ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކިކުރުމުގެ މައްސަލަ ކުރިއަށް ގެންދިޔުމަށް މިއަދަށް އެޖެންޑާކުރި ޖަލްސާ ވެސް، މަޖިލީހުގެ ނައިބު ރައީސް އީވާ އަބްދުﷲ އާލާސްކަންފުޅު ރަނގަޅު ނުވާ ކަމަށް ވިދާޅުވެ ސަލާމް ފޮނުއްވުމުން ކެންސަލްކޮށްފި އެވެ.
ނަޝީދުގެ މައްސަލަ އެޖެންޑާކުރި ފަހުން، ވިދިވިދިގެން އީވާ ސަލާމް ފޮނުއްވާތާ ދެ ވަނަ ހަފުތާ އެވެ.
ޖަލްސާ ކެންސަލް ކުރިކަން މަޖިލީހުގެ މެމްބަރުންނަށް މެސެޖަކުން އެންގީ ހެނދުނު 7:00 ހާއިރު އެވެ.
މަޖިލީހުގެ އިދާރާއިން ފޮނުވި އެ މެސެޖުގައި ބުނެފައި ވަނީ "މިއަދުގެ ޖަލްސާ އަށް މަޖިލީހުގެ ނައިބު ރައީސް ސަލާމް ފޮނުއްވާފައިވާތީ، އެ ޖަލްސާ ކެންސަލް ކުރެވުނު ވާހަކަ ދަންނަވަން،" ކަމަށެވެ.
ނަޝީދު ވަކިކުރުމުގެ މައްސަލަ ފުރަތަމަ އެޖެންޑާކުރީ އޮކްޓޯބަރު 29 ވަނަ ދުވަހަށެވެ. އެ ދުވަހުން ފެށިގެން މައްސަލަ އެޖެންޑާކުރި އެއްވެސް ޖަލްސާއެއް ކުރިއަށް ގެންދެވިފައި ނުވަނީ އީވާ އަށް ޑެންގޫ ހުން ޖެހި، އާލާސްކަންފުޅު ރަނގަޅު ނުވާކަމަށް ވިދާޅުވެ، ސަލާމް ފޮނުއްވަމުން ގެންދަވާތީ އެވެ.
ރައްޔިތުންގެ މަޖިލީހުގެ މަސައްކަތް ހުއްޓިފައިވާއިރު، އީވާގެ އާލާސްކަފުޅު ރަނގަޅު ނުވެ ދިގުލައި ދަނީ ކީއްވެގެން ކަމެއް، އަދި ހޯދަމުން ގެންދާ ފަރުވާގެ އިތުރު މައުލޫމާތެއް އީވާގެ ފަރާތުން އަދި ރައްޔިތުންގެ މަޖިލީހުގެ އިދާރާއިން ވެސް ހާމައެއް ނުކުރެ އެވެ.
އެކަމާ ގުޅޭ ގޮތުން އަދަދު ނޫހުން އީވާއާ ސުވާލު ކުރުމުން، އަދި ރައްޔިތުންގެ މަޖިލީހުގެ އިދާރާއާ ސުވާލު ކުރުމުން ވެސް ޖަވާބެއް ނުދެއްވަ އެވެ.
އީވާ ޑޮކްޓަރަށް ދައްކައި ލޭގެ ޓެސްޓުތައް ހަދާފައިވަނީ އޮކްޓޯބަރު 23 ގަ އެވެ. ނަމަވެސް ޖެހިގެން އައި ދުވަހު އީވާ މަޖިލީހަށް ވަޑައިގެން ޖަލްސާގެ ރިޔާސަތު ބެލެހެއްޓެވި އެވެ.
ރައްޔިތުންގެ މަޖިލީހުގެ މެޖޯރިޓީ ލީޑަރު މުހައްމަދު އަސްލަމް ވިދާޅުވެފައި ވަނީ އާލާސްކަންފުޅާ އުޅުއްވަމުން އޮކްޓޯބަރު 24 ވަނަ ދުވަހުގެ ޖަލްސާއަށް ވަޑައިގެންނެވި ކަމީ ކަންބޮޑުވެވަޑައިގަންނަވާ ކަމެއް ކަަމަށެވެ.
މަޖިލީހުގެ އެމްޑީޕީގެ މެމްބަރުން ތުހުމަތު ކުރައްވާ ގޮތުގައި ސަބަބެއް ދައްކަވައިގެން އީވާ ޖަލްސާތަކުގައި ބައިވެރިވެވަޑައިނުގަންނަވަނީ ނަޝީދު ވަކިކުރުން ދިގު ދެންމުމަށެވެ.
އެމްޑީޕީން ބުނެފައިވަނީ މަޖިލީހުގައި އެހެން މަސައްކަތެއް ކުރިއަށް ގެންދެވޭނީ، މަޖިލީހުގެ ގަވާއިދު އޮތް ގޮތުން ނަޝީދު ވަކިކުރުމުގެ މައްސަލައަށް ގޮތެއް ނިންމުމަށް ފަހު އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓު މަޖިލީހަށް ފޮނުވާފައި އޮތަސް، ބަޖެޓު މަޖިލީހުގެ ތަޅުމަށް ހުށަހަޅައި ދިރާސާކުރުމުގެ މަސައްކަތް ނުފެށި އޮތީ ނަޝީދު ވަކިކުރުމުގެ މައްސަލަ ހުއްޓިފައި އޮތުމުންނެވެ.
ނަޝީދުގެ އިތުބާރު ނެތް ކަމުގެ މައްސަލަ އެޖެންޑާކުރި ޖަލްސާ ނުބޭއްވީ ގަވާއިދާ ހިލާފަށް ކަމަށް ބުނެ ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުންތައް މާދަމާ ހެނދުނު 9:45 ގައި ފެށުމަށް ވަނީ ތާވަލުކޮށްފަ އެވެ.
