ރައީސް އިބްރާހިމް މުހައްމަދު ސޯލިހާ ބައްދަލު ކުރެއްވުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ރައީސް އޮފީހަށް ވަޑައިގަނެފި އެވެ.
ރައްޔިތުންގެ މަޖިލީހުގެ ރައީސްގެ ރަސްމީ ކާރުކޮޅުގައި ނަޝީދު މިއަދު ރައީސް އޮފީހަށް ވަޑައިގެންނެވިއިރު، ރިޔާސީ އިންތިހާބުގެ ދެ ވަނަ ބުރު ބާއްވަން އޮތީ އެންމެ ފަސް ދުވަހަށް ކުޑަތަންވެފަ އެވެ.
ރައީސް ސޯލިހާއި ނަޝީދު މި ބައްދަލު ކުރައްވަނީ މިދިޔަ ހަފުތާގެ ހޯމަ ދުވަހު ދެ ބޭފުޅުން ފޯނު މެދުވެރިކޮށް މަޝްވަރާތަކެއް ކުރައްވާފައި އޮއްވަ އެވެ.
އެ ދެ ބޭފުޅުން އެއްތަނަކުން ދިމާވެ، ބައްދަލު ނުކުރައްވާ ގިނަ ދުވަސްވެފައި އޮއްވާ މިއަދު ބައްދަލު ކުރައްވާ ވަކި ސަބަބެއް އަދި ހާމަކޮށްފައި ނެތް ނަމަވެސް ބެލެވޭ ގޮތުގައި މިއީ ކުރިއަށް އޮތް އިންތިހާބާ ގުޅިގެން ކުރައްވާ މަޝްވަރާތަކެކެވެ.
ސެޕްޓެމްބަރު 9، ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ވޯޓުލީ އާބާދީގެ 39 ޕަސެންޓް ހޯއްދަވައިގެން ރައީސް ސޯލިހު ދެ ވަނައަށް ވަޑައިގެންނެވިއިރު، ހަތް ޕަސެންޓު ހޯއްދަވައިގެން ނަޝީދުގެ ޕާޓީގެ ކެންޑިޑޭޓް އިލްޔާސް ލަބީބް ވަޑައިގެންނެވީ ތިންވަނައަށެވެ. އެ ބުރުގައި ކުރި ހޯއްދެވީ 46 ޕަސެންޓު ހޯއްދަވައިގެން އިދިކޮޅު ކެންޑިޑޭޓު ޑރ. މުހައްމަދު މުއިއްޒެވެ.
ދަ ޑިމޮކްރެޓްސް ނިންމީ ރިޔާސީ އިންތިހާބުގެ ދެ ވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރުމަށެވެ. އެގޮތަށް ނިންމީ، ވެރިކަން ހިންގާ ނިޒާމު ބަދަލު ކުރުމާ ގުޅޭ ގޮތުން ވޯޓަށް އެހުމަށް މައި ދެ ޕާޓީއަށް ހުށަހެޅުމަށްފަހު ދެ ޕާޓީން ވެސް އެކަމަށް އެކަށީގެންވާ އިޖާބައެއް ނުދިނުމުންނެވެ.
އެހެން ނަމަވެސް އިންތިހާބުގެ ފުރަތަމަ ބުރަށްފަހު ނަޝީދުގެ އިތުބާރު ނެތް ކަމަށް ސޯލިހުގެ އެމްޑީޕީން މަޖިލީހަށް ހުށަހަޅާފައި އޮތް މައްސަލަ ވަނީ ބޭރުކޮށްލައިފަ އެވެ. އެއާއެކު، އަންނަ އޮކްޓޯބަރު މަހު ނިޒާމުގެ ވޯޓަކަށް އެހުމަށް ޑިމޮކްރެޓްސް އިން މަޖިލީހަށް ގަރާރެއް ހުށަހަޅައި، މިހާރު އެ ގަރާރު ވަނީ މަޖިލީހުން ވެސް ފާސްކޮށްފަ އެވެ.
