ސަރުކާރުގެ ގެދޮރުވެރިޔާ ސިޔާސަތުގެ ދަށުން ފްލެޓުތައް ދޫކޮށް ނިންމުމަށް ވަކި ދުވަހެއް ކަނޑައަޅާފައި ނުވާ ކަމަށާއި މަސައްކަތް ކުރަމުންދަނީ އުސޫލުތަކުގެ ތެރެއިން ފްލެޓުތައް ދިނުމަށް ޕްލޭނިން މިނިސްޓްރީގެ ސްޓޭޓް އަދި ގެދޮރުވެރިޔާ ކޮމިޓީގެ ޗެއާ އަކްރަމް ކަމާލުއްދީން ވިދާޅުވެއްޖެ އެވެ.
އަކްރަމް މިހެން ވިދާޅުވީ ގެދޮރުވެރިޔާ ފްލެޓުތައް ހަވާލުކުރުން އާ ސަރުކާރަށް ދޫކޮލުމަށް އިންތިހާބީ ރައީސް ޑރ. މުހައްމަދު މުއިއްޒު އެދިވަޑައިގަންނަވާ ކަމަށް އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވެފައި ވަނިކޮށެވެ.
މިއަދު ޕްލޭނިން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި އަކްރަމް ވިދާޅުވީ, ފްލެޓްތަކުގެ މަސައްކަތް ކުރިއަށް ގެންދަނީ އެކަން ކުރަން އޮންނަ އުސޫލުތަކުގެ ތެރެއިން ކަމަށެވެ. އެހެންކަމުން ސަރުކާރު ބަދަލުވާން ކުޑަ ދުވަސްކޮޅަކަށްވީ ނަމަވެސް އެ މަސައްކަތް ހުއްޓާ ނުލައްވާނެ ކަމަށެވެ.
އޭނާ ވިދާޅުވީ ފްލެޓްގެ މަސައްކަތް ކުރަނީ ރައީސް އިބްރާހިމް މުހައްމަދު ސޯލިހުގެ ވެރިކަން ނިމުމުގެ ކުރިން އެކަން ކުރަން ނޫން ކަމަށެވެ. އެހެންކަމުން އަވަސް އަރުވާލައިގެން ބާކީ އޮތް 10 ދުވަސްތެރޭ ފްލެޓްގެ މަސައްކަތް ނިންމާލަން ނޫޅުއްވާނެ ކަމަށް އަކްރަމް ވިދާޅުވި އެވެ.
"[ފްލެޓު ދޫކުރުމުގެ މަސައްކަތް] ނިމިއްޖެއްޔާ ނިމުނީ, އެކަމަށް ވަކި ޑޭޓެއް ނުދޭނަން. ފްލެޓް ދޫކޮށް ނިމޭތޯ މަސައްކަތް ކުރާނީ," އަކްރަމް ވިދާޅުވި އެވެ.
އަކްރަމް ވިދާޅުވީ, ފްލެޓްތަކުގެ މައްސަލާގައި ބަޔަކު ޕްލޭނިން މިނިސްޓްރީ ދޮށަށް އެއްވުމުން, ނިކުމެވަޑައިގެން އެމީހުންގެ ޝަކުވާތައް ވެސް އެއްސެވި ކަމަށާއި, ފްލެޓު ދިނުން މަޑުޖައްސާލުމަށާއި, ޝަކުވާ ހުށަހަޅާ ބެލުމަށް އޭސީސީން އެންގި އިރު އެކަން ވެސް އޮތީ ކޮށްފައި ކަމަށެވެ.
ނޫސްވެރިން އަމާޒުކުރި ސުވާލުތަކަށް ޖަވާބު ދެއްވަމުން އަކްރަމް ވިދާޅުވި ގޮތުގައި, ފްލެޓް ލިބޭ މީހުންގެ ލިސްޓު އެކުލަވާލުމުގައި އިހުމާލުން އެއްވެސް ކަމެއް ކުރައްވާފައެއް ނުވާނެ އެވެ.
"އެ ގެރެންޓީ އެބަ އޮތް. އިއްޔެ އޭސީސީގެ ބޭފުޅުން ވަޑައިގެން ބެއްލެވި އެއްޗެހި. އަޅުގަނޑަށް ފެންނަ ގޮތުގައި އެބޭފުޅުން ވަރަށް ހިތްހަމަޖެހިވަޑައިގެންނެވި. ނުދައްކާ އެއްވެސް އެއްޗެއް ނޯންނާނެ, ހުރިހާ އެއްޗެއް ބެއްލެވި," އަކްރަމް ވިދާޅުވި އެވެ.
އަކްރަމް ވިދާޅުވީ ފްލެޓް ދިން ގޮތާއި މެދު, އާ ސަރުކާރުން އައިސް ފިޔަވަޅު އަޅާނެ އެއްވެސް ކަމެއް ކުރައްވާފައި ނުވާނެ ކަމަށެވެ.
ގެދޮރުވެރިޔާ ސްކީމުގެ ދަށުން ފުރަތަމަ ދޫކުރާ 4000 ފްލެޓު ލިބޭނެ ކަމަށް ކަނޑައަޅާ ޕްލޭނިން މިނިސްޓްރީން ނެރުނު ލިސްޓާމެދު ޝަކުވާ ބޮޑުވެގެން އެ މިނިސްޓްރީން ވަނީ އެ ލިސްޓަށް ޝަކުވާ ހުށަހަޅަން ހުޅުވާލާފަ އެވެ. އެގޮތުން މިމަހުގެ ނުވަ ވަނަ ދުވަހުގެ ނިޔަލަށް އެ ފުރުސަތު ހުޅުވާލާފައިވާކަން ފާހަގަކޮށްލެވެ އެވެ.
