މަޖިލީހުގެ ދާއިމީ ކޮމިޓީތަކަށް އެމްޑީޕީން ހަމަޖައްސާ މެމްބަރުންގެ ނަންތައް މި ހަފްތާގެ ތެރޭގައި ފޮނުވާނެ ކަމަށް އެ ޕާޓީގެ ޕީޖީ ލީޑަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.
މަޖިލީހުގެ ދާއިމީ ކޮމިޓީތައް އެކުލަވައިލާނެ ގޮތް މިދިޔަ ހަފުތާގެ ފަހު ޖަލްސާއިން ފާސްކޮށް، ޕާޓީތަކުން ކޮމިޓީތަކަށް އަންޔަންކުރަން އެދޭ މެމްބަރުންގެ ނަންތައް ފޮނުވަން އޮތީ އަންގައިފަ އެވެ. މިއަދު މަޖިލީހުގެ އެޖެންޑާގައި އޮތީ ދާއިމީ ކޮމިޓީތަކަށް މެމްބަރުން އައްޔަންކޮށް ތަޅުމުން އެކަން ފާސްކުރުމެވެ. ދަ ޑިމޮކްރެޓްސް އާއި ޕީޕީއެމް/ޕީއެންސީން ނަންތައް ފޮނުވާފައިވާއިރު އަދި އެމްޑީޕީން ނަންތަކެއް ނުފޮނުވަ އެވެ.
ރައީސް އިބްރާހިމް މުހައްމަދު ސޯލިހުގެ ރަނިން މޭޓުގެ ގޮތުގައި ރިޔާސީ އިންތިހާބުގައި ކެމްޕެއިން ކުރައްވަމުން ގެންދަވާ އަސްލަމް މިއަދު "އަދަދު"އަށް ވިދާޅުވީ، ކޮމިޓީތަކަށް އުނި އިތުރުވި ގޮތަށް ބަލައި ގެންނަން ޖެހޭ ބަދަލުތަކާ ބެހޭގޮތުން އަދި އެ ޕާޓީގެ މެމްބަރުންނާ މަޝްވަރާ ނުކުރެވޭ ކަމަށެވެ. އޭނާ ވިދާޅުވީ ގެންނަން ޖެހޭ ބަދަލުތައް ގެންނާނީ މަޝްވަރާ ކުރެވި އެއްބަސްވެވޭ ގޮތެއްގެ މަތިން ކަމަށެވެ.
"ކޮމިޓީތަކަށް ގެންނަން ޖެހޭ އެޖަސްޓްމެންޓްތައް އަދި އަޅުގަނޑުމެންނަށް ނުގެނެވޭ. އެޖަސްޓްމެންޓްސް ގެނެވި އެންމެންނަށް އެއްބަސްވެވުނީމަތާ އަޅުގަނޑުމެންނަށް އެންމެންނަށް އެއްބަސްވެވިގެންތާ ކޮމިޓީތަކުގެ ކަންކަން ހަމަޖައްސަން ޖެހޭނީ،" އަސްލަމް ވިދާޅުވި އެވެ.
"އަޅުގަނޑުމެން މި ވީކް ތެރޭގައި އިރާދަކުރެއްވިއްޔާ އެކަން ނިންމައި، ނަން ފޮނުވާނަން،"
އާންމު އުސޫލުން ހެނދުނު 9:00 ޖަހާއިރަށް މިއަދުގެ މަޖިލިސް ޖަލްސާ ފަށަން ތާވަލު ކުރި ނަމަވެސް ގަޑިން 9:20 ހިނގި އިރު ވެސް ކޯރަމް ހަމަވާ އަދަދަށް މެމްބަރުން ވަޑައިނުގެންނެވުމުން މިއަދުގެ ޖަލްސާ ނުބޭއްވުނެވެ. މަޖިލީހުގައި 87 މެމްބަރުން ތިއްބަވާ އިރު ޖަލްސާއެއް ފަށަން ކޯރަމް ހަމަވާނީ 22 މެމްބަރުން ވަޑައިގެންނެވުމުންނެވެ.
އަސްލަމް ވިދާޅުވީ އޭނާއަށް މިއަދުގެ ޖަލްސާއަށް ވަޑައިނުގެންނެވުނީ މާލެއިން ބޭރުގައި ހުންނެވުމުން ކަމަށެވެ.
ދެން މަޖިލީހުގެ ޖަލްސާއެއް ބޭއްވުމަށް ގަސްދުކުރަނީ އެމްޑީޕީއާއެކު މަޝްވަރާކުރުމަށްފަހު ކަމަށް މިއަދު މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފަ އެވެ. އަދި އެމްޑީޕީގެ މެމްބަރުން ޖަލްސާއަށް ވަޑައިގަންނަވަން ގަސްދުކުރައްވާނަމަ ޖަލްސާ ބާއްވަވާނެ ކަމަށް ވިދާޅުވި އެވެ.
