މިހާރު ކުރިއަށްދާ އިންޓަ ސްކޫލް ވޮލީބޯޅަ މުބާރާތުގައި އަތޮޅުތަކުން ވާދަކުރަމުން އަންނަ ޓީމްތަކުގެ ތެރެއިން ފ. އަތޮޅު މަދަރުސާ، ވ. ކެޔޮދޫ ސްކޫލް، އަދި އދ. ކުނބުރުދޫ ސްކޫލްގެ ހުރިހާ ޓީމެއް ސެމީ ފައިނަލުން ޖާގަ ހޯދައިފި އެވެ.
19 ސްކޫލަކުން ވާދަކުރަމުން އަންނަ މި މުބާރާތުގައި ފ. ފީއަލީގެ ފ. އަތޮޅު މަދަރުސާގެ ހަތަރު ޓީމެއް އަންނަނީ ވާދަކުރަމުންނެވެ. މިގޮތުން 14 އަހަރުން ދަށުގެ ފިރިހެން ބައިގެ ގްރޫޕްގެ އެއް ވަނަ ހޯދައި އެ ސްކޫލްގެ ޓީމް ވަނީ ފައިނަލުން ފުރުސަތު ހޯދައިފަ އެވެ. ފައިނަލުގައި އެ ޓީމާ ދެކޮޅަށް ނުކުންނާނީ ކެޔޮދޫ ސްކޫލެވެ. މި ބައިގެ ތިން ވަނަ ލިބުނީ މުހިއްދީން ސްކޫލަށެވެ.
14 އަހަރުން ދަށުގެ އަންހެން ބައިގައި ފ. އަތޮޅު މަދަރުސާއިން ވަނީ ގްރޫޕް ބީގެ އެއް ވަނަ ހޯދާފަ އެވެ. ސެމީ ފައިނަލުގައި އެޓީމާ ދެކޮޅަށް ނުކުންނާނީ ތާޖުއްދީން ސްކޫލެވެ. މި ބައިގެ އަނެއް ސެމީ ފައިނަލުގައި ތ. މަޑިފުށި ސްކޫލް ނުކުންނާނީ ކެޔޮދޫ ސްކޫލާ ދެކޮޅަށެވެ.
16 އަހަރުން ދަށުގެ ބައިގައި ފ. އަތޮޅު މަދަރުސާގެ ފިރިހެން ޓީމް ސެމީގެ ޖާގަ ހޯދީ ގްރޫޕްގެ ދެ ވަނަ ހޯދައިގެންނެވެ. އެޓީމް ސެމީގައި ނުކުންނާނީ އދ. އަތޮޅު މަދަރުސާއާ ދެކޮޅަށެވެ. މިބައިގެ އަނެއް ސެމީ ފައިނަލުގައި ކުނބުރުދޫ ސްކޫލް ނުކުންނާނީ ކެޔޮދޫ ސްކޫލާ ދެކޮޅަށެވެ.
16 އަހަރުން ދަށުގެ އަންހެން ބަޔަށް ބަލާއިރު، ފ. އަތޮޅު މަދަރުސާ ވަނީ ގްރޫޕް އޭގެ އެއް ވަނަ ހޯދާފަ އެވެ. އެ ޓީމް ސެމީގައި ނުކުންނާނީ ކެޔޮދޫ ސްކޫލާ ދެކޮޅަށެވެ. މި ބައިގެ އަނެއް ސެމީ ފައިނަލްގައި ކުނބުރުދޫ ސްކޫލް ނުކުންނާނީ އިމާދުއްދީން ސްކޫލާ ދެކޮޅަށެވެ.
19 ސްކޫލަކުން 42 ޓީމް ވާދަކުރަމުން އަންނަ ސްކޫލް މުބާރާތުގެ ސެމީ ފައިނަލް މެޗުތައް މިއަދު ހަވީރާއި، މިރޭ ކުޅޭނެ އެވެ. ފައިނަލް މެޗުތައް އޮންނާނީ މާދަމާ އެވެ.
