ލަންޑަން (ނޮވެމްބަރު 24) - މިދިޔަ އަހަރު ގާނާގެ މަޖިލީސް މެމްބަރު، އިސާކް އަޑޮންގޯ، އެ ގައުމުގެ ބަޖެޓް ބަހުސްގައި ވާހަކަދައްކަވަމުން، މިސާލު ޖައްސަވަމުން މެންޗެސްޓާ ޔުނައިޓެޑްގެ ޑިފެންޑަރު، ހެރީ މެގުއާ އަށް ފާޑުކިޔާފައިވާއިރު، އެކަމަށް އިސާކް އަށް މެގުއާ މާފުދީފި އެވެ.
މެގުއާ ވަނީ ޔުނައިޓެޑްގެ މެޗެއް ބެލުމަށް އިސާކް އަށް އޯލްޑް ޓްރެފޯޑަށް އަންނަން ދައުވަތު ވެސް ދީފަ އެވެ.
ގާނާގެ ނައިބު ރައީސް، މަހަމަދޫ ބަވޫމިއާ، އެ ގައުމުގެ އިގްތިސާދީ ކަންކަން ބަލަހައްޓާ ގޮތް ގޯސްކަން ފާހަގަކޮށް، އެކަން އޮޅުންފިލުވައިދޭން މިސާލެއް ދެއްކުމުގެ ގޮތުން، މިދިޔަ އަހަރުގެ ބަޖެޓް ބަހުސްގައި މެމްބަރު، އިސާކް ވިދާޅުވެފައިވަނީ ކަންކަން ހުރީ މެގުއާ ދަނޑުމަތީގައި ދައްކާ ކުޅުމާ އެއް ކަހަލަ ގޮތަކަށް ކަމަށެވެ.
އޭނާ ވިދާޅުވީ މެގުއާ އަކީ ޔުނައިޓެޑްގެ ޑިފެންސްގައި ހުރެ އެ ޓީމަށް އެންމެ ނުރައްކާކުރާ ކުޅުންތެރިޔާ ކަމަށެވެ.
މިދިޔަ އަހަރުގެ އެ ވާހަކަތަކަށް އިޝާރާތްކޮށް، އިސާކް، މިދިޔަ އަންގާރަ ދުވަހުގެ ބަޖެޓް ބަހުސެއްގައި ވިދާޅުވީ މިހާރު މެގުއާ އަކީ ބަދަލުވެފައިވާ ކުޅުންތެރިއެއް ކަމަށާއި ހާލަތު ތަފާތު ކަމަށެވެ. އަދި މެގުއާ އަކީ ޔުނައިޓެޑްގެ ވެސް މުހިންމު ކުޅުންތެރިއެއް ކަމަށް ވެސް ވަނީ ވިދާޅުވެފަ އެވެ.
އިސާކް ވިދާޅުވީ ކުރިން މެގުއާގެ ނަން ބޭނުންކޮށްގެން ވާހަކަ ދެއްކި ސަބަބަކީ 2021 އާއި 2022 ވަނަ އަހަރު އޭނާގެ ކުޅުން ދަށްވުމުން ކަމަށާއި އޭރު ޔުނައިޓެޑުން ކުރި އިންވެސްޓްގެ ފައިދާ ނުކުރާތީ އެ ވަގުތު ގާނާގެ ސަރުކާރުން އަމަލުކުރަމުން އައި ގޮތަށް ބަަލައި، އެ ގައުމުގެ އިގްތިސޯދީ ކަންކަމާ އަޅާކިޔުނީ ކަމަށެވެ.
އެކަމަކު، މެގުއާގެ ނަން ބޭނުންކޮށްގެން ކުރެވުނު ކަންކަމާ މެދު ވިސްނައި، މާފަށް އެދެން ނިންމީ ކަމަށް އިސާކް ވިދާޅުވި އެވެ.
މެގުއާ މާފުދިނުމުން، މެމްބަރު އިސާކް ވަނީ އެކަމަށްޓަކައި ވަނީ ޝުކުރު އަދާކޮށްފަ އެވެ.
