ބޭންކް އޮފް މޯލްޑިވްސް ގެ އޮންލައިން އެޕޮއިންޓްމަންޓް ޕޯޓަލްގައި އިތުރު ފީޗާސްތަކެއް ހިމަނައިފި އެވެ.
ބީއެމްއެލް މައުލޫމާތު ދޭ ގޮތުގައި މި ޕޯޓަލް އަށް ގެނެވުނު ބަދަލުތަކާއެކު ބޭންކުގެ ބްރާންޗްތަކާއި އަދި ސާވިސް ސެންޓަރުން ހިދުމަތް ހޯދުމަށް ފަސޭހަކަމާއެކު އެޕޮއިންޓްމަންޓް ހޯދުމަށް އިތުރު ފަސޭހަތަކެއް ވާނެ އެވެ.
އެގޮތުން ކަސްޓަމަރުންނަށް މިހާރު ބީއެމްއެލް އަދި ބީއެމްއެލް އިސްލާމިކްގެ ހިދުމަތްތައް ހޯދުމަށް އެޕޮއިންޓްމަންޓް ހަމަޖެއްސުމަށް ކުރިޔަށް އޮތް 10 ދުވަހަށް އެޕޮއިންޓްމަންޓް ލިބެންހުރި ތާރީގާއި ގަޑި ފަސޭހަކާއެކު ޕޯޓަލް މެދުވެރިކޮށް ބަލާލެވޭނެ ކަމަށް ބޭންކުން ބުންޏެވެ.
އަދި ޕާސަނަލް ކަސްޓަމަރުންނަށް ލޯނަށް އެދި ހުށަހެޅުމަށާއި ބީއެމްއެލް ގެ ޓީމާއި ބައްދަލުކޮށް ލޯނު އަދި ފައިނޭންސިންގެ މައުލޫމާތު ސާފުކުރުމަށް ވެސް މިހާރު އެޕޮއިންޓްމަންޓް ހަމަޖެއްސޭނެ އެވެ.
އޭގެ އިތުރުުން ބިޒްނަސް ކަސްޓަމަރުންނަށް ބޭންކް އެކައުންޓް ހުޅުވުމާއި، ލޯނު އަދި ފައިނޭންސިން އަށް އެދި ހުށަހެޅުމާއި ލޯނާއި ފައިނޭންސިން އާ ގުޅޭ މައުލޫމާތު ސާފުކުރުމަށް ބީއެމްއެލްގެ ސްޕެޝަލިސްޓް ޓީމާ ބައްދަލުކުރުމަށް ވެސް އެޕޮއިންޓްމަންޓް ހަމަޖެއްސޭނެ ކަމަށް ބީއެމްއެލް އިން ބުންޏެވެ.
