އޭއެފްސީ ކަޕް ގްރޫޕް ޑީގައި މިރޭ ކަލްކަތާގައި މޯހަން ބަގާން ސުޕަ ޖަޔަންޓާ ދެކޮޅަށް ކުޅޭ މެޗަށް ނުކުންނައިރު، އެއީ އިންޑިއާގެ ވަރުގަދަ ޓީމެއް ކަމުގައި ވިޔަސް މާޒިޔާ ސްޕޯޓްސް އެންޑް ރެކްރިއޭޝަނުން ނުކުންނާނީ ރަނގަޅު ކުޅުމެއް ދައްކައިގެން މޮޅުވުމުގެ އަޒުމުގައި ކަމަށް އެ ޓީމުގެ މިޑްފީލްޑަރު، އިބްރާހިމް އައިސަމް ބުނެފި އެވެ.
މި ފަހަރުގެ އޭއެފްސީ ކަޕްގައި މާޒިޔާ ކުޅުނު މެޗުން މާލޭގައި ބަންގްލަދޭޝްގެ ބަޝުންދަރާ ކިންގްސް އަތުން 3-1 އިން މޮޅުވިއިރު، މޯހަން ބަގާން އިން ވަނީ 4-0 އިން އޮޑިޝާ އެފްސީ ބަލިކޮށްފަ އެވެ.
އެންމެ ފަހުން ދެ ފަހަރު ވެސް އޭއެފްސީ ކަޕްގެ ދެކުނު އޭޝިއާ ޓީމުތައް ހިމެނޭ ގްރޫޕްގެ އެއް ވަނަ ހޯދައި، އަނެއް ބުރުން ފުރުސަތު ހޯދީ މޯހަން ބަގާން އެވެ. މި ފަހަރު ވެސް އެ ޖާގަ ހޯދާނެ ކަމަށް ފޭވަރިޓެއްގެ ގޮތުގައި ބެލެވިފައި އޮތީ އެ ޓީމެވެ.
"ހުރިހާ ކުޅުންތެރިން ވެސް ވަރަށް ސަޅިކޮށް ތިބީ، ވަރަށް ރަނގަޅަށް މެޗަށް ފޯކަސްކޮށްގެން ހަމަ. މި ވަރަށް ވަރުގަދަ ޓީމަކާ ދެކޮޅަށް އަހަރެމެން ކުޅެން މި ނުކުންނަނީ، ހަމަ ވަރަށް ރަނގަޅަށް ފޯކަސްކޮށްގެން މެޗު ނަގަން މި ތިބީ،" މޯހަން ބަގާންއާ ދެކޮޅަށް މިރޭ ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި އައިސަމް ބުންޏެވެ.
މާޒިޔާ އާއި މޯހަން ބަގާން ވަނީ އޭއެފްސީ ކަޕްގައި ފަސް ފަހަރު ކުޅެފަ އެވެ. އެ ގޮތުން ދެ މެޗުން މާޒިޔާ މޮޅުވެފައިވާއިރު، މޯހަން ބަގާން ވެސް ވަނީ ދެ މެޗުން މޮޅުވެފަ އެވެ. އަނެއް މެޗު ނިމުނީ އެއްވަރުވެގެންނެވެ. މޯހަން ބަގާން މޮޅުވީ އެންމެ ފަހުން ކުޅުނު ދެ މެޗުގަ އެވެ. އެއީ، 2021 ވަނަ އަހަރު މާލޭގައި ކުޅުނު އޭއެފްސީ ކަޕްގެ ސެންޓްރަލައިޒް މެޗުތަކުގައި 3-1 އިންނާއި މިދިޔަ އަހަރު ކަލްކަތާގައި ސެންޓްރަލައިޒްކޮށް ކުޅުނުއިރު، 5-2 އިންނެވެ.
އައިސަމް ބުނީ މޯހަން ބަގާންގެ ވަރުގަދަ ކަން އެނގޭ ކަމަށާއި އެ އަށް ވިސްނައިގެން ރަނގަޅު ކުޅުމެއް ދައްކަން ބޭނުންވާ ކަަމަށެވެ.
"އަހަރެމެންނަށް އެނގޭ އެ މީހުންނަކީ ވަރަށް ވަރުގަދަ ޓީމެއް ކަން. މިހާރު ފުޓްބޯޅައިގައި ކޮންމެ ގޮތެއް ވެސް ވެދާނެ. އަހަރެމެން ވެސް މި ނުކުންނަނީ ވަރަށް ވަރުގަަދަ އަށް މި މެޗަށް ރެޑީވެގެން، އެ މީހުން މޮޅޭ ކިޔާފަ އަހަރެމެން ދުލެއް ނުކޮށްލާނަން،" ގައުމީ ޓީމުގެ މެދުތެރޭގައި މޮޅު ކުޅުމެއް ދައްކަމުން އަންނަ އައިސަމް ބުންޏެވެ.
"އޭޓީކޭއާ މިހާރު މި ކުޅެނީ ދެ ވަނަ ފަހަރު ކަންނޭނގެ އަވޭގައި. ދެން އެ ގޮތަށް ނުވިސްނަން، ހޯމް އެންޑް އަވޭ ވިޔަސް އުނދަގޫތަކެއް ހުންނާނެ. ދެން، އަވޭ މެޗުގައި ވެސް ރަނގަޅު ނަތީޖާ ނެރެން ނުކުންނާނީ. ހިތްވަރު ކުރާނަން، ފުލް ޓައިމް ހަމަވަންދެން، އިންޑިއާ އާއި މޯލްޑިވްސް ކުޅުނަސް، އަބަދުވެސް ވަރަށް ޓަފް ވާނެ. އަހަރެމެން މޮޅުވާން ނުކުންނާނީ،"
މާޒިޔާ އާއި މޯހަން ބަގާން ކުޅޭ މެޗު ފަށާނީ މިއަދު 19:00 ގަ އެވެ.
