރާހިމް "މަގޭ ސޯލާ" ޕްރޮގްރާމް އިފްތިތާހުކުރުމުގެ ރަސްމިއްޔާތުގައި ވާހަކަދައްކަވަނީ: މި ޕްރޮގްރާމުގެ މާލީ ފައިދާ ރައްޔިތުންނާއި ސަރުކާރަށް ވެސް ކުރާނެ ކަމަށް ވިދާޅުވި -- ފޮޓޯ/އެނާޖީ މިނިސްޓްރީ
އެނާޖީ މިނިސްޓްރީން ވެސް ބުނީ މި ޕްރޮގްރާމު ރާވާފައި ވަނީ ބޮޑު ހަރަދެއް ހިނގާ ސޯލާ ޕީވީ ސިސްޓަމް ރައްޔިތުންނަށް ހުރި ދަތިތަކަށް ލުޔެއް ހޯދައިދީ އިންސްޓޯލްމަންޓް އުސޫލުން ފައިސާ ދެއްކޭނެ ގޮތަށް ކަމަށެވެ. އަދި މިއީ ސޯލާ ނިޒާމް ހަރުކުރުމުގެ ފައިދާ ދިގު މުއްދަތަކަށް ރައްޔިޔުންނަށް ލިބިގެންދާނެ ކަމެއްގެ ގޮތުގައި ވެސް އެ މިނިސްޓްރީން ފާހަގަކުރި އެވެ.
މަގޭ ސޯލާ ޕްރޮގްރާމް އިފްތިތާހު ކުރި ނަމަވެސް މިކަމަށް އެދި ހުށަހެޅޭނެ ތާރީހެއް އަދި އިއުލާނެއް ނުކުރެ އެވެ. ބެލެވޭ ގޮތުގައި ހުށަހެޅުންތަކަށް ހުޅުވާލާނީ މިކަމަށް ބޭނުންވާ ސާމާނު ހޯދަން މިހާރު ހުޅުވާލާފައިވާ ބީލަން މަރުހަލާ ނިމި ސާމާނު ލިބޭނެ މަގުފަހި ވާނެ ގޮތެއް ވީމަ އެވެ.
މި ޕްރޮގްރާމް ފެށުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ފުރަތަމަ 100 ދުވަހުގެ ޕްލޭން "ހަފުތާ 14"ގައި ވެސް ހިމެނޭ ކަމެކެވެ.
މީގެ ކުރިން ސްޓެލްކޯއިން ވެސް ގޭބިސީތަކުގައި އިންސްޓޯލްމަންޓަށް ސޯލާ ޕީވީ ނިޒާމު ހަރުކޮށްދިނުމުގެ ޕްރޮގްރާމެއް "ގްރީން ލައިފް" ނަމުގައި ހިންގި އެވެ. ނަމަވެސް 2020 ގައި ފެށުމަށް ފަހު އެފަހުން އެ ކުންފުނީގެ މެނޭޖްމަންޓަށް އައި ބަދަލަށް ފަހު އެ ޕްރޮގްރާމް އޮތީ ހުއްޓާލާފަ އެވެ.
