ރައްޔިތުންގެ މަޖިލީހުގެ ނައިބު ރައީސް ހާޒިރުވެ ނެތަސް މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ކުރިއަށް ގެންދެވޭނެ ކަމަށް ސުޕްރީމް ކޯޓުން އިއްޔެ ކުރި ހުކުމަކީ މަޖިލީހުގައި އަޅުވާފައި އޮތް މަރުތަޅު ނެއްޓުމަށް އެމްޑީޕީން ކުރަމުން ދިޔަ މަސައްކަތަށް ލިބުނު ކާމިޔާބެއް ކަމަށް އެ ޕާޓީން ބުނެފި އެވެ.
ސުޕްރީމް ކޯޓުން ކުރި ހުކުމާ ގުޅޭ ގޮތުން އެމްޑީޕީން ނެރުނު ބަޔާނެއްގައި ބުނީ، ސުޕްރީމް ކޯޓުން އިއްޔެ ކުރި ހުކުމަކީ ގާނޫނުއަސާސީގެ ސިޔާދަތު ކަށަވަރުކޮށްދީ، ރާއްޖޭގައި އޮތް ގާނޫނީ ވެރިކަން ނަގަހައްޓައިދިން ހުކުމެއް ކަމަށެވެ.
"މިއީ، ރައްޔިތުންގެ މަޖިލީހުގެ ރައީސްގެ މަގާމުން ވަކިކުރުމަށް މި ޕާޓީން ހުށަހަޅައިފައިވާ ގަރާރުގެ މަސައްކަތް ހުއްޓުވުމުގެ ނިޔަތުގައި، މަދު ބަޔަކު ދިވެހި ދައުލަތުގެ އެއް ބާރު ކަމުގައިވާ ރައްޔިތުންގެ މަޖިލީހުގައި މަރުތަޅު އަޅުވާފައި އޮތް އޮތުމަށް ނިމުމެއް ގެނައުމަށްޓަކައި މި ޕާޓީން ކުރި މަސައްކަތަށް ލިބުނު ފުރިހަމަ ކާމިޔާބީ އެކެވެ،" އެ ބަޔާނުގައި ބުނެފައިވެ އެވެ.
ގާނޫނު އަސާސީން މަތިކޮށްފައިވާ މަސްއޫލިއްޔަތު އަދާ ކުރުންމަތީ ތިބޭނެ ކަމަށާއި މަސައްކަތަށް ހުރަސްއެޅުމަށް ކުރާ ކޮންމެ ކަމެއް ހުއްޓުވުމަށް ކުރަން ޖެހުނު ކޮންމެ ކަމެއް ކުރަނެ ކަމަށް ވެސް އެމްޑީޕީގެ ބަޔާނުގައި ބުނެފައިވެ އެވެ.
"އަޅުގަނޑުމެންގެ އުންމީދަކީ، ކުރިއަށް އޮތް ތަނުގައި، ރައްޔިތުންގެ މަޖިލީހުގެ ގަވައިދާ ހިލާފު އެއްވެސް ކަމެއް މަޖިލީހުގެ އިދާރާއިން ނުކުރެއްވުމެވެ. އަދި އެއްވެސް ފަރާތަކުން، ޑިމޮކްރެޓިކް ހަމަތަކާ އެއްގޮތްވާގޮތުގެމަތީން، ރައްޔިތުންގެ މަޖިލީހުގެ އަގުލަބިއްޔަތުން ކަންކަން ނިންމުމަށް ހުރެސްއެޅިދާނެފަދައަކުން ކަންކަން ނުކުރެއްވުމެވެ." އެ ޕާޓީގެ ބަޔާނުގައި ބުނެފައިވެ އެވެ.
މަޖިލީހާ ދެކޮޅަށް ސުޕްރީމް ކޯޓަށް އެމްޑީޕީން މައްސަލަ ހުށަހެޅީ މަޖިލީހުގެ ރައީސް، މުހައްމަދު ނަޝީދުގެ އިތުބާރު ނެތްކަމުގެ މައްސަލަ ނައިބު ރައީސް، އީވާ ސަލާމުގައި ހުންނެވުމުން ކުރިއަށް ނުގެންދެވޭނެ ކަމަށް މަޖިލީހުގެ އިދާރާއިން ނިންމަމުން ގެންދިއުމާ ގުޅިގެންނެވެ.
އެމްޑީޕީން އެދުނީ ނަޝީދުގެ އިތުބާރު ނެތް މައްސަލަ އެޖެންޑާކޮށް ޖަލްސާތައް ނުގެންގޮސްފައިވަނީ ގަވާއިދުގެ 44 ވަނަ މާއްދާއާ ހިލާފަށް ކަމަށް ކަނޑައަޅައިދިނުމަށެވެ. އަދި ގާނޫނު އަސާސީގެ 82 ވަނަ މާއްދާއާ ހިލާފަށް ކަމަށް ކަނޑައަޅައިދިނުމަށެވެ.
އެމްޑީޕީން ހުށަހެޅި މައްސަލައިގައި އެ ޕާޓީއާ އެއްކޮޅަށް ސުޕްރީމް ކޯޓުން އިއްޔެ ހުކުމް ކުރީ އެ މައްސަލަ ބެއްލެވި ފަސް ބެންޗުގެ ފަނޑިޔާރުގެ އިއްތިފާގުންނެވެ.
ފަނޑިޔާރުންގެ އަގުލަބިއްޔަތުން ނިންމި ކަންކަން
- ހުށަހެޅިފައިވަނީ ސުޕްރީމް ކޯޓުގެ އަސްލީ އިހުތިސޯސުގައި ހިމެނޭ މައްސަލައެއް
- މަޖިލީހުގެ ރައީސްގެ އިތުބާރު ނެތް ގަރާރު، ނައިބު ރައީސް ނެތަސް ގެންދެވޭނެ
- ރިޔާސަތު ބެލެހެއްޓޭ މެންބަރުންގެ މާއްދާއަކީ ކޮންމެ ހާލަތަކު ވެސް ހިނގާނެ މާއްދާއެއް
- މަޖިލީހުގެ ރައީސްގެ އިތުބާރު ނެތް ގަރާރު އޮތުމުން ނުގެންދެވެނީ ބަހުސްއާއި ކަމެއް ފާސްކުރުން
- މަޖިލީހުގެ ރައީސްގެ އިތުބާރު ނެތް ގަރާރު ނުނިމުނަސް ގާނޫނު އަސާސީން ލާޒިމުކުރާ ކަންކަން ގެންދަން ޖެހޭނެ
ސުޕްރީމް ކޯޓުގެ އަމުރާ ގުޅިގެން އެމްޑީޕީން ނެރުނު ބަޔާނުގައި ވަނީ އެއީ ޕާޓީއަށް ލިބުނު ކާމިޔާބެއް ކަމަށް ސިފަކޮށް އެމްޑީޕީގެ އާންމު މެންބަރުންނަށާއި ރައީސުލްޖުމްހޫރިއްޔާ އަދި އެމްޑީޕީގެ އެންމެ އިސް ލީޑަރު އިބްރާހިމް މުހައްމަދު ސޯލިހުއަށް ވެސް މަރުހަބާ ކިޔައިފަ އެވެ.
