ދަ ޑިމޮކްރެޓްސްގެ މެމްބަރުން ރައްޔިތުންގެ މަޖިލީހުގެ ދަފުތަރުގައި ރަސްމީީކޮށް ޖެހުމުން އެއީ މައިނޯރިޓީ ޕާޓީކަން މަޖިލީހުގެ ރިޔާސަތުން މިއަދު އިއުލާނުކޮށްފި އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނުހިމަނައި ޑިމޮކްރެޓްސްގެ 13 މެމްބަރަކު މިހާރު މަޖިލީހުގައި ތިއްބަވަ އެވެ.
"މި ބަދަލާ ގުޅިގެން މަޖިލީހުގައި އެންމެ ގިނަ ގޮނޑި ކޮންޓްރޯލް ކުރާ ޕާޓީ ފިޔަވައި ދެން އެންމެ ގިނަ ގޮނޑި ކޮންޓްރޯލް ކުރާ ޕާޓީއަކީ ދަ ޑިމޮކްރެޓްސް. އެހެންކަމުން މަޖިލީހުގެ ގަވާއިދުގެ 37 ވަނަ މާއްދާގެ ދަށުން މަޖިލީހުގެ މައިނޯރިޓީ ލީޑަރަކީ މިހާރު ދަ ޑިމޮކްރެޓްސްގެ ޕާލަމެންޓްރީ ގްރޫޕުގެ ލީޑަރު މެދު ހެންވޭރު ދާއިރާގެ އިއްޒަތްތެރި މެމްބަރު އަލީ އާޒިމް ކަމުގައި އިއުލާނު ކުރަން،" އެކަން އިއުލާނު ކުރައްވަމުން ނަޝީދު ވިދާޅުވި އެވެ.
މަޖިލީހުގެ ގޮނޑިތައް ބެހިފައި ހުރި ގޮތް
- އެމްޑީޕީގެ 56 މެމްބަރުން
- ދަ ޑިމޮކްރެޓްސްގެ 13 މެމްބަރުން
- ޕީޕީއެމްގެ ފަސް މެމްބަރުން
- ޕީއެންސީގެ ތިން މެމްބަރުން
- އެމްއެންޕީގެ ތިން މެމްބަރުން
- އެމްޑީއޭގެ ދެ މެމްބަރުން
- ޖޭޕީގެ ދެ މެމްބަރުން
- ވަކި ޕާޓީއަކަށް ނިސްބަތްނުވާ ތިން މެމްބަރުން
މީގެ ކުރިން މަޖިލީހުގެ މައިނޯރިޓީ ލީޑަރަކީ ޕީޕީއެމްގެ ޕާލަމެންޓްރީ ގްރޫޕުގެ ލީޑަރު އޭދަފުށީ ދާއިރާގެ މެމްބަރު އަހުމަދު ސަލީމް (ރެޑް ވޭވް ސަލީމް) އެވެ.
މަޖިލީހުގައި ޕާޓީތައް ތަމްސީލުވާ މިންވަރު ބަދަލުވުމުން، ތަޅުމުގައި ބަހުސް ކުރުމަށް ޕާޓީތަކަށް ލިބޭ ވަގުތަށް ވެސް ވަނީ ބަދަލު އައިސްފަ އެވެ. އެކަން ފަހުން ފާސް ކުރާނެ ކަމަށް ވެސް ނަޝީދު މިއަދު އިއުލާނު ކުރެއްވި އެވެ.
އެމްޑީޕީއިން ވަކިވެ، ޑިމޮކްރެޓްސްގެ މެމްބަރުން އެ ޕާޓީ އުފެއްދީ މިދިޔަ ޖުލައި މަހުގެ ތެރޭގަ އެވެ. ނަމަވެސް މީގެ ކުރިން މަޖިލީހުގެ ދަފުތަރުގައި ޖެހުނީ އެ ޕާޓީގެ މަދު މެމްބަރެކެވެ.
