ރައްޔިތުންގެ މަޖިލީހުގެ ރައީސް ކަމުން ރައީސް މުހައްމަދު ނަޝީދު ވަކިކުރަން އެމްޑީޕީން ހުށަހެޅި މައްސަލަ ބަލައިގަނެ، އެކަން މިއަދު މަޖިލީހުގެ އިދާރާއިން މެމްބަރުންނަށް އަންގައިފި އެވެ.
ރައްޔިތުންގެ މަޖިލީހުގެ ގަވައިދުގައިވާ ގޮތުން މަޖިލީހުގެ ރައީސް ނުވަތަ ނައިބުރައީސްގެ އިތުބާރު ނެތްކަމުގެ މައްސަލައެއް ހުށަހަޅާތާ ތިން ދުވަހުގެ ތެރޭގައި، އެ މައްސަލަ މަޖިލީހުގެ އަމީން އާއްމު، މަޖިލީހުގެ ރައީސާއި މެމްބަރުންނަށް ފޮނުވަން ޖެހެ އެވެ.
ނަޝީދުގެ އިތުބާރު ނެތްކަމަށް ކަނޑައަޅައި މަޖިލީހުގެ ރައީސްކަމުން ވަކިކުރަން އެމްޑީޕީން މީގެ ކުރިން ވެސް ހުށަހެޅި އެވެ. އެހެން ނަމަވެސް ރިޔާސީ އިންތިހާބުގެ ފުރަތަމަ ބުރަށް ފަހު އެ މައްސަަލަ އަނބުރާ ގެންދިޔަ އެވެ.
އެގޮތަށް ކަންތައް ކޮށްފައި ވާތީ މިފަހަރުގެ މައްސަލަ ބަލައިގަންނަން ދަތިވާނެ ކަމަށް ނަޝީދު ފުރަތަމަ އިޝާރާތް ކުރެއްވި އެވެ.
އިތުބާރު ނެތްކަމުގެ މައްސަލަ މި ފަހަރު ހުށަހެޅީ 49 މެމްބަރުންގެ ސޮޔާއެކު އެވެ.
ރައްޔިތުންގެ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި ނަޝީދު ވިދާޅުވީ އެމަނިކުފާނުގެ އިތުބާރު ނެތްކަމުގެ މައްސަލައެއް ދެން ކުރިއަށް ގެންދެވޭނެ ކަމަށް ބެލެވެނީ އަންނަ ދައުރުގައި ކަމަށެވެ. އެއީ މީގެ ކުރިން އެފަދަ މައްސަލައެއް މި ދައުރުގައި ހުށަހަޅައި، އަނބުރާ ގެންގޮސްފައިވާތީ ކަމަށް ނަޝީދު ވިދާޅުވި އެވެ.
އެހެން ނަމަވެސް އެ މައްސަލަ ބަލައިގަންނާނެ ކަމަށް މަޖިލީހުގެ އިދާރާއިން ފަހުން ބުންޏެވެ.
މަޖިލީހުގެ އިދާރާއިން ސޯޝަލް މީޑިއާގައި ކުރި ޕޯސްޓެއްގައި ބުނެފައި އޮތީ، ރައްޔިތުންގެ މަޖިލީހުގެ ރައީސް، މަގާމުން ވަކިކުރުމުގެ މައްސަލައެއް އެމްޑީޕީގެ ފަރާތުން މަޖިލީހަށް ހުށަހަޅައިފައިވާ ކަމަށާއި އެ މައްސަލަ ގާނޫނާއި މަޖިލީހުގެ ގަވާއިދާ އެއްގޮތަށް ކުރިއަށް ގެންދާނެ ކަމަށެވެ.
ރައްޔިތުންގެ މަޖިލީހުގެ ރައީސްގެ އިތުބާރުގެ ނެތްކަމުގެ މައްސަލައެއް ހުށަހަޅާ ނަމަ ކަންތައް ކުރަންވީ ގޮތް އެ މަޖިލީހުގެ ގަވާއިދުގެ 205 ވަނަ މާއްދާގެ ދަށުން ލިޔެފައިވާ އަށް ނުކުތާއެއްގައި ބަޔާންކޮށްފައިވާއިރު، އެއް ދައުރެއްގައި ދެ ފަހަރަށް އެފަދަ ގަރާރެއް ހުށަނޭޅޭނެ ކަމަށް ބުނެފައެއް ނެތެވެ.
