މެޑްރިޑް (އޮކްޓޫބަރު 1) - ސްޕެނިޝް ލީގުގައި ރޭ ޖިރޯނާގެ މައްޗަށް ފަސޭހަކަމާ އެކު 3-0 އިން ކުރިހޯދައި ރެއާލް މެޑްރިޑް ލީގުގެ އެއް ވަނަ އަށް ޖެހިލައިފި އެވެ.
ލީގު ތާވަލުގެ ކުރީގައި ރެއާލް އޮތީ އަށް މެޗުން 21 ޕޮއިންޓާ އެކު އެވެ. ދެ ވަނައިގައި އޮތް ބާސެލޯނާ އަށް އަށް މެޗުން 20 ޕޮއިންޓް ލިބިފައިވާއިރު، ތިން ވަނައިގައި އޮތް ޖިރޯނާގެ އޮތީ އަށް މެޗުން 19 ޕޮއިންޓެވެ.
ޖިރޯނާ ދަނޑުގައި ރޭ ކުޅުނު މެޗުގެ 21 މިިނިޓް ތެރޭގައި ރެއާލުން ދެ ގޯލު ޖެހި އެވެ. އެ ގޮތުން މެޗުގެ 17 ވަނަ މިނިޓްގައި ޖޫޑް ބެލިންހަމް ދިން ބޯޅައަކުން ރެއާލްގެ ގޯލު ޖެހީ ހޮސޭލޫ އެވެ. އޭގެ އިރުކޮޅެއް ފަހުން، ޓޯނީ ކްރޫސް ދިން ބޯޅައަކުން އައުރެލިން ޗުއަމެނީ ބޮލުން ގޯލެއް ޖަހައި، ރެއާލްގެ ލީޑުފުޅާކޮށްދިނެވެ.
ދެ ގޯލުގެ ލީޑެއްގައި މެޗުގެ ކޮންޓްރޯލް ނަގައިގެން ކުޅުނު ރެއާލުން ތިން ވަނަ ގޯލު ޖެހީ މެޗުގެ ދެ ވަނަ ހާފުގަ އެވެ. މި ލަނޑު ޖެހީ 71 ވަނަ މިނިޓްގައި ބެލިންހަމް އެވެ. ސްޕެނިޝް ލީގުގެ ލަނޑު ލިސްޓުގެ ކުރީގައި މި ވަގުތު ބެލިންހަމް އޮތީ ހަ ގޯލު ޖަހައިގެންނެވެ. ބެލިންހަމް އަކީ ކްރިސްޓިއާނޯ ރޮނާލްޑޯ އަށް ފަހު ސްޕެނިޝް ލީގުގެ ފުރަތަމަ ހަތް މެޗުން ރެއާލަށް ހަ ގޯލު ޖަހައިދިން ފުރަތަމަ ކުޅުންތެރިޔާ އެެވެ.
ރެއާލުން ރޭގެ މެޗު ނިންމާލީ ކުޅުންތެރިއަކު މަދުކޮށެވެ. އިތުރު ވަގުތުގެ ތެރޭގައި ޖިރޯނާގެ ޕޯޓޫ އަށް ކުރި ނުރައްކާތެރި ފައުލަކަށް ރެއާލްގެ ނަޗޯ ފެނާންޑޭޒް އަށް ވަނީ ރަތް ކާޑެއް ދައްކައިފަ އެވެ.
