ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހަޅާފައިވާ ގަރާރު މަޖިލީހުގެ މާދަމާގެ ޖަލްސާއަށް ވެސް އެޖެންޑާކޮށްފި އެވެ.
މާދަމާގެ ޖަލްސާގެ އެޖެންޑާ މަޖިލީހުގެ އިދާރާއިން މެމްބަރުންނަށް ފޮނުވާފައި ވާއިރު އެ އެޖެންޑާގައި އޮތީ ނަޝީދު ވަކިކުރުމުގެ ގަރާރުގެ މަސައްކަތް އެކަންޏެވެ. އެ ގަރާރުގެ މަސައްކަތް މިއަދުގެ ޖަލްސާއަށް ވެސް އެޖެންޑާކުރި އެވެ.
ނަޝީދު ވަކިކުރުމުގެ ގަރާރު މިއަދަށް އެޖެންޑާކުރި ނަމަވެސް އެ ޖަލްސާ ނުބޭއްވީ މަޖިލީހުގެ ނައިބުރައީސް އީވާ އަބްދުﷲ އަށް ނޫނީ އެ ޖަލްސާގެ ރިޔާސަތު ނުބެލެހެއްޓޭނެ ކަމަށް މަޖިލީހުގެ ނުދެކޭތީ އެވެ. މިއަދުގެ ޖަލްސާ ކެންސަލް ކުރިކަން އިއުލާނު ކުރައްވަމުން މަޖިލީހުގެ އަމީންއާންމު ފާތިމަތު ނިއުޝާ ވިދާޅުވީ މިއަދުގެ ޖަލްސާ ކެންސަލްކުރަން ޖެހުނީ ނައިބު ރައީސް އީވާ އަބްދުﷲ ސަލާމުގައި ހުންނެވުމުން ކަމަށެވެ.
މަޖިލީހަށް ސަލާމް ފޮނުއްވި ސިޓީގައި އީވާ ވިދާޅުވީ އާލާސްކަންފުޅާ އުޅުއްވާ ކަމަށެވެ. އެކަން އަންގައިދޭ މެޑިކަލް ސެޓްފިކެޓް ވެސް އެ ސިޓީއާ އެކު އޭނާ ފޮނުއްވި އެވެ.
މަޖިލީހުގެ ނައިބު ރައީސްއަށް ވަޑައިނުގެންނެވުނު ނަމަވެސް އެ ޖަލްސާ ބޭއްވޭނެ ކަމަށް ކަނޑައަޅައިދޭން އެދި އެމްޑީޕީން މިހާރު ވަނީ އެ މައްސަލަ ސުޕްރީމް ކޯޓަށް ހުށަހަޅައިފަ އެވެ.
ރައްޔިތުންގެ މަޖިލީހުގެ ރައީސާއި ނައިބު ރައީސަށް ވެސް ވަޑައިނުގެންނެވޭ ހާލަތްތަކުގައި ޖަލްސާތަކުގެ ރިޔާސަތު ބަލަހައްޓާނެ ގޮތެއް މަޖިލީހުގެ ގަވާއިދުގެ 44 ވަނަ މާއްދާގައި އޮވެ އެވެ. މިހާރު ދިމާވެގެން އުޅޭ މައްސަަލައަކީ މަޖިލީހުގެ ގަވައިދުގެ 205 ވަނަ މާއްދާގެ ބ. ގައި ރައްޔިތުންގެ މަޖިލީހުގެ ރައީސް މަގާމުން ވަކިކުރުމަށް ހުށަހަޅައިފައިވާ މައްސަލައަށް ގޮތެއް ނިންމުމުގެ ޖަލްސާގެ ރިޔާސަތު ބަލަހައްޓަން ޖެހޭނީ ނައިބު ރައީސް ކަމަށް އޮންނަ އޮތުމަށް އެކަނި ރިއާޔަތްކޮށް ޖަލްސާ ނުބޭއްވުމުގެ މައްސަލަ އެވެ.
އެމްޑީޕީން އެދުނީ ރައްޔިތުންގެ މަޖިލީހުގެ ނާއިބު ރައީސް ހާޒިރުނުވާ ހާލަތުގައި ރައްޔިތުންގެ މަޖިލީހުގެ ގަވާއިދުގެ 44 ވަނަ މާއްދާގައިވާ ގޮތުގެ މަތީން މަޖިލީހުގެ ރިޔާސަތު ބަލަހައްޓާނޭ މީހަކު ކަނޑައަޅައި، ރައްޔިތުންގެ މަޖިލީހުގެ ރައީސް މަގާމުން ވަކިކުރުމުގެ ޖަލްސާ ކުރިއަށް ގެންދަންޖެހޭނޭ ކަމަށް ސުޕްރީމް ކޯޓުން ކަނޑައަޅައި ދިނުމަށެވެ.
