ރައްޔިތުންގެ މަޖިލީހުގައި މިއަދު ބާއްވަން އެޖެންޑާކުރި ޖަލްސާއަށް ކޯރަމް ހަމަވާ ވަރަށް މެމްބަރުން ވަޑައިނުގެންނެވުމުން މަޖިލީހުގެ ރައީސް މުހައްމަދު ނަޝީދު ނުހުރުން ފާޅުކުރައްވައިފި އެވެ.
މިއަދު މަޖިލީހުގެ ޖަލްސާ ފަށާ ގަޑި ޖެހުނު އިރު ތަޅުމުގައި ވަޑައިގެން ތިއްބެވީ އެންމެ 17 މެމްބަރުންނެވެ. މަޖިލީހުގައި ޖުމްލަ 87 މެމްބަރުން ތިއްބަވާ އިރު ޖަލްސާއެއްގެ ކޯރަމް ހަމަވަނީ 22 މެމްބަރުން ވަޑައިގެންނެވުމުންނެވެ.
"ރައްޔިތުންގެ މަޖިލިސް ސަބަޓާޖްކޮށް، ހުއްޓުވާފައި ބަަހައްޓަމުން މިގެންދަނީ ރައީސުލް ޖުމްހޫރިއްޔާ ކަނޑައެޅިގެން މިކަމާ ބައިވެރިވަޑައިގަންނަވައިގެން. އަޅުގަނޑު ރައީސުލް ޖުމްހޫރިއްޔާއަށް ދަންނަވަން، އިލްތިމާސްކުރަން ދިވެހި ދައުލަތުގެ ބާރުތައް އަތްޕުޅު މައްޗަށް ނަންގަވައި، ދިވެހި ދައުލަތް ހުއްޓުވައިލައްވަން ތިޔަ ކުރައްވާ މަސައްކަތް ހުއްޓެވުމަށް،" ނަޝީދު ވިދާޅުވި އެވެ.
އިއްޔެއެކޭ އެއްގޮތަށް މިއަދު ވެސް ޖަލްސާގެ ކޯރަމް ހަމަވޭތޯ ނަޝީދު ވަޑައިގެން މަޑުކުރެއްވީ ރިޔާސަތުގަ އެވެ. އަދި މަޖިލީހުގެ ޔޫޓިއުބް ޗެނަލުން އެ މަންޒަރު ގެންދިޔައީ ވަގުތުން ދުރަށް ދައްކަމުންނެވެ. ވިއްސަކަށް މިނެޓް އެގޮތުގައި ހޭދަކުރެއްވުމަށް ފަހު ނަޝީދު ވިދާޅުވީ މަޖިލިސް ހުއްޓުވާފައި އޮތީ އެކަމުގައި ރައީސް އިބްރާހީމް މުހައްމަދު ސޯލިހު އެކަމުގައި ބައިވެރިވެވަޑައިގަންނަވައިގެން ކަމަށެެވެ.
އެމަނިކުފާނު ވިދާޅުވީ މަޖިލިސް ހުއްޓުނަ ނުދީ ކުރިއަށް ގެންދަން ކުރައްވާ މަސައްކަތް ހުއްޓަވައި ނުލައްވާނެ ކަމަށެވެ. އަދި ވިދާޅުވީ، ހުސްވަގުތު ކޮޅަކަށްފަހު 10:00 ޖަހާއިރު އަލުން ޖަލްސާ ކުރިއަށްގެންދަން މަސައްކަތް ކުރައްވާނެ ކަމަށެވެ.
