ހަމާސްއިން ރަހީނުކޮށްފައިވާ އަމިއްލަ ގައުމުގެ ރައްޔިތުން މަރުވި ނަމަވެސް ގާޒާއަށް ބޮމުގެ ހަމަލާތަށް ދޭނެކަމަށް އިޒްރޭލުން ބުނެފި އެވެ.
އިޒްރޭލުގެ އަސްކަރިއްޔާއިން މިހެން ބުނެފައިވަނީ ގާޒާއަށް، އިޒްރޭލުން ފަލަސްތީނުގެ ބިންތަކަށް ވެރިވެގަތްފަހުން ދެވޭ އެންމެ ވަރުގަދަ ވައިގެ އޮޕަރޭޝަން އިއުލާންކުރުމަށް ދިން ބަސްދީގަތުމެއްގަ އެވެ.
އިޒްރޭލުގެ މީޑިއާތަކާ ހަވާލާދީ ގަތަރުގެ އަލްޖަޒީރާއިން ރިޕޯޓުކޮށްފައިވާ ގޮތުގައި މިއަދުވެސް އިޒްރޭލުން ގައްޒާ އަދި އެހެން ސަރަހައްދުތަކުގައި ހަމާސް އަށް އަމާޒުކޮށް 1،000 އަށްވުރެ ގިނަ ބޮމުގެ ހަމަލާ ވަނީ ދީފަ އެވެ.
"ހުއްޓުމެއް ނެތި ގާޒާގައި ހުރި ހަމާސްގެ މަރުކަޒުތަކަށް ހަމަލާދެމުން ގެންދާނަން، ރަހީނުކޮށްފައިވާ ފަރާތްތަކަށް ގެއްލުންވި ނަމަވެސް ހަމަލާތައް ހުއްޓާނުލާނަން" އިޒްރޭލުގެ އަަސްކަރިއްޔާއިން ބުނެފި އެވެ.
މިހާތަނަށް ގެދޮރު ގެއްލުނު މީހުންގެ އަދަދު 123،000 އަށްވުރެ މަތީގައި އުޅޭއިރު އެ އަދަދު މައްޗަށް ދާނެ ކަމަށް ބެލެވޭ ކަމަށް އިންސާނިއްޔަތަށް މަސައްކަތް ކުރާ ގިނަ ޖަމާއަތްތަކާއި މީޑިއާތަކުން ދަނީ ބުނަމުންނެވެ.
ގަތަރުގެ އަލްޖަޒީރާއިން ރިޕޯޓުކުރާ ގޮތުގައި އިޒްރޭލުގެ ހަމަލާތަކުގައި މިހާތަނަށް 159 ހައުސިން ޔުނިޓު އެއްކޮށް ސުންނާފަތިވެފައިވާއިރު، 1،210 އަށްވުރެ ގިނަ ހައުސިން ޔުނިޓަށް ވަނީ އެކިވަރުގެ ގެއްލުންވެފަ އެވެ.
އދ. އިން މައުލޫމާތު ދޭ ގޮތުގައި ގާޒާގައި ގެދޮރު ގެއްލިފައިވާ މީހުން މިހާރު ހިމާޔަތް ހޯދަމުންދަނީ 64 އަށްވުރެ ގިނަ ސްކޫލުތަކުގަ އެވެ. އޭގެ ތެރޭގައި އދ. އިން އަޅާފައިވާ ސްކޫލުތައްވެސް ހިމެނެ އެވެ.
ނަމަވެސް، އިޒްރޭލުން އަންނަނީ ސްކޫލުތަކާއި މިސްކިތްތަކަށްވެސް ހަމަލާދެމުންނެވެ. މެދުކެނޑުމެއްނެތި ދެމުންދާ ހަމަލާތަކުގައި މިހާތަނަށް ފަލަސްތީނުގެ 560 މީހަކު ވަނީ ޝަހީދު ކޮށްލާފަ އެވެ. ހަނގުރާމާގައި ހަމާސްއިން މަރާލާފައިވާ އިޒްރޭލު މީހުންގެ އަދަދު ވަނީ 800 އަށް އަރާފަ އެވެ.
