ޔޫކްރެއިނުން އުފައްދާ އަސްކަރީ ޑްރޯން އެމެރިކާއަށް އެކްސްޕޯޓް ކުރުމަށާއި، އެމެރިކާގެ ޕެންޓަގަންއިން ކުރިއަށްގެންދާ "ޑްރޯން ޑޮމިނެންސް" ޕްރޮގްރާމްގައި ބައިވެރިވުމަށް ޔޫކްރެއިނުން އެއްބަސްވެއްޖެ އެވެ.
ރަޝިއާ އާ ދެކޮޅަށް ކުރަމުންދާ ހަނގުރާމައިގައި ޔޫކްރޭންގެ އަންމޭންޑް އޭރިއަލް ވެހިކަލް (ޔޫއޭވީ) ތަކުން ހޯދަމުންދާ ކާމިޔާބީތަކުގެ ސަބަބުން، އެ ގައުމުގެ ތަޖުރިބާއިން ދަސްކުރުމަށާއި ޓެސްޓްކުރުމަށް ޑްރޯން ގަންނަން ބޭނުންވާ ގައުމުތަކުގެ އަދަދު ވަނީ ވަރަށް ބޮޑަށް އިތުރުވެފަ އެވެ.
ޔޫކްރެއިންގެ ހަ ކުންފުންޏަކަށް ވަނީ ކޮންމެ ކުންފުންޏަކުން ގާތްގަނޑަކަށް 100 ޑްރޯން އެކްސްޕޯޓް ކުރުމުގެ ހުއްދަ ދީފަ އެވެ. ނަމަވެސް، މިކަމާ ގުޅޭގޮތުން ކީވް ނުވަތަ ވޮޝިންގްޓަންއިން އަދި ރަސްމީކޮށް އެއްޗެއް ބުނެފައެއް ނުވެ އެވެ.
ޔޫކްރެއިނުން މިހާރުވެސް ވަނީ ޔޫރަޕާއި މެދުއިރުމަތީގެ ބައެއް ގައުމުތަކާއެކު ޑްރޯން ފޯރުކޮށްދިނުމުގެ އެއްބަސްވުންތަކުގައި ސޮއިކޮށްފަ އެވެ.
ހަނގުރާމައިގެ ހާލަތާ ގުޅިގެން ހަތިޔާރު ބޭރަށް ފޮނުވުމަށް އަޅާފައިވާ ބައެއް ފިޔަވަޅުތަކަށް ސަރުކާރުން ލުއިދޭން ފަށާފައިވީ ނަމަވެސް، ގައުމުން ބޭރަށް ފޮނުވާ ތަކެތި އަދިވެސް ބަލަހައްޓަމުންދަނީ ސަރުކާރުގެ ސީދާ ބެލުމުގެ ދަށުންނެވެ.
"ޑްރޯން ޑޮމިނެންސް" އަކީ އެމެރިކާގެ ޑިފެންސް ޑިޕާމްޓަންޓުން ކުރިއަށްގެންދާ ބިލިއަން ޑޮލަރުގެ ޕްރޮގްރާމެކެވެ. މިއީ ހަނގުރާމައިގެ މައިދާނުގައި ދިމާވާ އުނދަގޫ ހާލަތްތައް ސިމިއުލޭޓްކޮށް، ގޭމިންގެ ތެރެއިން ކުދި ހަމަލާދޭ ޑްރޯންތަކުގެ ގާބިލުކަން ވަޒަންކުރުމަށް ތަފާތު އުފެއްދުންތެރިން ބައިވެރިކޮށްގެން ހިންގާ ޕްރޮގްރާމެކެވެ.
