މި ހިނގާ އޮކްޓޫބަރު 30 ވަނަ ދުވަހުގެ ކުރިން، ވެރިކަމުގެ ނިޒާމު ބަދަލުކުރުމާ ގުޅޭ ގޮތުން ފެންނަ ނުފެންނަ އާއްމު ވޯޓެއް ނެގުމަށް ރައްޔިތުންގެ މަޖިލީހުން ގަރާރެއް ފާސްކޮށްފައިވީ ނަމަވެސް، މިހާރު އޮތް ގޮތުން އެ މުއްދަތުގައި އެފަދަ ވޯޓެއް ނުނެގޭނެ ކަމަށް އިލެކްޝަންސް ކޮމިޝަނުގެ ނައިބް ރައީސް އިސްމާއީލް ހަބީބް ވިދާޅުވެއްޖެ އެވެ.
މަޖިލީހުގެ މައިނޯރިޓީ ޕާޓީ ކަމަށްވާ ރައީސް މުހައްމަދު ނަޝީދުގެ ޑިމޮކްރެޓްސް އިން ރިޔާސީ އިންތިހާބުގެ ފުރަތަމަ ބުރަށް ފަހު މަޖިލީހަށް ހުށަހެޅި އެ ގަރާރަށް އޭރު މެޖޯރިޓީ ޕާޓީ، އެމްޑީޕީން ތާއީދުކުރި އެވެ. ނަމަވެސް، ދެ ވަނަ ބުރަށް ފަހު އެ ޕާޓީން ބުނެފައިވަނީ މިއީ އެކަމަށް ރަނގަޅު ވަގުތު ނޫން ކަމަށެވެ. އެމްޑީޕީން އެކަމާ ގޮތެއް ނިންމާނީ މިރޭ ބާއްވާ ގައުމީ މަޖިލީހުގެ ޖަލްސާގަ އެވެ.
ކަނޑައަޅާފައިވާ މުއްދަތުގައި އިންތިހާބު ބާއްވަން ހުރި ހުރަސްތައް ބަޔާންކޮށް، އެފަދަ އިންތިހާބެއް ބާއްވަން އިތުރު ވަގުތު ބޭނުންވާ ކަން އިލެކްޝަނުން މަޖިލީހަށް ފޮނުވި ސިޓީއެއްގައި ވަނީ އަންގައިފަ އެވެ. މިއަދުގެ ޖަލްސާގައި ޑިމޮކްރެޓްސްގެ މެމްބަރުން ވެސް ވަނީ ވޯޓުގެ ތާރީހު ބަދަލުކުރަން ތާއީދުކޮށްފަ އެވެ.
އިލެކްޝަންސްގެ ތަރުޖަމާނުކަން ވެސް ކުރައްވާ ހަބީބް މިރޭ ކުރެއްވި ޓްވީޓެއްގައި ވިދާޅުވީ އިންތިހާބާ ގުޅޭ އިންތިޒާމުތައް ހަމަޖައްސައި ގާނޫނީ ގޮތުން ދޭން ޖެހޭ މުއްދަތުތައް ދިނުމަށްޓަކައި، ގާނޫނުގެ ދަށުން އިންތިހާބެއް ބާއްވަން މަދުވެގެން 45 ދުވަސް ބޭނުންވާ ކަމަށެވެ.
ހަބީބް ވިދާޅުވީ މަދުވެގެން 30 ދުވަހުގެ ތެރޭގައި ނިޒާމާ ގުޅޭ އާއްމު ވޯޓެއް ނެގިދާނެ ކަމަށް ކުރިން ބުނީ މަޖިލީހުން އެކަމަށް އެދުނު ވަގުތާ ރިޔާސީ އިންތިހާބުގެ މަސައްކަތް ހިނގަމުން އައި ވަގުތާ އެއް ވަގުތަކަށް ވާތީ އެ ހާލަތުގައި އެކަން ކުރެވިދާނެތީ ކަމަށެވެ.
ނަމަވެސް މިއަދާ ހަމަޔަށްވެސް އިންތިހާބާ ގުޅޭ ގޮތުން ކޮމިޝަނުން އެދުނު ކަންކަމާ މެދު މަޖިލީހުން ގޮތެއް ނިންމަފާއި ނުވާތީ، ކުރިން ބުނި މުއްދަތުގެ ތެރޭގައި އެފަދަ ވޯޓެއް ނެގުމުގެ ފުރުސަތު މިހާރު ނެތް ކަމަށެވެ.
"މިކަމަކީ ރައްޔިތުންނާ ސީދާ ގުޅުންހުރި ކަމަކަށްވެފައި، މިކަމާ ގުޅޭ މައުލޫމާތު ރައްޔިތުންނަށް ފޯރުކޮށް ދިނުމަކާ ނުލައި، މިފަދަ ވޯޓަކަށް ދިޔުމަކީ ކުރެވިދާނެ ކަމެއް ކަމަކަށް ގަބޫލެއް ނުކުރެވޭ،" ހަބީބް ވިދާޅުވި އެވެ.
އިލެކްޝަންސް އިން ވަނީ ވޯޓު ދެން ވެސް އަވަސް ކުރުމަށްޓަކައި، މަޖިލީހުން ކުރަން ޖެހޭ ކަންކަން ވީހާ ވެސް އަވަހަށް ކޮށްދިނުމަށް ސިޓީގައި އެދިފަ އެވެ. އެއީ ވޯޓު ކަރުދާހުގައި ހިމަނަން މަޖިލީހުން ފާސްކުރާ އިބާރާތް ދިނުމާއި، މަޖިލީހުން ފާސްކޮށްފައިވާ ގަރާރުގައި ގޮވާލާފައިވާ ކަންތަކާ އެއްކޮޅަށް ހުރި ހުއްޖަތްތަކާއި ދެކޮޅަށް ހުރި ހުއްޖަތްތަކުގެ މައުލޫމާތު ކަރުދާހެއް ދިނުމާއި، ބަޖެޓް ފާސްކުރުމެވެ.
