އިޒްރޭލުން ފަލަސްތީނުގައި ހިންގަމުން ގެންދާ ލާއިންސާނީ ގަތުލްއާމުގެ ހަބަރުތައް ގެނެސްދިނުމަށް ގާޒާގައި ހަރަކާތްތެރިވަމުންދާ ނޫސްވެރިންނާއި އެމީހުންގެ އާއިލާތަކަށް އަމާޒުކޮށް އިޒްރޭލުން ވަރުގަދަ ހަމަލާތަކެއް ދީފި އެވެ.
މި މަހުގެ ހަތެއްގައި ފަލަސްތީނުގެ ހަމާސް ޖަމާއަތުން ދިން ހަމަލާތަކުގެ ބަދަލުގައި ހަނގުރާމަ އިއުލާންކޮށް، ވޭތުވެދިޔަ 75 އަހަރު އިޒްރޭލުން ހިންގަމުންދާ ގަތުލްއާމު ވަރުގަދަކޮށް ދެމުންދާ ހަމަލާތަކުގައި މީގެ ކުރިންވެސް ނޫސްވެރިންނަށް ހަމަލާތަކެއް އަމާޒުވިއިރު، ފާއިތުވެދިޔަ ދެ ދުވަސް ވެގެން ގޮސްފައިވަނީ ފާހަގަކޮށްލެވޭ ވަރަކަށް ނޫސްވެރިންނަށް 'ޓާގެޓު' ކުރި ދެ ދުވަހަށެވެ.
އެގޮތުން ގާޒާގައި ހަރަކާތްތެރިވާ ގަތަރުގެ އަލްޖަޒީރާ ނޫހުގެ ޓީމު ލީޑުކުރާ ވާއިލް އަލް ދާއުދޫގެ އާއިލާއަށް އަމާޒުކޮށް، އެމީހުން ތިބި ނުސްރަތު ރެފިއުޖީ ކޭމްޕަށް ދިން ހަމަލާގައި އޭނާގެ އަންހެނުންނާއި ދެ ދަރިން އަދި ކާފަ ދަރިޔަކު ވަނީ ޝަހީދުކޮށްލާފަ އެވެ.
އަލްޖަޒީރާއިން މި ހަމަލާ ސިފަކުރީ އިޒްރޭލުން ފަލަސްތީނުގެ ނޫސްވެރިންގެ އަޑު ކަނޑުވާލުމަށް ހިންގި އަމަލެއްގެ ގޮތުގަ އެވެ. ސޯޝަލް މީޑިއާގައި ދައުރުވަމުންދާ ވީޑިއޯއެއްގައި ވާއިލް ވިދާޅުވީ އިޒްރޭލުން ނޫސްވެރިންގެ އާއިލާތަކަށް ހަމަލާދެނީ ބަދަލުހިފުމުގެ ރޫހުގައި ކަމަށެވެ.
އޭނާގެ އާއިލާ ތިބި ގެއަށް ހަމަލާދިންކަމުގެ ހަބަރު ލިބުނީވެސް އިޒްރޭލުން ދެމުންދާ ހަމަލާތަކުގެ ހަބަރުތައް ރިޕޯޓުކުރަމުންދަނިކޮށެވެ. ހަމަލާއަށް ފަހު އެއާއިލާގެ އެތައް ބަޔަކަށް ވީނުވީއެެއް އަދި ނުވެސް އެނގެ އެވެ.
އޭގެއިތުރުން، އިޒްރޭލުން އިއްޔެ ވަނީ ރާމަﷲ ގައި ހަރަކާތްތެރިވާ ނޫސްވެރިޔާ މުހައްމަދު ފަރާގެ އާއިލާއަށް ހަމަލާދީ އޭނާގެ އަނބިދަރިންވެސް ވަނީ ޝަހީދުކޮށްލާފަ އެވެ.
މި މަހުގެ ހަތަކުން ފެށިގެން މިއަދާ ހަމައަށް އިޒްރޭލުން ވަނީ ފަލަސްތީނުގެ 25 އަށްވުރެ ގިނަ ނޫސްވެރިން ޝަހީދުކޮށްލާފަ އެވެ. އެގޮތުން އިއްޔެ އިޒްރޭލުން ދިން ހަމަލާއެއްގައި އިތުރު ނޫސްވެރިޔަކު ޝަހީދުވާ ވީޑިއޯއެއްވެސް ސޯޝަލް މީޑިއާގައި ދަނީ ދައުރުވަމުންނެވެ.
އިޒްރޭލުން މީގެ ކުރިންވެސް ވަނީ ފަލަސްތީނުގެ ގިނަ ނޫސްވެރިންތަކެއް ޝަހީދުކޮށްލާ ހައްޔަރުކޮށްފަ އެވެ. އެގޮތުން 2021 ގައި ބަޑި ޖަހާ މަރާލި އަލްޖަޒީރާގެ ޝިރީން އަބޫ އަހްލޭގެ މަރު އިޒްރޭލުން ފުރަތަމަ ދޮގު ކުރި ނަމަވެސް ފަހުން ވަނީ އެ އަމަލު ހިންގީ އިޒްރޭލުގެ ސިފައިންކަމަށް އެއްބަސްވެފަ އެވެ.
ގާޒާއިން ކަރަންޓު ކަނޑާލާ އެހީ ފޯރުކުރުން އެކީހެން އިޒްރޭލުން ހުއްޓުވާފައިވާއިރު، ގާޒާގައި މިހާރު ތިބި ނޫސްވެރިންނަށް އެކަމުގެ ސަބަބުން ދަނީ ގިނަ ދަތިތަކެއް ކުރިމަތިވަމުންނެވެ.
މި މަހުގެ ހަތްވަނަ ދުވަހު ފެށި މި ހަމަލާތަކުގައި ފަލަސްތީނުގެ 6،546 އަށްވުރެ ގިނަ މީހުން ވަނީ ޝަހީދުކޮށްލާފަ އެވެ.
އެ ދުވަހުން ފެށިގެން ހަމާސްއިން ދިން ހަމަލާތަކުގައި މިހާތަަނަށް އިޒްރޭލުން 1400 އަށްވުރެ ގިނަ މީހުން ވަނީ މަރުވެފަ އެވެ. އޭގެ ތެރޭގައި 300 ސިފައިން ހިމެނެ އެވެ.
