މޯލްޑިވްސް ނޭޝަނަލް ޕާޓީ (އެމްއެންޕީ)ގެ ނައިބު ރައީސްއެއްގެ މަގާމުގައި ހުންނެވި ދުންޔާ މައުމޫން އެ ޕާޓީ ދޫކުރައްވައި އެނބުރި ޕީޕީއެމްއާ ގުޅިވަޑައިގެންފި އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ފޮރިން މިނިސްޓަރުކަން ކުރެއްވި ދުންޔާ ޕީޕީއެމްއާ ގުޅިވަޑައިގަތުމަށް އެ ޕާޓީއާ ފޯމު ހަވާލުކުރެއްވީ، ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިއަދު ހަވީރު ހުޅުމާލޭގައި ބޭއްވި ކެމްޕެއިން އިވެންޓެއްގެ ތެރެއިންނެވެ.
ދުންޔާ އެންމެ ފުރަތަމަ ސިޔާސީ މަސައްކަތް ކުރެއްވީ ބައްޕާފުޅު ކުރީގެ ރައީސް މައުމޫން އަބްދުލްގައްޔޫމްގެ ދިވެހި ރައްޔިތުންގެ ޕާޓީ (ޑީއާރްޕީ)އިންނެވެ. އަދި ޑީއާރްޕީ ބައިބައިވުމުން ޕީޕީއެމް އުފެއްދި އިރު އެ ޕާޓީއާ ގުޅިވަޑައިގެން ސިޔާސީ މަސައްކަތް ކުރެއްވި އެވެ.
ރައީސް ޔާމީންގެ ސަރުކާރުގައި ފޮރިން މިނިސްޓަރުކަމުން ދުންޔާ އިސްތިއުފާ ދެއްވީ، ޔާމީންއާއި ރައީސް މައުމޫންގެ ހިޔާލު ތަފާތުވެ، ޕާޓީ ތެރޭގައި ކޯޅުން އުފެދިފައި ވަނިކޮށެވެ. އެކަމަކު، އޭގެ ފަހުން ވެސް އޭނާ އެ ޔާމީންގެ ސަރުކާރުގައި ހެލްތު މިނިސްޓްރީގެ ސްޓޭޓް މިނިސްޓަރުކަން ކުރެއްވި އެވެ.
އޭގެ ފަހުން، 2021 ވަނަ އަހަރު ސިޔާސީ ގޮތުން ދުންޔާ ފެނިގެން ދިޔައީ އުމަރު ނަސީރު ފެއްޓެވި ދިވެހި ނޭޝަނަލް އެކްޝަން (ޑީއެންއޭ) ކިޔާ ހަރަކާތަކުންނެވެ.
އެކަމަކު، އެ މަސައްކަތް ދޫކުރައްވައި އޭނާ ދެން ގުޅިވަޑައިގަތީ އެމްއެންޕީއާ އެވެ. މިއަދު ޕީޕީއެމްއަށް ސޮއި ކުރުމާ ހަމައަށް އޭނާ ހުންނެވީ އެ ޕާޓީގެ ނައިބު ރައީސެއްގެ ގޮތުގަ އެވެ.
ރިޔާސީ އިންތިހާބުގެ ފުރަތަމަ ބުރުގައި ވާދަ ކުރި އެމްއެންޕީން މިހާރު ވަނީ ޕީޕީއެމް/ޕީއެންސީއާއެކު ދެވަނަ ބުރަށް ކޯލިޝަން ހަދައިފަ އެވެ.
