ކުރީގެ ރައީސް މައުމޫން އަބްދުލްގައްޔޫމް ސަރުކާރުގައި ދޫކުރި ސިނަމާލެ އަދި އެހެން ބައެއް ފްލެޓުތައް ދޫކޮށްލަން ބޭނުންވާ މީހުންނަށް ސަރުކާރުގެ ބިންވެރިޔާ އަދި ގެދޮރުވެރިޔާ ސްކީމުގެ ދަށުން ދޫކުރާ ފްލެޓު އަދި ބިމަށް ކުރިމަތިލެވޭނެ ކަމަށް ހައުސިން މިނިސްޓްރީން ބުނެފި އެވެ.
ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ރާއްޖެ ޓީވީއަށް ދެއްވި އިންޓަވިއުއެއްގައި ރޭ ވިދާޅުވީ، ރައީސް މައުމޫން ސަރުކާރުގައި ހުޅުމާލޭގައި އަޅާފައި ހުރި ފްލެޓުތަކާއި ސިނަމާލެ ފްލެޓުގައި ދިރިއުޅޭ މީހުންނަށް އަލުން ފްލެޓަށް ކުރިމަތިލުމުގެ ފުރުސަތު އޮތް ކަމަށެވެ.
އަދި އެގޮތަށް ކުރިމަތި ލައިގެން ފްލެޓު ދޫކުރާނީ މިހާރު ދިރިއުޅޭތަން ދޫކޮށްލާނަމަ ކަމަށް އަކްރަމް ވިދާޅުވި އެވެ.
"ކުރީގެ ރައީސް މައުމޫން ސަރުކާރުގައި އެބަހުރި ވަރަށް ކުދި ފްލެޓުތަކެއް ދެއްވާފައި. ހުޅުމާލޭގައި ކުރިން އަޅާފައި ހުރި ފްލެޓުތައް އަދި ސިނަމާލެ ފްލެޓުތަކުގައި އުޅޭ މީހުންނަށް ވެސް [ފްލެޓަށް ކުރިމަތިލުމުގެ] ފުރުސަތު އޮންނާނެ" އަކްރަމް ވިދާޅުވި އެވެ.
ކުރިން ދޫކޮށްފައިވާ އެއް ކޮޓަރީގެ ފްލެޓުތަކާއި އެސްއޯއީތަކުން ދޫކުރި ފްލެޓުތަކުގައި ދިރިއުޅޭ މީހުންނަށް އެހެން ފުރުސަތުތައް ނެތުމުން އެކަމުގެ ޝަކުވާ ލިބެމުން އަންނަ ކަމަށާއި، މިހާރު ހުޅުވާލާފައިވާ މުއްދަތުގެ ތެރޭގައި އެމީހުންނަށް ވެސް ބިމާއި ފްލެޓަށް ކުރިމަތިލެވޭނެ ކަމަށް އަކްރަމް ވިދާޅުވި އެވެ.
"މިފާހަގަ ކުރެވެނީ، ކުރީގަ ދީފަ ހުރި އެއްރޫމް ފްލެޓުތަކާއި، އެސްއޯއީތަކުން ހަދާފަ އެބަހުރި ފްލެޓުތަކެއް، އެ ފްލެޓުތަކުގައި ތިބޭ މީހުން ވަރަށް ޝަކުވާ ގިނަ އެމީހުންނަށް އެހެން ފުރުސަތެއް ނެތީމަ. އެހެންވީމަ އެއްރޫމް ފްލެޓުތަކުގެ މީހުންނަށް ވެސް މިހާރު [ކުރިމަތި] ލެވޭނެ" އަކްރަމް ވިދާޅުވި އެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގެ ދެވަނަ ފިޔަވަހީގައި ސަރުކާރުން އަންނަނީ 18 ބުރީގެ 32 ޓަވަރު އިމާރާތް ކުރަމުންނެވެ. އޭގެތެރޭގައި ހިމެނެނީ ދެ ކޮޓަރީގެ 1،200 ޔުނިޓް، ތިން ކޮޓަރީގެ 2،800 ޔުނިޓެވެ.
އޭގެ އިތުރުން މިމަހުގެ ދެ ވަނަ ދުވަހު ފަހި ދިރިއުޅުން ކޯޕަރޭޝަނުން ވަނީ ހުޅުމާލޭގައި އިތުރު 4،000 ހައުސިން ޔުނިޓު އެޅުމަށް އިންޑިއާގެ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އާ ހަވާލުކޮށްފަ އެވެ. އޭގެ އިތުރުން 2،000 ޔުނިޓު އިމާރާތް ކުރާން ވަނީ ބަޔަކާ ހަވާލުކޮށްފަ އެވެ.
ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވަނީ ފްލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި މީހުންނަށް ފްލެޓު ދިނުމަށްޓަކައި އިތުރު 3،500 ހައުސިން ޔުނިޓު އިމާރާތްކުރަން ބަޔަކާ ހަވާލު ކުރަން ތައްޔާރު ވަމުން އަންނަ ކަމަށް ވެސް ވިދާޅުވެފަ އެވެ.
