ކޮލަމްބޯ، ސްރީ ލަންކާ (ސެޕްޓެމްބަރު 17) - ދިހަ ވިކެޓުން ސްރީ ލަންކާ އަތުން މޮޅުވެ، އިންޑިއާ އިން އަށް ވަނަ ފަހަރަށް އޭޝިއާ ކަޕްގެ ޗެމްޕިއަންކަން ހޯދައިފި އެވެ.
މެޗަށް ނުކުމެ ޓޮސް ދިމާވުމުން ލަންކާ އިން ނިންމީ ކުޅެން އަރާށެވެ. އެކަމަކު، 15.2 އޯވަރުގެ ތެރޭގައި 50 ލަނޑަށް ލަންކާގެ ހުރިހާ ކުޅުުންތެރިން ވަނީ ނުބައިވެފަ އެވެ. މިއީ 2012 ވަނަ އަހަރު ސްރީ ލަންކާއާ ދެކޮޅަށް ކުޅުނު މެޗަށް ފަހު ލަންކާގެ އެންމެ ދަށް ސްކޯރިންނެވެ.
ފައިނަލުގައި އިންޑިއާގެ ތަރި އަކީ ޖުމްލަ އެކު ހަ ވިކެޓް ނެގި ބޯލަރު، މުހައްމަދު ސިރާޖު އެވެ. ސިރާޖު ވަނީ މި މެޗުގެ އެއް އޯވަރުގެ ތެރޭގައި ހަތަރު ވިކެޓް ނަގައިފަ އެވެ. ސިރާޖު ވަނީ މި މެޗުގައި އޭނާގެ ފުރަތަމަ 16 ބޯޅައިން ފަސް ވިކެޓް ނަގައިފަ އެވެ. މިއީ، ރެކޯޑަކާ އެއްވަރުގެ މޮޅު ކުޅުމެކެެވެ.
ލަންކާއާ ދެކޮޅަށް ކުޅުނު މެޗުގެ ތެރެއިން ވިކެޓެއް ނެގުމަށް ފަހު ސިރާޖު އުފާފާޅުކުރަނީ.--- ފޮޓޯ: އޭއެފްޕީ
އަނެއްކޮޅުން، އިންޑިއާ ޓީމުގެ ހާޑިކް ޕާންޑްޔާ ވަނީ ތިން ވިކެޓް ނަަގައިފަ އެވެ.
ލަންކާ ޓީމަށް އެންމެ ގިނަ ލަނޑު ހަދައިދިނީ 17 ލަނޑު އެއްކުރި ކުސާލް މެންޑިސް އާއި ނުބައިނުވެ، 13 ލަނޑު ހެދި ހެމަންތާ އެެވެ.
ޖަވާބުގައި އިންޑިއާ އިން ކުޅެން އަރައި، ކުޅުންތެރިއަކު ނުބައިނުވެ، 6.1 އޯވަރުގެ ތެރޭގައި ވަނީ މެޗުން މޮޅުވެފަ އެވެ. އިންޑިއާ އިން ކުޅެން އެރީ އިޝާން ކިޝަން އާއި ޝުބްމަން ގިލް އެވެ. އިޝާން 23 ލަނޑު އެއްކުރިއިރު، ގިލް ވަނީ 27 ލަނޑު ހަދައިފަ އެެވެ.
އިންޑިއާ އިން ކްރިކެޓް އޭޝިއާ ކަޕް ކާމިޔާބުކޮށްފައިވަނީ 1984، 1988، 1991، 1995، 2010، 2016، 2018 އަދި 2023 ވަނަ އަހަރު އެވެ. މީގެ އިތުރުން، އިންޑިއާ ވަނީ ތިން ފަހަރު ފައިނަލުން ބަލިވެފަ އެވެ.
