މެންޗެސްޓާ (އޮކްޓޯބަރު 26) - މެންޗެސްޓާ ޔުނައިޓެޑުން އެ ޓީމްގެ ކުރީގެ ކީޕަރު ޑޭވިޑް ޑެހެއާ އަލުން ސޮއިކުރަން އުޅޭކަމުގެ އަޑު ފެތުރިއްޖެ އެވެ.
ޔުނައިޓެޑަށް 12 އަހަރު ކުޅުމަށްފަހު ޑެހެއާ ޔުނައިޓެޑް ދޫކޮށްލީ މިދިޔަ ސީޒަނަށް ފަހުގަ އެވެ. އޭނާގެ ކޮންޓްރެކްޓް އާކުރަން ކުރިން ޔުނައިޓެޑުން މަސައްކަތްކުރި ނަމަވެސް މުސާރަ ކުޑަކުރަން ޑެހެއާ އެއްބަސްނުވުމުން އެ ކުލަބުން ނިންމީ ސްޕެއިންގެ ގޯލްކީޕަރު ދޫކޮށްލާށެވެ.
ދެހާސް އެގާރައިން ފެށިގެން މިއަހަރުގެ ޖުލައި މަހާ ހަމައަށް ޔުނައިޓެޑަށް ކުޅުނު ޑެހެއާ މިވަގުތު ހުރީ ކުޅޭނެ ކުލަބެއް ނެތިފަ އެވެ. ސައުދީ އަރަބިއްޔާގެ އިތުރުން އެމެރިކާގެ ލީގުގެ ބައެއް ކުލަބުތަކުން ހުށަހެޅުން ލިބުނު ނަމަވެސް ޑެހެއާ ބޭނުންވީ ޔޫރަޕްގެ ބޮޑު ކުލަބަކަށް ކުޅެން މަޑުކުރާށެވެ.
ޑެހެއާ އަލުން ހޯދަން ޔުނައިޓެޑުން ވިސްނަމުން އަންނަ ސަބަބަކީ އެކުލަބުގެ މިހާރުގެ އެއްވަނަ ކީޕަރު އަންދްރޭ އޮނާނާ ޖެނުއަރީ މަހު ގައުމީ ޓީމާއިއެކު އެފްރިކަން ކަޕް އޮފް ނޭޝަންސްގައި ކުޅެން ޖެހޭތީ އެވެ. އަންނަ ޖެނުއަރީ މަހުގެ 13 އިން ފެބްރުއަރީ 11 އަށް ކުރިއަށްދާ މުބާރާތުގައި ކުޅޭ ސެނެގާލް ޓީމުގެ ގޯލްކީޕަރަށް ޔުނައިޓެޑްގެ އަށް މެޗެއް ގެއްލޭނެ އެވެ.
މިވަގުތު ޔުނައިޓެޑުގައި ބާކީ ތިބި ދެ ކީޕަރުންނަށް ބަލާއިރު، އަނިޔާގެ މައްސަލަތަކުގެ ސަބަބުން ޓޮމް ހީޓަންއަށް މި ސީޒަންގައި މާ ގިނަ މެޗުތެއް ކުޅެވޭނެކަމަށް ނުބެލެވެ އެވެ. ދެން ހުރި ތުރުކީގެ ކީޕަރު އަލްޓޭ ބަޔިންދީރު އެވެ.
ޔުނައިޓެޑުން އަލުން ޑެހެއާ ސޮއިކުރަން ބޭނުންވަނީވެސް ކުޑަ މުސާރައަކަށެވެ. މިކަމާ ގުޅޭގޮތުން އެކުލަބުން ޑެހެއާއިއެކު ވަރަށް އަވަހަށް މަޝްވަރާތައް ފަށާނެކަމަށް އިނގިރޭސި މީޑިއާތަކުން ރިޕޯޓްކުރެ އެވެ.
ކުލަބުގެ ކޮންޓްރެކްޓް ހަމަވެ ކުޅޭނެ އެހެން ކުލަބެއް ނެތިފައި ހުރި ނަމަވެސް ޑެހެއާ ދިރިއުޅެމުން އަންނަނީ މެންޗެސްޓާގަ އެވެ. އެކުލަބުގެ ކުޅުންތެރިންނާއިއެކު ޑެހެއާއާ ގާތް ގުޅުމެއް އޮންނައިރު ޔުނައިޓެޑްގެ އަންހެން ފުޓްބޯޅަ ޓީމްގެ މެޗުތައް ބަލަންވެސް އޭނާ ދަނޑަށް ދެ އެވެ.
