ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހަޅާފައިވާ ގަރާރާއި އަންނަ އަހަރަށް ލަފާކުރާ ދައުލަތުގެ ބަޖެޓާއި މިއަހަރުގެ ބާކީ ބަޔަށް ހުށަހަޅާ ސަޕްލިމެންޓްރީ ބަޖެޓު ހުށަހެޅުމުގެ މަސައްކަތް މާދަމާ ކުރިއަށް ގެންދާނެ ކަމަށް ވިދާޅުވެ މިއަދުގެ ދެވަނަ ޖަލްސާ ރިޔާސަތުގައި އިންނެވި ނައިބު ރައީސް އީވާ އަބްދުﷲ ނިންމާވާލައްވައިފި އެވެ.
ޖަލްސާ ނިންމަވާލައްވަމުން އީވާ ވިދާޅުވީ މަޖިލީހުގެ ޖަލްސާތައް ކުރިއަށް ގެންދަން އޮންނަ ރަސްމީ ގަޑި 2:30 އަށް ހަމަވުމާއި، ޖަލްސާ ކުރިއަށް ގެންދެވޭނެ ގޮތް ނުވުމުން ޖަލްސާ ނިންމާލީ ކަމަށެވެ. އަދި، ނަޝީދުގެ ގަރާރާއި ބަޖެޓުތައް ހުށަހެޅުން މާދަމާ ކުރިއަށް ގެންދިއުމަށް މަސައްކަތް ކުރައްވާނެ ކަމަށްވެސް އީވާ ވިދާޅުވި އެވެ.
މިއަދު ފުރަތަމަ ޖަލްސާ ތާވަލުކުރީ 9:00 އަށެވެ. އަންނަ އަހަރުގެ އަދި މި އަހަރުގެ ސަޕްލިމެންޓަރީ ބަޖެޓު ހުށަހަޅަން އޮތް މި ޖަލްސާ ކުރިއަށް ނުގެންދެވުނީ ކޯރަމް ހަމަނުވުމުގެ ސަބަބުންނެވެ. އެމްޑީޕީގެ ގިނަ މެންބަރުން އެވަގުތު ތިއްބެވީ މަޖިލީހުގެ ކުޑަ ދަށުގަ އެވެ.
ދެވަނަ ޖަލްސާއެއްގެ ގޮތުގައި 11:00 އަށް ތާވަލުކޮށްފައި އޮތް ޖަލްސާ ފަށްޓަވައި، އީވާ އެޖެންޑާ އިއުލާނު ކުރެއްވި އިރު މަޖިލީހުގެ މެޖޯރިޓީ އޮންނަ އެމްޑީޕީގެ މެމްބަރުން ގެންދެވީ ނުރުހުން ފާޅުކުރައްވަމުންނެވެ. އެ މެމްބަރުންނާ ދެކޮޅަަށް ދަ ޑިމޮކްރެޓްސްގެ މެމްބަރުން ވެސް ގެންދެވީ އަޑު ގަދަކުރައްވަމުންނެވެ.
އެއާ އެކު އީވާ ވިދާޅުވީ ޖަލްސާ ކުރިއަށް ނުގެންދެވޭ ވަރަށް މަޖިލީހުގެ ނިޒާމު ގެއްލިފައިވާ ކަމަށެވެ. އެހެންވެ މިވަގުތަށް ޖަލްސާ މެދުކަނޑައިލައްވަނީ ކަމަށް ވިދާޅުވެ، ޖަލްްސާ މެދުކަނޑުއްވައިލެއްވީ އެވެ.
މަޖިލީހުގެ ގަވައިދުގައިވާ ގޮތުނން މަޖިލީހުގެ ރައީސް ވަޑައިނުގަންނަވާ ހާލަތުގައި ޖަލްސާތަކުގެ ރިޔާސަތު ބަލަހައްޓަވާނީ ނައިބު ރައީސެވެ. އެހެން މެމްބަރަކާ ރިޔާސަތު ހަވާލުކުރާނީ ނައިބު ރައީސް ވެސް ވަޑައިނުގަންނަވާ ހާލަތުގަ އެވެ.
އެހެން ނަމަވެސް މަޖިލީހުގައި މިހާރު އުފެދިގެން އުޅޭ ހިޔާލު ތަފާތު ވުމަކީ ނަޝީދު ވަކިކުރަން އެމްޑީޕީން ހުށަހެޅި ގަރާރު، މަޖިލީހުގެ ގަވައިދާ ހިލާފު ކަމަށް އިއްޔެގެ ފުރަތަމަ ޖަލްސާގެ ރިޔާސަތު ބެލެހެއްޓެވި، ވިލުފުށި ދާއިރާގެ މެމްބަރު ހަސަން އަފީފު ނިންމެވުމުންނެވެ.
އެ ގަރާރު ގަވައިދާ ހިލާފު ކަމަށް ވިދާޅުވެ، އަފީފު ޖަލްސާ ނިންމަވައިލެއްވުމުން މަޖިލީހުގެ ސެކްރެޓޭރިއަޓުން އިއްޔެ ދެވަނަ ޖަލްސާއެއް ތާވަލުކުރި އިރު އެ ޖަލްސާގެ ރިޔާސަތަށް ވަޑައިގެންނެވީ އީވާ އެވެ. އީވާ ޖަލްސާ ނިންމަވައިލެއްވީ އަފީފުގެ ނިންމެވުން ރަނގަޅު ކަމަށް ވިދާޅުވެފަ އެވެ.
ނަޝީދު ވަކިކުރަން އެމްޑީޕީން ހުށަހެޅި ގަރާރާ މެދު އީވާއާއި އަފީފު އަމަލުކުރެއްވި ގޮތުގެ ކަންބޮޑުވުމާ އެކު މަޖިލީހުގެ އިމްތިޔާޒާއި ސުލޫކު ކޮމިޓީން އިއްޔެ ބައްދަލުވުމެއް ބޭއްވި އެވެ. އެ ކޮމިޓީން ނިންމީ ގަރާރު ބޭރުކޮށްލީ ގަވައިދާ ހިލާފަށް ކަމަށާއި މަޖިލީހުގެ ނައިބުރައީސް އީވާ އަބްދުﷲ އާއި ވިލުފުށި ދާއިރާގެ މެމްބަރު ހަސަން އަފީފު މެމްބަރުންގެ "އިމްތިޔާޒްތަކަށް އަރައިގަތް ކަމަށެވެ.
އަދި އެ ގަރާރު ހުއްޓުވާފައިވާތީ ހުއްޓުވާފައިވާތީ ރައްޔިތުންގެ މަޖިލީހުގެ އާންމު ކޮމިޓީއަށް ހުށަހެޅި މައްސަލާގައި ބަންޑާރަ ނައިބުގެ ލަފާ ހޯދުމަށް އެ ކޮމިޓީން ނިންމުމާއެކު، ބަންޑާރަ ނައިބު ވަނީ ނަޝީދުގެ ގަރާރު ކުރިއަށް ގެންދިއުން އަފީފު އަދި އީވާ ހުއްޓުވީ ގަވާއިދާ ހިލާފަށް ކަމަށާއި އެ ގަރާރު ދެން ކުރިއަށް ގެންދާއިރު އެ ދެ މެންބަރުން ރިޔާސަތުގައި ނުތިބެވޭނެ ކަމަށް ލަފާދެއްވާފަ އެވެ.
