ރައްޔިތުންގެ މަޖިލީހުގައި މިއަދު ބާއްވަން އެޖެންޑާކުރި ޖަލްސާގެ ކޯރަމް ހަމަނުވެގެން ކެންސަލް ކޮށްފި އެވެ.
މަޖިލީހުގެ ޖަލްސާތައް އާއްމުކޮށް ފަށާ ގަޑި، ހެނދުނު 9:00 ވީ އިރު ވެސް ކޯރަމް ހަމަވާ ވަރަށް މެމްބަރުން ތަޅުމަށް ވަޑައިގެން ނެތުމުން ޖަލްސާ ބޭއްވެން ނެތްކަން އިއުލާނުކުރެއްވީ ރިޔާސަތު ބަލަހައްޓަވަން މިއަދު ވަޑއިގެންނެވި، މަޖިލީހުގެ ނައިބު ރައީސް އީވާ އަބްދުﷲ އެވެ.
މަޖިލީހުގައި 87 މެމްބަރުން ތިއްބަވާ އިރު ޖަލްސާއެއް ބޭއްވޭ ކޯރަމަކީ 22 މެމްބަރުންނެވެ.
މަޖިލީހުގެ މިއަދުގެ ޖަލްސާއެއް މިއަދު ބޭއްވޭ ގޮތް ނުވި އިރު މަޖިލީހުގެ މެޖޯރިޓީ އޮންނަ އެމްޑީޕީއާއި ރައީސް މުހައްމަދު ނަޝީދާ ދެމެދު މިހާރު އޮތީ ބޮޑު އަރައިރުމެއް ވެސް ފެށިފަ އެވެ. މަޖިލީހުގެ ރައީސް ކަމުން އެމަނިކުފާނު ވަކިކުރަން ފުރަތަމަ ހުށަހެޅި މައްސަލަ އަނބުރާ ގެންދިއުމަށް ފަހު އޭގެ އާއް މައްސަލައެއް އެމްޑީޕީން މިއަދު ވަނީ ހުށަހަޅައިފަ އެވެ.
މަޖިލީހުގެ ވަޓްސްއެޕް ގްރޫޕުގައި ނަޝީދު އިއްޔެ ވިދާޅުވީ އެމްޑީޕީން މިފަހަރު ހުށަހެޅި މައްސަލަ ބަލައިގަންނަން ދަތި ކަމަށެވެ.
މިއަަދަށް އެޖެންޑާކޮށްފައި ހުރި ބައެއް މުހިއްމު މަސައްކަތްތައް
- ސަރުކާރުގެ ފަރާތުން ކޮމަންޑޫ ދާއިރާގެ މެމްބަރު މުހައްމަދު ރާޝިދު ހުށަހަޅުއްވާފައިވާ ކުނި މެނޭޖްކުރުމުގެ ގާނޫނަށް އިސްލާހު ގެނައުމުގެ ބިލުގެ ބަހުސް
- ސަރުކާރުގެ ފަރާތުން މަރަދޫ ދާއިރާގެ މެމްބަރު އިބްރާހީމް ޝަރީފު ހުށަހަޅުއްވާފައިވާ އިންޑަސްޓްރިއަލް ރިލޭޝަންސް އާ ބެހޭ ބިލުގެ ބަހުސް.
- ޔޫއޭއީ އަށް ކަނޑައަޅާ ސަފީރަށް ރުހުން ދިނުމުގެ މައްސަަލަ
