ބަންގްލަދޭޝްގެ ސަރުކާރާއި އެ ގައުމުގެ އިދިކޮޅު ޕާޓީއާ ދެމެދު ނުތަނަވަސްކަން އިތުރުވެފައި ވަނިކޮށް އިދިކޮޅު ލީޑަރު އަދި ބަންގްލަދޭޝް ނެޝަނަލިސްޓް ޕާޓީ (ބީއެންޕީ) ގެ ސެކްރެޓަރީ ޖެނެރަލް މިރްޒާ ފަހުރުލް އިސްލާމް އަލަމްގީރް ހައްޔަރުކުރުމާ ގުޅިގެން އެ ގައުމުގައި ބޮޑެތި މުޒާހަރާތަކެއް ފަށައިފި އެވެ.
އާދިއްތަ ދުވަހުގެ ވަގުތެއްގައި އަލަމްގީރްގެ އިތުރުން އެ ގައުމުގެ އެހެން ސިޔާސީ އިސް ލީޑަރުންތަކެއް ވެސް ހައްޔަރުކޮށްފަ އެވެ.
އެއާއެކު, މަގުތަކަށް ނުކުމެ ބީއެންޕީ އާއި އެ ޕާޓީއާ ގުޅިފައިވާ ޕާޓީތަކުން ކުރަމުންދާ މުޒާހަރާތައް ހަމަނުޖެހުންތަކަށް ބަދަލުވެ ދެ މީހުން ވަނީ މަރުވެފަ އެވެ. އެ މުޒާހަރާތަކުގައި ގޮވާލަމުން ދަނީ ބަންގްލަދޭޝްގެ ބޮޑުވަޒީރު ޝެއިހް ހަސީނާގެ އިސްތިއުފާ އަށެވެ.
ޖެނުއަރީ މަހުގެ ތެރޭގައި ބާއްވަން ޖެހޭ އިންތިހާބުތަކުގެ ކުރިން އިންތިގާލީ ސަރުކާރެއް ގެނައުމަށް އިދިކޮޅު ޕާޓީތަކުން ދަނީ ޑިމާންޑް ކުރަމުންނެވެ.
ޑާކާގައި ބޭއްވި މައި މުޒާހަރާއަށް އެތައް ހާސް ބަޔަކު ދިޔަ ކަމަށް ބެލެވޭއިރު އެއީ އެގައުމުގެ ސަރުކާރާ ދެކޮޅަށް މި ފަހުގެ ދަހަރުތަކުގައި ބޭއްވި އެންމެ ބޮޑު އެއްވުމެވެ. އެ އެއްވުން ހަމަނުޖެހުމަކަށް ބަދަލުވެ ފުލުހުންނާއި ކުރިމަތިލާން ފެށުމުން ރަބަރު އުންޑަ ވެސް ޖަހާފައިވެ އެވެ. އޭގެ ރައްދުގައި މުޒާހަރާ ކުރި މީހުން ވެސް ގަލާއި އެހެނިހެން ތަކެތި ވަނީ އުކާފަ އެވެ.
ފުލުހުން އަދި އިދިކޮޅު ޕާޓީތަކުން ވެސް މި ހަމަނުޖެހުމުގެ ޒިންމާ އަޅުވަމުންދަނީ އެކަކު އަނެކެއްގެ ބޮލުގަ އެވެ.
އަނިޔާވެރި ގޮތަކަށް މުޒާހަރާތައް ރޫޅާލުމާ ގުޅިގެން ތިން ދުވަހުގެ މުއްދަތަށް މަދަނީ ބަސްނޭހުމެއް އިދިކޮޅު ޕާޓީތަކުގެ އިސްނެގުމަށް ވަނީ ފަށާފަ އެވެ.
