އަންނަ އަހަރަށް ލަފާކުރާ ބަޖެޓާއި 2023ގެ ސަޕްލިމަންޓަރީ ބަޖެޓު ހުށަހަޅާފައިވަނީ ގަވާއިދާ އެއްގޮތަށް ކަމަށާއި އެކަމާއި ގުޅޭގޮތުން އިތުރު ނިޒާމީ ނުކުތާ ނެގުމަށް ފުރުސަތު ނުދެއްވާނެކަމަށް މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާ ފައްޓަވައި ވާހަކަފުޅުދައްކަވަމުން އަސްލަމް ވަނީ މަޖިލީހުގެ ނިޒާމް ގެއްލުވާލުމަށް ފުރުސަތު ނުދެއްވާނެކަން ފާހަގަކުރައްވައި ބައެއް ބަދަލުތައް ގެންނަވާނެކަންވެސް އަންގަވާފައެވެ.
ބަޖެޓު ހުށަހަޅަންޖެހޭ މުއްދަތުގައި ފިނޭންސް މިނިސްޓަރ އިބްރާހިމް އަމީރު މަޖިލީހަސް ވަޑައިގެންފައިނުވާތީ ޑިމޮކްރެޓްސްގެ މެމްބަރުން އަންނަނީ މަޖިލީހުގައި އަޑުގަދަކުރައްވަމުންނެވެ. އަދި އިއްޔެ މިނިސްޓަރ އަމީރު ބަޖެޓު ހުށަހެޅުއްވި ވަގުތު މިނިސްޓަރު ވަށާލައި، އަޑުގަދަކޮށް، ބަޖެޓް ހުށަހެޅުން ހުއްޓުވަން ވެސް ބައެއް މެމްބަރުން މަސައްކަތްކުރެއްވި އެވެ.
އެކަމަށް އިޝާރާތްކުރައްވައި މިނިސްޓަރ އަމީރާއި ހަވާލާދެއްވައި މަޖިލީހުގެ ރައީސް އަސްލަމް ވިދާޅުވީ ބަޖެޓު މަޖިލީހަށް ފޮނުވުމުން، މަޖިލީހަށް ބަޖެޓު ހުށަހެޅުނީކަމަށެވެ. އަދި މިނިސްޓަރ މަޖިލީހަށް ވަޑައިގެންފައިނުވަނީ އެޓަރނީ ޖެނެރަލްގެ ލަފާގެ މަތިންކަމަށް މިނިސްޓަރ ވިދާޅުވެފައިވާކަން އަސްލަމް ފާހަގަކުރެއްވިއެވެ.
މިމައްސަލާއި ގުޅޭގޮތުން މަޖިލީހުގެ އިމްތިޔާޒަށް އަރައިގެންފައިވާކަމަށް މެމްބަރުން ދެކިލައްވާނަމަ ލިޔުމަކުން ރިޔާސަތަށް ނުވަތަ އިމްތިޔާޒް ކޮމެޓީއަށް ފޮނުއްވާ، އިމްތިޔާޒް ކޮމެޓީން އެމައްސަލަ ބަލާނެކަމަށް އަޅުގަނޑު އުންމީދުކުރަނީ
މީގެ އިތުރުން، މިމައްސަލައާއި ގުޅޭގޮތުން ނިޒާމީ ނުކުތާ ނަގައި ބަޖެޓު ފާސްނުކުރުމަށް ކުރާ މަސައްކަތަށް ޖާގަ ނުދެއްވާނެކަމަށް އަސްލަމް ވިދާޅުވިއެވެ.
އިއްޔެގެ ޖަލްސާއަށް ބަޖެޓު ހުށަހެޅުއްވުމަށް މިނިސްޓަރ މަޖިލީހަށް ވަޑައިގެންނެވުމުން ޖަލްސާ ފެށުނީއްސުރެ ގިނަ މެމްބަރުންތަކެއް ދިޔައި އެއް ފަހަރާ ނިޒާމީ ނުކުތާތައް ނަގަމުންނެވެ. އެގޮތުން މައްޗަންގޯޅި މެދު ދާއިރާގެ މެމްބަރު މުހައްމަދު ނަޝީދުވެސް ވަނީ އެފަދަ ނުކުތާއެއް ނަންގަވައި ބަޖެޓު ހުށަހެޅުއްވުން އަމީރު ލަސްކުރައްވާފައިވަނީ ގާނޫނާ ހިލާފަށް ކަމަށް ވިދާޅުވެފައެވެ.
އިއްޔެވެސް އަސްލަމް ވަނީ އެކަމުގައި މައްސަލައެއް އޮތްކަމަށް ދެކިލައްވާނަމަ މަޖިލީހުގެ ނިޒާމް ގެއްލުވާނުލައި ލިޔުމުން އެކަން ހުށަހެޅުމަށް އެދިވަޑައިގެންފައެވެ. މިއަދު ވެސް އެ ވާހަަކަ ތަކުރާރު ކުރެއްވި އެވެ.
