ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަންގެ ދެ ވަނަ ބުރުން ރޯޔަލްސް ބާސްކެޓްބޯޅަ ކުލަބު، ޓަލޮންސް ބާސްކެޓްބޯޅަ ކުލަބު އަދި ސްޓިންގާސް ބާސްކެޓްބޯޅަ ކުލަބުން ޖާގަ ހޯދައިފި އެވެ.
ހަތް ޓީމާ އެކު މި މަހުގެ 17 ވަނަ ދުވަހު ފެށި ގައުމީ ލީގުގެ ދެ ވަނަ ޑިވިޝަންގެ ފުރަތަމަ ބުރު ނިމުނުއިރު އެއް ވަނަ ހޯދީ ޓަލޮންސް އެވެ. ދެ ވަނަ ރޯޔަލްސް އިން ހޯދިއިރު، ތިން ވަނަ އަށް ދިޔައީ ސްޓިންގާސް އެވެ. ދެ ވަނަ ބުރުން ފުރުސަތު ލިބެނީ ފުރަތަމަ ބުރުގެ ގަދަ ތިން ޓީމަށެވެ. ލީގުގެ ޗެމްޕިއަން ކަނޑައަޅާނީ ދެ ވަނަ ބުރުގައި ހުރިހާ ޓީމެއް ލީގު އުސޫލުން ކުޅުމަށްފަހުގަ އެވެ.
ފުރަތަމަ ބުރުގެ ނަތިޖާތަކަށް ބަލާއިރު ޓަލޮންސް އާއި ރޯޔަލްސް އިން ވަނީ 11 ޕޮއިންޓް ހޯދައިފަ އެވެ. ދެ ޓީމުވެސް ބަލިވެފައިވަނީ އެންމެ މެޗަކުންނެވެ. ރޯޔަލްސް ބަލިވެފައިވަނީ ޓަލޮންސް އަތުންނެވެ. އަދި ޓަލޮންސް ބަލިވީ ޑަބްލިއު ސްޕޯޓްސް އެކަޑެމީ އަތުންނެވެ. ފުރަތަމަ ބުރުގެ އެއް ވަނަ ޓަލޮންސް އަށް ލިބުނީ ހެޑް ޓު ހެޑަށް ބަލާއިރު ކުރި ލިބިގެންނެވެ.
ތިން ވަނަ އަށް ދިޔަ ސްޓިންގާސް އާއި ޑަބްލިއު ސްޕޯޓްސް އެކަޑެމީއަށް ލިބިފައިވަނީ 10 ޕޮއިންޓެވެ. ސްޓިންގާސް ބަލިވީ ރޯޔަލްސް އާއި ޓަލޮންސް އަތުންނެވެ. ޑަބްލިއު ސްޕޯޓްސް ބަލިވީ ރޯޔަލްސް އަތުންނާއި ސްޓިންގާސް އަތުންނެވެ. ތިން ވަނަ ސްޓިންގާސްއަށްވެސް ލިބުނީ ދެ ޓީމުގެ ކުރިމަތިލުން ސްޓިންގާސް ކާމިޔާބުކޮށްފައިވާތީ އެވެ.
ލީގުގެ ފަސް ވަނަ އަށް ދިޔައީ މިދިޔަ އަހަރުގެ ޗެމްޕިއަން ސްޕާޓަސްން އެވެ. ސްޕާޓަންސް އަށް ހަ މެޗުން ލިބުނީ ނުވަ ޕޮއިންޓެވެ. އެ ޓީމު ވަނީ ތިން މެޗުން މޮޅުވެ، ތިން މެޗުން ބަލިވެފަ އެވެ. އެލްކިއު ސްޕޯޓްސް ކުލަބުން ހަ މެޗުގެ ތެރެއިން އެއް މެޗު ކާމިޔާބުކުރިއިރު، ލީގު ބުރުގެ ފުލަށް ދިޔައީ ކުޅުނު ހަ ބަލިވި ހުޅުމާލެ ސްޕޯޓްސް ކުލަބެވެ.
