ލަންޑަން (ސެޕްޓެމްބަރު 30) - މެންޗެސްޓާ ޔުނައިޓެޑަށް ކުޅެމުން އަންނަ އާޖެންޓީނާ ޑިފެންޑަރު، ލިސަންދްރޯ މާޓީނޭޒްގެ ފަޔަށް ލިބުނު އަނިޔާއަކާ ހެދި ތިން މަހެއްހާ ދުވަހަށް ކުޅުމާ ދުރަށްދާން ޖެހުނުއިރު، ގެވެށި އަނިޔާގެ ތުހުމަތު އަމާޒުވެފައިވާ ބްރެޒިލްގެ ވިންގް، އެންތަނީ ޔުނައިޓެޑްގެ ޕްރެކްޓިހަށް ނުކުމެއްޖެ އެވެ.
މިދިިޔަ އޭޕްރީލް މަހު ވެސް ލިސަންދްރޯ، 25، ގެ ފަޔަށް ލިބުނު އަނިޔާއަކާ ހެދި ސީޒަންގެ ފަހުކޮޅު މެޗުތަކެއް ގެއްލުނެވެ. އެ އަނިޔާއިން ރަނގަޅުވެގެން މި ސީޒަނުގައި މާޓީނޭޒް އަލުން އަނބުރާ ކުޅުމަށް އައި ނަމަވެސް، އަލުން ކުރީގެ އަނިޔާގެ ކަންކަން ވަނީ ދިމާވެފަ އެެވެ. އެހެންވެ، ފުރިހަމަ ފަރުވާ އެއް ކުރުމަށްޓަކައި ތިން މަހެއްހާ ދުވަހަށް ކުޅުމާ ދުރަށް ދާން ޖެހުމުގެ ފުރުސަތު އެބައޮތް ކަމަށް ޔުނައިޓެޑުން މީޑިއާ އަށް މައުލޫމާތު ދެ އެވެ.
ގެވެށި އަނިޔާގެ ތުހުމަތެއް އަމާޒުވެފައިވާ ބްރެޒިލްގެ ވިންގް، އެންތަނީގެ މައްސަލަ މެންޗެސްޓާ ސަރަހައްދުގެ ފުލުހުން ވެސް ބަލާނެ ކަމަށް އިއުލާނުކޮށްފައިވާއިރު، އެ ތަހުގީގު ކުރިއަށްދިޔަ ނަމަވެސް އެންތަނީ އަށް ޔުނައިޓެޑްގެ ޕްރެކްޓިހަށް ނުކުމެ މެޗުތަކުގައި ކުޅެވޭނެ ކަމަށް ޔުނައިޓެޑުން ވަނީ ބުނެފަ އެވެ.
އެންތަނީގެ ލޯބިވެރިޔާ، ގަބްރިއެލާ ކަވަޔީން ތުހުމަތުކުރާގޮތުގައި މެންޗެސްޓާ ސަރަހައްދުގެ ހޮޓަލެއްގެ ތެރެއިން އެންތަނީ ވަނީ ގަބްރިއެލާ އަށް ހަމަލާދީފަ އެވެ. ގަބްރިއެލާ ތުހުމަތުގައިވާ ގޮތުން މާރާމާރީ ހިންގުމުގެ އިތުރުން އޭނާ އަށް އެންތަނީ ވަނީ އިންޒާރު ވެސް ދީފަ އެވެ.
އެންމެ ފަހުން، އެންތަނީ ޔުނައިޓެޑްގެ މެޗެއްގައި ކުޅެފައިވަނީ އާސެނަލް އަތުން 3-1 އިން ބަލިވި މެޗުގަ އެވެ. އެ ފަހުން ޔުނައިޓެޑް ކުޅުނު ހަތަރު މެޗުގައި ވެސް އެންތަނީ ނުފެނެ އެވެ. ޓީމުން ދިން ބްރޭކެއްގައި އޭނާ ހުރީ ބްރެޒިލްގަ އެެވެ.
އެންތަނީ އާއި ލިސަންދްރޯ އަކީ ކުރިން ޔުނައިޓެޑްގެ ކޯޗު އެރިކް ޓެން ހާގްއާ އެކު، އަޔަކްސްގައި މަސައްކަތްކުރި ދެ ކުޅުންތެރިންނެވެ.
