ރައްޔިތުންގެ މަޖިލީހުގެ ރައީސްކަމުން މުހައްމަދު ނަޝީދު ވަކިކުރުމަށް ހުށަހަޅާފައިވާ ގަރާރު މިއަދު ހެނދުނު ބޭއްވި ޖަލްސާގެ ރިޔާސަތުން ބޭރުކޮށްލާފައިވާ ކަމަށް ބުނެ އެ ގަރާރު ކުރިއަށް ނުގެންދެވޭނެ ކަމަށް ބުނެ މިއަދު ބޭއްވި ދެވަނަ ޖަލްސާ ވެސް ނިންމާލައިފި އެވެ.
މިއަދު ހެނދުނު 09:00 ގައި ބޭއްވި ޖަލްސާއަށް އީވާ ހާޒިރުވެވަޑައިގަނެފައި ނުވެ އެވެ. އޭނާ ހުންނެވީ ސަލާމުގަ އެވެ. އެހެންވެސް އެ ޖަލްސާގެ ރިޔާސަތު ބެލެހެއްޓެވީ ވިލުފުށީ ދާއިރާގެ މެމްބަރު ހަސަން އަފީފެވެ.
ޖަލްސާ ފަށައި އެޖެންޑާ އިއްވުމާ އެކު ނިޒާމާ ބެހޭ ނުކުތާއެއް ކަމަށް ވިދާޅުވެ ފުރުސަތު ހޯއްދަވައިގެން، ގަރާރު "ގަވައިދާ ހިލާފު ކަމަށް" ވިދާޅުވީ ދަ ޑިމޮކްރެޓްސްގެ ޕާލަމެންޓްރީ ގްރޫޕްގެ ލީޑަރު އަލީ އާޒިމެވެ.
އެއާ އެކު ހޫނު ބަހުސެއް ހިންގަން ފުރުސަތު ދެއްވުމަށް ފަހު މަޖިލީހުގެ ރިޔާސަތުން އަފީފު އިއުލާނުކުރެއްވީ ޖަލްސާ ނިންމަވައިލެއްވީ ކަމަށެވެ.
އެއަށްފަހު 11:30 އަށް ތާވަލުކުރި ޖަލްސާގެ ރިޔާސަތުގައި އިންނެވީ އީވާ އެވެ. އެ ޖަލްސާ ފެށުނުތާ ކުޑަ ވަގުތުކޮޅެއް ތެރޭ އެއީ ހެނދުނުގެ ޖަލްސާގައި ބޭރުކޮށްފައިވާ ގަރާރެއް ކަމަށް ބުނެ ދެވަނަ ޖަލްސާ އީވާ ނިންމަވާލެއްވި އެވެ.
"މި ގަރާރަކީ މިއަދު ހެނދުނު 09:00 ޖެހިއިރު ފެށުނު ޖަލްސާގައި މިއަދުގެ ރިޔާސަތުން އެ ޖަލްސާ އެ ހިސާބުން ނިމުނީ ކަމަށް ނިންމަވައި ބޭރުކޮށްފައިވާ ގަރާރެއް. އެހެންވީމާ އަޅުގަނޑެއް ގަބޫލެއް ނުކުރަން މިއީ މިއަދު ދެން އިތުރަށް ކުރިއަށްގެންދެވޭނެ މައްސަލައެއް ކަމަށް. މި ގަރާރަކީ މަޖިލީހުގެ ރިޔާސަތުން ނިޒާމީ މައްސަލައެއްގައި ގޮތެއް ނިންމައި ބޭރުކޮށްފައިވާ ގަރާރެއް," ރިޔާސަތުގައި އިންނަވައި އީވާ ވިދާޅުވި އެވެ.
މިއަދު ހެނދުނު ބޭއްވި ޖަލްސާގައި ނަޝީދު ވަކިކުރަން ހުށަހަޅާފައިވާ ގަރާރު އޮތީ މަޖިލީހުގެ ގަވައިދާ އެއްގޮތަށް ކަަމަށް އެމްޑީޕީގެ މެމްބަރުން ތަކުރާރުކޮށް ވިދާޅުވި އެވެ. އެކަމަކު ރިޔާސަތުން ނިންމީ ގަރާރު ބޭރުކޮށްލުމަށެވެ.
ފާހަގަކުރެވޭ ގޮތުގައި މި ގަރާރު އެޖެންޑާ ކޮށްފައި ވަނީ މަޖިލީހުގެ އިދާރާއިން އެއީ ސައްހަ ގަރާރެއް ކަމަށް ބަލައިގަތުމަށް ފަހު އެވެ. އެކަމަކު ރިޔާސަތުގައި ތިއްބަވަނީ ނަޝީދު ނިސްބަތްވެވަޑައިގަންނަވާ ދަ ޑިމޮކްރެޓްސްގެ މެމްބަރުންނަށް ކަމަށްވުމާ އެކު ރިޔާސަތަށް ލިބިދޭ ބާރުގެ ދަށުން އެ ގަރާރަށް ދަނީ ތަކުރާރުކޮށް ހުރަސް އަޅަމުންނެވެ.
