ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަކިކުރަން އެމްޑީޕީން މަޖިލީހަށް ހުށަހެޅި ގަރާރު އިއްޔެ ބޭއްވި ދެ ޖަލްސާއަށް ތާވަލް ކުރިޔަސް، އެ މައްސަލަ ކުރިޔަށް ނުގެންދާން ރިޔާސަތުން ނިންމީ ރަނގަޅަށް ނޫން ކަމަށް މަޖިލީހުގެ އިދާރާއިން ބުންޏެވެ.
ނަޝީދުގެ އިތުބާރު ނެތްކަމުގެ މައްސަލަ އިއްޔެ އޮތް ދެ ޖަލްސާއަށް އެޖެންޑާ ކުރި އެވެ. ފުރަތަމަ ބޭއްވި ޖަލްސާގެ ރިޔާސަތުގައި، ވިލުފުށީ ދާއިރާގެ މެމްބަރު ހަސަން އަފީފު އިންނެވިއިރު، ނަޝީދު ވަކިކުރުމުގެ މައްސަލަ ކުރިޔަށް ގެންދިޔަ ނުދިނުމަށްޓަކައި އެ ބޭފުޅުން ނިސްބަތްވާ ދަ ޑިމޮކްރެޓްސް ޕާޓީގެ ޕާލިމެންޓަރީ ގްރޫޕުގެ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމް ނިޒާމީ މައްސަލައެއްގެ ގޮތުގައި ނެގީ އެމްޑީޕީގެ 49 މެމްބަރުން ސޮއި ކުރައްވައި ހުށަހަޅާފައި ވަނީ މަޖިލީހުގެ ގަވާއިދާ އެއްގޮތްވާ ގަރާރެއް ނޫން ކަމަށެވެ.
ނިޒާމީ އޮއިވަރެއްގެ ތެރެއަށް މަޖިލީހުގެ ތަޅުން ދޫކޮށްލުމަށް ފަހު އަފީފު ނިންމެވީ، ޑިމޮކްރެޓުން ބޭނުންވި ގޮތަށް އެ ގަރާރު މަޖިލީހުގެ ގަވާއިދާ ހިލާފު ކަމަށެވެ. އަދި ނަޝީދު ވަކިކުރުން އަލުން ހުށަހަޅަން އެންގި އެވެ.
"މިއަދުގެ ދެވަނަ ޖަލްސާ ތާވަލުކުރެއްވީ ފުރަތަމަ ޖަލްސާގައި އަފީފު ނިންމެވި ނިންމެވުން ގޯސް ކަމަށް ސެކްރެޓޭރިއަޓުން ދެކޭތީތޯ" "އަދަދު"ން ސުވާލުކުރުމުން އަމީން އާއްމު ފާތިމަތު ނިއުޝާ ވިދާޅުވީ ދެވަނަ ޖަލްސާ ތާވަލުކުރީ އެހެންވެ ކަމަށެވެ.
އަފީފުގެ ނިންމުން ގަބޫލު ނުކުރައްވައި، އިއްޔެ 11:30 އަށް ވެސް ޖަލްސާ އެޖެންޑާކުރި އެވެ. އެ ޖަލްސާގެ ރިޔާސަތު ބެލެހެއްޓެވުމަށް ވަޑައިގަތީ ފުރަތަމަ ޖަލްސާއަށް ސަލާމު ފޮނުއްވި މަޖިލީހުގެ ނައިބު ރައީސް، ނަޝީދުގެ ދެބޭންގެ ދެދަރި އީވާ އަބްދުﷲ އެވެ. އީވާ ނިންމެވީ ގަރާރު ބޭރުކޮށްލަން އަފީފު ނިންމެވި ނިންމެވުން ރަނގަޅު ކަމަށެވެ.
ނަމަވެސް ނަޝީދުގެ އިތުބާރުގެ މައްސަލަ ނިމިފައިވާ ކަމަށް އަމީންއާންމު ގަބޫލު ނުކުރައްވައި، އެ މައްސަލަ މިއަދަށް ވެސް އެޖެންޑާކުރި އެވެ.
މިއަދު ދެ ޖަލްސާއެއް އެބަ އޮތެވެ. ފުރަތަމަ އެޖެންޑާކޮށްފައި ވަނީ އަންނަ އަހަރަށް ލަފާކުރާ ދައުލަތުގެ ބެޖެޓާއި ސަޕްލެމެންޓަރީ ބަޖެޓު ހުށަހެޅުމުގެ ޖަލްސާއެވެ. ނަމަވެސް ފިނޭންސް މިނިސްޓަރު އިބްރާހިމް އަމީރު އާލާސްކަންފުޅާ އުޅުއްވާތީ އެ ޖަލްސާއަށް ވަޑައިނުގެންނެވޭނެކަން މަޖިލީހުގެ އިދާރާއަށް ވަނީ އަންގަވައިފަ އެވެ. އެހެންވެ، ބަޖެޓު ޖަލްސާ ކުރިއަށް ގެންދެވިދާނެ ކަމަށް ނުބެލެވެ އެވެ.
މަޖިލީހުގެ ގަވާއިދާ އެއްގޮތަށް ގަރާރު ހުށަހަޅާފައި ނެތް ކަމަށް މިހާރު އީވާ އާއި ހަސަން އަފީފު ގަބޫލު ކުރެއްވި ނަމަވެސް އެ މައްސަލަ އެޖެންޑާކުރުމުގެ ގާނޫނީ ހައިސިއްޔަތު އޮތް އަމީންއާންމު އެކަން ގަބޫލެއް ނުކުރައްވަ އެވެ.
ދަ ޑިމޮކްރެޓްސް މަސައްކަތް ކުރަމުން ގެންދަނީ މަޖިލީހުގައި ނަޝީދުގެ މައްސަލަ ކުރިޔަށް ގެންދިޔަ ނުދިނުމަށެވެ.
މުހިންމު ބައެއް ހަބަރު
ދުވަހުގެ ފޮޓޯ
ރައްޔިތުންގެ މަޖިލީހުގެ ނައިބު ރައީސް އީވާ އާއި ވިލުފުށީ ދާއިރާގެ މެމްބަރު ހަސަން އަފީފު މަޖިލީހުގެ ގަވާއިދާ ހިލާފުވި ކަމަށް ސުލޫކު ކޮމިޓީން އިއްޔެ ކަނޑައަޅަނީ. -- ފޮޓޯ: އަބްދުﷲ އިޔާން/ އަދަދު
