މިދިޔަ އޮގަސްޓު މަހުގެ 29 ވަނަ ދުވަހުގެ ފަހުން މެދުކަނޑާލާފައި އޮތް ދިވެހި ޕްރިމިއާ ލީގުގެ ކުޅުން އަންނަ ބުރާސްފަތި ދުވަހު ފަށަން ތައްޔާރުވެއްޖެ އެވެ.
ދިވެހި ޕްރިމިއާ ލީގުގެ ކުޅުން މިދިޔަ އޮގަސްޓް މަހަށްފަހު މެދުކަނޑާލީ އޭއެފްސީ ކަޕްގައި މާޒިޔާ ކުޅޭ މެޗުތަކަށާއި، ވޯލްޑް ކަޕް/އޭޝިއަން ކަޕްގެ ކޮލިފައިންގައި ބަންގްލަދޭޝްއާ ދެކޮޅަށް ރާއްޖެ ކުޅޭ ދެ މެޗަށެވެ. މި ދެމެޗަށް ފަހު އަލުން ކުޅުން ފަށަން ނިންމާފައި އޮތީ އޮކްޓޯބަރު 28ގަ އެވެ.
ނަމަވެސް ޕްރޮސެކިއުޓާ ޖެނެރަލްގެ އޮފީހުން ހިންގަމުން އަންނަ އެފްއޭއެމްގެ ތަހުގީގުގެ ސަބަބުން ލީގުގެ ކުޅުން އަނެއްކާވެސް މެދުކަނޑާލި އެވެ. އެފްއޭއެމުން ބުނީ ކޯޓު އަމުރެއްގެ ދަށުން ފުލުހުން އެ އިދާރާއަށްވަދެ ގިނަ ލިޔެކިޔުންތަކާ ހާޑް ޑްރައިވްތަކެއް ގެންގޮސްފައިވާތީ ލީގު ކުރިއަށް ގެންދެވެން ނެތް ކަމަށެވެ.
ފުލުހުން ވަނީ މާ ގިނަ ދުވަސްތަކެއް ނުވެ ލިޔެކިޔުންތަކާއި ހާޑް ޑްރައިވްތައް އެފްއޭއެމްއާ ހަވާލުކޮށްފަ އެވެ. އޭގެ ފަހުން ލީގާ ގުޅޭގޮތުން މައުލޫމާތެއް ނުލިބި އޮތުމަށްފަހު އަންނަ ބުރާސްފަތި ދުވަހު ލީގުގެ ކުޅުން ފެށުމަށްވަނީ ނިންމާފަ އެވެ.
ލީގުގެ ކުޅުން އަލުން ފަށާނީ ކްލަބް އީގަލްސް އާއި ޔުނައިޓެޑް ވިކްޓަރީ ކުޅޭ މެޗުންނެވެ. ބުރާސްފަތި ދުވަހުގެ ރޭ މާޒިޔާ ސްޕޯޓްސް އެންޑް ރެކްރިއޭޝަނާއި، ކުލަބު ވެލެންސިޔާ ވާދަކުރާނެ އެވެ.
ދިވެހި ޕްރިމިއާ ލީގުގެ ދެވަނަ ބުރުގެ ފަހު މެޗު ކުޅުމުގެ ކުރިން އޭއެފްސީ ކަޕްގައި މާޒިޔާ ރަށުން ބޭރުގައި ބަޝުންދަރަ ކިންގްސްއާ ދެކޮޅަށް ކުޅޭ މެޗަށް ހަފްތާއަކަށް ލީގުގެ ކުޅުން މެދުކަނޑާލާނެ އެވެ. އެ މެޗު ކުޅޭނީ ނޮވެމްބަރު 27ގަ އެވެ.
ލީގުގެ ދެވަނަ ބުރުގެ ފަހު މެޗުގައި މާޒިޔާ ނުކުންނާނީ ބުރު ސްޕޯޓްސް ކުލަބާ ދެކޮޅަށް ޑިސެމްބަރު ފަހެއްގަ އެވެ.
ދިވެހި ޕްރިމިއާ ލީގުގެ އެއްވަނައިގައި މިވަގުތު އޮތީ ކުލަބު އީގަލްސް އެވެ. ނުވަ މެޗުން 23 ޕޮއިންޓް އީގަލްސްއިން ހޯދާފައިވާއިރު، އެންމެ ފަހުގެ ޗެމްޕިއަން މާޒިޔާއަށްވަނީ އަށް މެޗުން 22 ޕޮއިންޓް ލިބިފަ އެވެ.
