މެންޗެސްޓާ (އޮކްޓޫބަރު 15) - މެންޗެސްޓާ ޔުނައިޓަޑް ގަންނަން ބިޑުކޮށް، ގިނަ މަސައްކަތްތަކެއް ކުރި ގަތަރުގެ މަހުޖަން ޝެއިހް ޖަސީމް ބިން ހަމަދު އަލް ތާނީ ޔުނައިޓަޑް ގަތުމަށް ކުރަމުންދިޔަ މަސައްކަތް ހުއްޓާލައިފި އެވެ.
ޔުނައިޓަޑް ގަތުމަށް ޝެއިހް ޖަސީމް ވަނީ ފަސް ބިލިއަން ޑޮލަރުގެ އަގެއް ޔުނައިޓަޑްގެ މިހާރު ވެރިން ކަމަށްވާ ގްލޭޒާ އާއިލާ އަށް ހުށަހަޅައިފަ އެވެ. އެކަމަކު، މަޝްވަރާތަކުން ކުރިއެރުމެއް ނުލިބި، އެ މަސައްކަތް ހުއްޓާލަން ޝެއިހް ޖަސީމް މިހާރު ނިންމާފައިވާކަން އިތުބާރު ހުރި މަސްދަރުތަކާ ހަވާލާދީ "ބީބީސީ" އިން ކަށަވަރުކޮށްދެއެވެ.
އެމެރިކާގެ ގްލޭޒާ އާއިލާ އިން 2005 ވަނަ އަހަރު ޔުނައިޓަޑް ގަތީ 790 މިލިއަން ޕައުންޑަށެވެ. އަދި އެ ކްލަބު ވިއްކާލުމަށް ބޭނުންވާ ކަމަށް މިދިޔަ އަހަރުގެ ނޮވެމްބަރު މަހު ވަނީ ބުނެފައެވެ.
ގަތަރުގެ ނުފޫޒު ގަދަ ފަރާތްތަކުގެ ތެރޭގައި ހިމެނޭ، ޝެއިހް ޖަސީމް ބިޑް ކޮށްފައިވަނީ އޭނާގެ ނައިންޓޫ ފައުންޑޭޝަން ކުންފުނީގެ ފަރާތުންނެވެ. ޔުނައިޓެޑްގެ ގިނަ އަދަދެއްގެ ސަޕޯޓަރުން އެދެނީ އެ ކްލަބަށް އާ ވެރިއަކު ހަވާލުވުމަށެވެ. އެ ގޮތުން، މުޅި ދުނިޔޭގެ އެކި ހިސާބުތަކަށް ބަލާއިރު، އެދެނީ ޝެއިހް ޖަސީމް އަށް ޔުނައިޓެޑް ހިންގަން ލިބުމެވެ.
ޝެއިހް ޖަސީމްގެ ވިސްނުމަކީ ޔުނައިޓެޑްގެ ދަރަނީގެ ގޮތުގައި މި ވަގުތު އޮތް 620-950 މިލިއަން ޑޮލަރު އެއްކޮށް އަދާކުރުމަށް ފަހު، އެ ކްލަބް ކުރިން އޮތް ލެވަލަށް ދެވޭނެ ވަރަށް ކްލަބަށް އިންވެސްޓް ކުރުމެވެ.
ޔުނައިޓަޑް ގަންނަން ޝެއިހް ޖަސީމްއާއެކު އިނގިރޭސި ބިލިއަނަރު ޖިމް ރެޓްކްލިފް ވެސް އެ ކްލަބުގެ ހިއްސާ ގަންނަން ބިޑުކުރިއެވެ. އެކަމަކު ޝޭހް ޖަސީމްއާ ހިލާފަށް، ރެޓްކްލިފް ބޭނުންވަނީ ޔުނައިޓަޑްގެ މައިނޯރިޓީ ހިއްސާދާރަށްވާށެވެ.
ރިޕޯޓްތަކުން ބުނާގޮތުގައި ޔުނައިޓަޑްގެ 25% ހިއްސާ ހޯދުމަށް ރެޓްކްލިފް ކުރަމުންދާ މަސައްކަތް ކާމިޔާބުވާނެ ކަމަށް ބެލެވެއެވެ. ރެޓްކްލިފް ވެސް ވަނީ ފަސް ބިލިއަން ޑޮލަރު ހުށަހަޅައިފައެވެ.
ޝެއިހް ޖަސީމް ބޭނުންވީ ޔުނައިޓަޑްގެ 100 ޕަސެންޓް ހިއްސާ ހޯދުމަށެވެ. އެކަަމަކު ގްލޭޒާ އާއިލާ އިން ޔުނައިޓަޑް މުޅިން ދޫކޮށްލަން ބޭނުމެއްނުވެއެވެ. -- އޭއެފްޕީ
