ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކި ކުރަން، އެމްޑީޕީގެ ޕާލަމެންޓަރީ ގްރޫޕުގެ 48 މެމްބަރުންގެ ސޮޔާއެކު ހުށަހަޅާފައިވާ މައްސަލާގައި މަޖިލީހުގައި ޖަވާބުދާރީވާން އެމަނިކުފާނަށް 30 މިނަޓުގެ ފުރުސަތެއް ދިނުމަށް މަޖިލީހުގެ އާންމު ކޮމިޓީން ފާސްކޮށްފި އެވެ.
ރައްޔިތުންގެ މަޖިލީހުގެ އާންމު ކޮމިޓީން މިއަދު ބޭއްވި ބައްދަލުވުމުގައި ފާސްކޮށްފައިވަނީ ފުނަދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި ހުށަހެޅުއްވުމެވެ. ޝާހިދުގެ ހުށަހެޅުއްވުމަކީ އިތުބާރުނެތްކަމުގެ މައްސަލާގެ ޖުމްލަ ބަހުސަށް ދެގަޑިއިރު ކަނޑައަޅައިބަހުސް ފެށުމާއި ނިންމުން އަދި މެދުތެރެއިން 10 މިނަޓުގެ ތިން ފުރުސަތު، މައްސަލަ ރައްދުވާ މަޖިލީހުގެ ރައީސަށް ޖަވާބުދާރީ ވެވަޑައިގަންނަވަން އެރުވުމަށެވެ.
ބަހުސްގެ ބާކީ އޮތް ދޮޅު ގަޑިއިރަކީ މަޖިލީހުގެ އަމިއްލަ އަދި ސިޔާސީ ޕާޓީތަކުގެ މެންބަރުން ބަހުސްކުރުމަށް އޮތް ވަގުތެވެ. އާންމު ކޮމިޓީން ފާސްކުރި ގޮތުން އެ ވަގުތު ޕާޓީތަކަށް ބެހިގެންދާނީ މެންބަރުން ތިބި ނިސްބަތުންނެވެ. ކޮންމެ މެންބަރަކަށްވެސް ލިބޭނީ ތިން މިނަޓުގެ އެއް ފުރުސަތެވެ.
އެ ހުށަހެޅުން ފާސްކުރީ ހާޒިރުވެވަޑައިގެންނެވި ހަ މެންބަރުންގެ ތެރެއިން ހަތަރު މެންބަރެއްގެ ތާއީދާއެކު އެވެ. ހުށަހެޅުމާ ދެކޮޅަށް ވޯޓު ދެއްވީ ނަޝީދު ނިސްބަތްވެވަޑައިގަންނަވާ ޑިމޮކްރެޓްސްގެ ދެ މެންބަރުން ކަމަށްވާ މެދުހެންވޭރު ދާއިރާގެ މެންބަރު އަލީ އާޒިމް އަދި އައްޑޫ ހުޅުދޫ ދާއިރާގެ މެންބަރު އިލްޔާސް ލަބީބެވެ.
ކޮމިޓީގައި މެމްބަރު އިލްޔާސް އަދި މެމްބަރު އާޒިމްވެސް އެދިވަޑައިގެންނެވީ ގަޑި ކަނޑައެޅިގެންދާއިރު، ދެ ގަޑިއިރަކީ ރިޔާސަތުން ދޭ ޖަވާބު ކެނޑުމަށްފަހު ގުނޭ ވަގުތު ކަމަށް ކަނޑައެޅުމަށެވެ. އެކަމަކު ކޮމިޓީގައި ތިއްބެވި އެމްޑީޕީގެ މެންބަރުން ވިދާޅުވީ އެ ހުށަހެޅުމަކީ މަޖިލީހުގެ ގަވާއިދާ ފުށުނާރާ ހުށަހެޅުމެއް ކަމަށެވެ.
ނަޝީދު ވަކިކުރަން އެމްޑީޕީން ހުށަހެޅި މިއީ ދެވަނަ ފަހަރެވެ. މިފަހަރުގެ ހުށަހެޅުން ބަލައިގަންނަން ދަތި ކަމަށް އެމަނިކުފާނު ފުރަތަމަ ވިދާޅުވި އެވެ.
ރައްޔިތުންގެ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި ނަޝީދު ވިދާޅުވީ އެމަނިކުފާނުގެ އިތުބާރު ނެތްކަމުގެ މައްސަލައެއް ދެން ކުރިއަށް ގެންދެވޭނެ ކަމަށް ބެލެވެނީ އަންނަ ދައުރުގައި ކަމަށެވެ. އެއީ މީގެ ކުރިން އެފަދަ މައްސަލައެއް މި ދައުރުގައި ހުށަހަޅައި، އަނބުރާ ގެންގޮސްފައިވާތީ ކަމަށް ނަޝީދު ވިދާޅުވި އެވެ.
އެހެން ނަމަވެސް އެ މައްސަލަ ބަލައިގަންނާނެ ކަމަށް މަޖިލީހުގެ އިދާރާއިން ފަހުން ބުންޏެވެ..
ރައްޔިތުންގެ މަޖިލީހުގެ ރައީސްގެ އިތުބާރުގެ ނެތްކަމުގެ މައްސަލައެއް ހުށަހަޅާ ނަމަ ކަންތައް ކުރަންވީ ގޮތް އެ މަޖިލީހުގެ ގަވާއިދުގެ 205 ވަނަ މާއްދާގެ ދަށުން ލިޔެފައިވާ އަށް ނުކުތާއެއްގައި ބަޔާންކޮށްފައިވާއިރު، އެއް ދައުރެއްގައި ދެ ފަހަރަށް އެފަދަ ގަރާރެއް ހުށަނޭޅޭނެ ކަމަށް ބުނެފައެއް ނެތެވެ.
ނަޝީދުގެ އިތުބާރު ނެތްކަމަށް އެމްޑީޕީން ފުރަތަމަ ހުށަހެޅި މައްސަލަ އަނބުރާ ނެގީ ނަޝީދު އެ މައްސަލަ އެޖެންޑާ ކުރެއްވި ފަހުންނެވެ. އެ މައްސަލަ އަނބުރާ ނެގީ ރިޔާސީ އިންތިހާބުގެ ފުރަތަމަ ބުރު އެމްޑީޕީއަށް ނާކާމިޔާބުވުމާ ގުޅިގެން ނަޝީދާއި ދަ ޑިމޮކްރެޓްސްއާ އެކު މަޝްވަރާތައް ކުރިއަށް ދިޔަ ވަގުތުގަ އެވެ.
އޭރު އެ މައްސަލަ ނެގުމަށް ފަހު ނަޝީދުގެ އިތުބާރު ނެތްކަމުގެ ދެވަނަ މައްސަލައެއް ހުށަހަޅަން އެމްޑީޕީގެ ޕާލަމެންޓްރީ ގްރޫޕުން އަލުން ނިންމީ ރިޔާސީ އިންތިހާބަށްފަހު އެމްޑީޕީގެ ޕާލަމެންޓްރީ ގްރޫޕުން ބޭއްވި ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
