ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޖެނެރަލް ސެކްރެޓަރީގެ މަގާމުން ހުސެއިން ޖަވާޒް (ޖަވާ) އިސްތިއުފާދީފި އެެވެ.
ޖަވާ، ރޭގެ ވަގުތެއްގައި އިސްތިއުފާދީފައިވާކަން ވަނީ މީޑިއާ އަށް ކަށަވަރުކޮށްދީފަ އެވެ. އެކަމަކު، މި ވަގުތު މީޑިއާގައި އިތުރު ވާހަކަ ދައްކަން ބޭނުންނުވާ ކަމަށް ވެސް ވަނީ ބުނެފަ އެވެ.
އެކަމަކު، އޭގެ ފަހުން، އެފްއޭއެމްގެ ވަޓްސަޕް މީޑިއާ ގްރޫޕްގައި ޖަވާ ވަނީ މީޑިއާ އަށް މެސެޖެއް ލިޔެފަ އެވެ. އެ މެސެޖުގައި ޖަވާ ބުނީ 24 އަަހަރާއި ތިން މަސް ދުވަސް ފަހުން އެފްއޭއެމް އިން ވަކިވާން ނިންމާފައިވާ ކަމަށެވެ. އަދި އެ މުއްދަތުގައި އެހީތެރިކަން ފޯރުކޮށްދިން ފަރާތްތަކަށް ޖަވާ ވަނީ ޝުކުރު އަދާކޮށްފަ އެވެ.
"މިއީ ފަސޭހަ ނިންމުމެއް ނޫން،" ޖަވާ، އެފްއޭއެމްގެ ވަޓްސަޕް ގްރޫޕްގައި ލިޔެފައިވެ އެވެ.
އެފްއޭއެމްގެ ހިންގުމަށް ޕްރެޝަރު ބޮޑު ހާލަތެއް ކުރިމަތިވެފައިވާއިރު، އެ އެސޯސިއޭޝަންގެ ރައީސް ބައްސާމް އަދީލް ޖަލީލްގެ އިސްތިއުފާ އަށް ވެސް ގިނަ ބަޔަކު އަންނަނީ އަޑުއުފުލަމުންނެވެ.
ދާދި ފަހުން "މިހާރު" އަށް ދިން އިންޓަވިއުއެއްގައި ބައްސާމް ވިދާޅުވީ، އެފްއޭއެމް ފެއިލްވީ ކަމަށް ގިނަ ބަޔަކު ފާހަގުކޮށް އެ ވާހަކަ ދައްކާނަމަ އެކަންވީ މުޅި އެފްއޭއެމްގެ އިހުމާލުން ކަމަށާއި ވަކިވަކި މީހެއްގެ ކަމަކުން ކަމަށް ނުބުނެވޭނެ ކަމަށެވެ.
ބައްސާމްގެ ދެ ވަނަ ދައުރަކަށް އެފްއޭއެމްގެ ރައީސްގެ މަގާމު ފުރުއްވަމުން އަންނައިރު، ދެ ދައުރުގައި ވެސް ޖެނެރަލް ސެކްރެޓަރީގެ ގޮތުގައި ހުރެ ދުވަހުން ދުވަހަށް ކުރަން ހުންނަ މަސައްކަތްތަކުގައި ހަރަކާތްތެރިވަމުން އައީ ޖަވާ އެވެ.
މަނީ ލޯންޑަރިންގެ ތުހުމަތު ވެސް އަމާޒުވެފައިވާ އެފްއޭއެމް، މާލީ ގޮތުން އަޑިގަނޑަކަށް ވެއްޓިފައި އޮތްއިރު، އިދާރީ ގޮތުން އެފްއޭއެމް ހިންގުމަށް ވެސް ވަނީ ގިނަ ގޮންޖެހުންތަކާ ކުރިމަތިވެފަ އެވެ. މި ހުރިހާ ކަމެއްގެ ޕްރެޝަރުތެރޭގައި މަސައްކަތް ކުރަމުން އައުމަށްފަހުު ޖަވާ މި ވަނީ މަގާމުން އިސްތިއުފާދީފަ އެވެ.
އެފްއޭއެމްގެ ވަޒީފާ އަށް 1999 ވަނަ އަހަރު ނުކުތް ޖަވާ އަކީ އެ އެސޯސިއޭޝަންގެ ހިންގުމުގައި އެކި މަސައްކަތްތަކުގައި އުޅުނު ފަރާތެކެވެ. ގައުމީ ފުޓްބޯޅަ ޓީމުގެ މެނޭޖަރުކަން ވެސް ކޮށްފައިވާ ޖަވާ، އެންމެ ފުރަތަމަ ޖެނެރަލް ސެކްރެޓަރީ އަކަށް 2014 ވަނަ އަހަރު، މަސައްކަތް ކުރި ޖަވާ ވަނީ، އެފްއޭއެމްގެ ވަޒީފާ އަދާކުރަމުން މެލޭޝިއާ އިން ތައުލީމު ހާސިލްކޮށްފަ އެވެ.
ކޮމަންވެލްތު ގޭމްސްގައި މިދިޔަ އަހަރު ރާއްޖޭގެ ކޮންޓިންޖެންޓް ވާދަކުރިއިރު، ޗެފް ޑި މިޝަން އަކަށް މަަސައްކަތްކުރި ޖަވާ އެފްއޭއެމްގެ އެ މަގާމުން އިސްތިއުފާދީފައިވާއިރު، އެފްއޭއެމުން މިދިޔަ ހަތް ވަރަަަކަށް މަހު އެތަނުގެ މުވައްޒަފުންނަށް މުސާރަ ނުދޭތީ، ގިނަ މުވައްޒަފުންތަކެއް ވަނީ އެތަނުން ވަކިވެފަ އެވެ.
