ރިޔާސީ އިންތިހާބުގެ ދެވަނަ ބުރުގައި ދަ ޑިމޮކްރެޓްސް އިން ތާއީދުކުރާނެ ކެންޑިޑޭޓަކާ މެދު ގޮތެއް ނުނިންމައި މަޑުކުރެވެން ނެތް ކަމަށް އެޕާޓީގެ ލީޑަރު އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ދޮންމަނިކު ސްކައިވިއު ގައި ދަ ޑިމޮކްރެޓްސްްގެ މެމްބަރުންނާ އެކު މިއަދު ބޭއްވެވި ބައްދަލުވުމުގައި ނަޝީދު ވިދާޅުވީ އެމްޑީޕީއާއި ޕީޕީއެމް/ޕީއެެންސީއަށް ވެސް އެޕާޓީން ހުށަހަޅާފައިވާ ޝަރުތާ މެދު ގޮތެއް ނިންމަން ޖެހޭ ކަން، ހާއްސަކޮށް އެމްޑީޕީއަށް ސާފުވާނެ އެވެ. އެހެން ނަމަވެސް ކުރިއަށް އޮތް ދެތިން ދުވަސް ތެރޭގައި "ޝަރުތަކާ ލައިގެން، ނުވަތަ ޝަރުތަކާ ނުލައި" ވެސް ދަ ޑިމޮކްރެޓްސް އިން ގޮތެއް ނިންމަން ޖެހޭ ކަމަށް އެމަނިކުފާނު ވިދާޅުވި އެވެ.
"އެމްޑީޕީއަަށް ވެސް އަޅުގަނޑު ހިތުން އެމްޑީޕީއަށް ވެސް ސާފުވާނެ އަބަދު އަަޅުގަނޑުމެންނަށް މަޑުކޮށްގެނެއް ނުތިބެވޭނެ އެބޭފުޅުން ގޮތެއް ނިންމަވަންދެނެއް. އެހެންވީމާ މިސާލަކަށް މާދަމާ ނުވަތަ އޭގެ އަނެއް ދުވަހު، އަޅުގަނޑުމެން އެބަ ނިންމަން ޖެހޭ. ޕީޕީއެމުން އެބުނާ ފަދައިން ޝަރުތަކާ ލައިގެން ނަމަވެސް ނުލާ ނަމަވެސް ، ކޮންމެ ގޮތަކުން ވިޔަސް އަޅުގަނޑުމެން ގޮތެއް ނިންމަން ޖެހޭ،" ނަޝީދު ވިދާޅުވި އެވެ.
ޑިމޮކްރެޓުން ހުށަހެޅި ޝަރުތާ މެދު ގޮތެއް ނިންމަން އެމްޑީޕީއަށް ވަގުތުދީ، ޑެޑްލައިނެއް ކަނޑައަޅަން ޖެހޭ ކަމަށް ދެކެވަޑައިގަންނަވާ ކަމަށް ވެސް އެމަނިކުފާނު ވިދާޅުވި އެވެ. އެހެން ނަަމަވެސް ދެން ގިނަ ވަގުތު ދެވެން ނެތް ކަމަށާއި ދަ ޑިމޮކްރެޓްސްގެ ކައުންސިލުން އެކަމާ މަޝްވަރާކުރަން އުއްމީދުކުރައްވާ ކަމަށް ވެސް އެމަނިކުފާނު ވިދާޅުވި އެވެ.
މިމަހުގެ 9، ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ތިން ވަނައަށް އެންމެ ގިނަ ވޯޓު ލިބުނީ ދަ ޑިމޮކްރެޓްސް އަށެވެ. އެ ޕާޓީއަކީ އެމްޑީޕީގެ ރިޔާސީ ޕްރައިމަރީ ނަޝީދަށް ނާކާމިޔާބުވެވަޑައިގެންނެވުމާ ގުޅިގެން އެމަނިކުފާނުގެ އަރިސް ބޭފުޅުން އެމްޑީޕީ ދޫކުރައްވައި ނުކުމެވަޑައިގެން އުފެއްދެވި ޕާޓީ އެކެވެ.
ރިޔާސީ އިންތިހާބުގެ ދެވަނަ ބުރުގައި ވާދަކުރައްވާނީ ފުރަތަމަ ބުރުގައި އެންްމެ ގިނަ ވޯޓު ލިބިވަޑައިގެންނެވި ޕީއެންސީގެ ކެންޑިޑޭޓް ޑރ.،މުހައްމަދު މުއިއްޒާއި ދެވަަނައަށް އެންމެ ގިނަ ވޯޓު ލިބިވަޑައިގެންނެވި އެމްޑީޕީގެ ކެންޑިޑޭޓް ރައީސް އިބްރާހީމް ސޯލިހެވެ. އެ ދެ ޕާޓީއަށް ވެސް ޑިމޮކްރެޓުން ހުށަހެޅި ޝަރުތަކީ ރާއްޖޭގެ ވެރިކަމުގެ ނިޒާމާއި މެދު އަލުން ގޮތެއް ކަނޑައަޅަން ފެންނަ ނުފެންނަ ވޯޓެއް ނެގުމެވެ. އެ ވޯޓު މިމަހުގެ 25 ވަނަ ދުވަހު ނެގުމަކީ ވެސް ޝަރުތެކެވެ.
