އެމްޑީޕީގެ ފުރަތަމަ ވެރިކަމުގައި ރައީސުލްޖުމްހުރިއްޔާގެ މަގާމުގައި ހުންނަވާ ކުރީގެ ރައީސް މުހައްމަދު ނަޝީދު، އިޒްރޭލާ އެކު ގުޅުން ބަދަހިކުރައްވަން މަސައްކަތް ކުރެއްވުމާ ބެހޭގޮތުން ކުރިމަތިވި ސުވާލުތަކަށް އެމަނިކުފާނު ޖަވާބު ދެއްވަން އުޒުރުވެރިވެވަޑައިގެންފި އެވެ.
އިޒްރޭލުގެ ޕާސްޕޯޓުގައި ރާއްޖެއަށް އިޒްރޭލު މީހުންނަށް ނެރޭ ގޮތް ހެދުމަށް ގޮވާލައި ރައްޔިތުންގެ މަޖިލިސް ކައިރިއަށް އެއްވެ އާންމުން ޝުއޫރު ފާޅުކުރަމުންދަނިކޮށް ނަޝީދު ވަނީ އެ މުޒާހަރާގެ ބައިވެރިންނާ ބައްދަލުކުރުމަށް މަޖިލީހުގެ ގޯތި ތެރެއިން ނުކުންނަވާފަ އެވެ.
ނަޝީދު ނުކުންނަވާ، އެމަނިކުފާނު ދިވެހި ރައްޔިތުންނެކޭ އެއްގޮތަށް ހުންނެވީ އަދި އަބަދުވެސް ހުންނަވާނީ ފަލަސްތީނާ އެކު ކަމަށާއި އިޒްރޭލުން ހިންގަމުންދާ ގަތުލުއާންމު ހުއްޓުވަން ޖެހޭ ކަމަށް ވިދާޅުވި އެވެ. އެއާއެކު ނޫސްވެރިން ވަނީ އެމަނިކުފާނުގެ ވެރިކަމުގައި އިޒްރޭލާ އެކު ހާރިޖީ ގުޅުން ގާއިމުކުރަން މަސައްކަތް ކުރީ ކީއްވެގެންތޯ އަހާފަ އެވެ.
"މީގަ ދެ ކަމެއް އަޅުގަނޑުމެން ފާހަގަކުރަން އެބަ ޖެހޭ، ޒަޔަނިޒަމާ އިޒްރޭލާ، ވަރަށް ނުބައި ކަމެއް ޒަޔަނިޒަމަކީ.."
އެ ހިސާބަށް ޖަވާބު ދެއްވުމުން ނޫސްވެރިން ވަނީ އިޒްރޭލަކީ ޒަޔަނިސްޓު ނުވަތަ ސަހުޔޫނީ ސްޓޭޓެއް ނޫންތޯ ނަޝީދުގެ އަރިހުން އަހާފަ އެވެ. އެ ސުވާލަށް ނަޝީދު ޖަވާބެއް ނުދެއްވަ އެވެ. ވިދާޅުވީ މި އެއްވުމުގެ މަގުސަދަކީ އެމަނިކުފާނާ ނޫސްވެރިންނާ "ޒުވާބު" ކުރުން ނޫން ކަމަށެވެ.
އެހެން ވިދާޅުވެ އާންމުންގެ ގާތަށް ވަޑައިގަތުމުން އެ ފަރާތްތަކުންވެސް ދާދި އެއް ސުވާލުތަކެއް ކުރި އެވެ. މަޖިލީހުން އިޒްރޭލާ ދެކޮޅަށް މަސައްކަތް ނުކުރާކަން ފާހަގަކުރި އެވެ. އެ ސުވާލުތަކަށް ވެސް ސީދާ ޖަވާބެއް ނުދެއްވާ، ޕާޓީގެ މެންބަރުންނާއެކު ވަޑައިގެންނެވީ މަޖިލީހުގެ ގޯތި ތެރެއަށެވެ.
ނަޝީދުގެ ވެރިކަމުގައި އިޒްރޭލާއެކު ގުޅުން ބަދަހިކުރުމަށް ގިނަ މަސައްކަތްތަކެއް ކުރެވުނެވެ. އޭރުގެ ފޮރިން މިނިސްޓަރު، މިހާރުގެ ހެލްތު މިނިސްޓަރު އަހުމަދު ނަސީމު އިޒްރޭލަށް ރަސްމީ ދަތުރެއްވެސް ކުރެއްވި އެވެ.
