މެންޗެސްޓާ (ސެޕްޓެމްބަރު 14) - މިދިޔަ ޓްރާންސްފާގައި މެންޗެސްޓަ ޔުނައިޓެޑް ދޫކޮށްނުލީ އެ ކުލަބުން ވެސް އޭނާ ކުލަބުގައި މަޑުކުރަން ބޭނުންވާތީ ކަމަށް އެ ޓީމުގެ ޑިފެންޑަރު ހެރީ މެގުއާ ބުނެފި އެވެ.
ޔުނައިޓެޑްގެ ކުރީގެ ކެޕްޓަން ހެރީ މެގުއާ ކުލަބު ދޫކޮށްލުމާ ގުޅޭ ވާހަކަތައް ގަދަވާން ފެށީ ކޯޗު އެރިކް ޓެން ހާގުގެ ފުރަތަމަ އެގާރައިން އޭނާއަށް ޖާގަ ގެއްލެން ފެށުމުންނެވެ. އަނެއްކޮޅުން، ހަތަރު އަހަރު ކެޕްޓަންގެ ގޮތުގައި ހުރި މެގުއާ އަތުން މި ސީޒަންގައި ކެޕްޓަން ބޭންޑް ނަގައި ބްރޫނޯ ފެނާންޑޭސް އަށް ކެޕްޓަން ބޭންޑުވެސް ވަނީ ދީފަ އެވެ.
މެގުއާ ހޯދުމަށް އިނގިރޭސި ބައެއް ކުލަބުތަކުން މަސައްކަތްކުރި އެވެ. އެ ގޮތުން ވެސްޓް ހޭމް އިން ޔުނައިޓެޑާ އެކު މެގުއާ ގަންނަން އެއްބަސްވުމަކަށް އައި ނަމަވެސް އޭނާ ފަހު ވަގުުތު އެ ޑީލަށް އެއްބަސްނުވީ އެވެ.
ޔުނައިޓެޑްގައި މަޑުކުރި ސަބަބާ ގުޅޭގޮތުން ވާހަކަދައްކަމުން މެގުއާ ބުނީ އެހެން ކުލަބަކަށް ބަދަލުވާން އެއްބަސްވުމަކަށް ނާދެވުމުން ޔުނައިޓުން ވެސް ބޭނުންވީ އޭނާ އެކުލަބުގައި މަޑުކުރުމަށް ކަމަށެވެ. އަދި އޭނާ އަމިއްލަ އަށް ވެސް ކުލަބުގައި މަޑުކޮށް ޓީމަށް ކާމިޔާބީ ހޯދައިދޭން ބޭނުންވާ ކަމަށެވެ.
މެގުއާ ބުނީ ޓީމުގެ ފުރަތަމަ އެގާރައިން ފުރުސަތު ލިބުމަކީ އުނދަގޫ މަސައްކަތެއް ކަމަށާއި، އެހެން ނަމަވެސް މި ސީޒަންގައި ގިނަ މެޗުތަކެއް ހުރުމުން ޓީމަށް އޭނާ މުހިންމުވާނެކަން އެނގޭ ކަމަށެވެ. އެހެންކަމުން ރަނގަޅަށް ތަމްރީން ހަދައި ލިބޭ ފުރުސަތުގެ ބޭނުން ހިފަން ތައްޔާރަށް ހުރި ކަމަށް މެގުއާ ބުންޏެވެ.
މިހާތަނަށް މި ސީޒަންގައި ޔުނައިޓެޑުން މެގުއާ އަށް ކުޅުމުގެ ފުރުސަތު ދީފައިވަނީ އެންމެ 23 މިނިޓަށެވެ.
ކުލަބު ލެވެލްގައި މާ ގިނަ ފުރުސަތު ނުލިބުނުު ނަމަވެސް އިނގިރޭސި ގައުމީ ޓީމުން މެގުއާ އަށް އަންނަނީ ފުރުސަތު ލިބެމުންނެވެ.
އިނގިރޭސި ޓީމުގެ ކޯޗު ގަރެތު ސައުތުގޭޓް ނަގާ ސްކޮޑުން މެގުއާ އަށް ފުރުސަތުދޭތީ ފާޑުކިޔުން އަމާޒުވެ އެވެ. ކްލަބް ލެވަލްގައި ރަނގަޅަށް ޕާފޯމްނުކޮށް ގައުމީ ޓީމަށް އަރާތީ މެގުއާ އަށް ވެސް ގިނަ ފާޑުކިޔުންތަކެއް އަމާޒުވެ އެެވެ.
އެ ކަންކަމާ ގުޅޭގޮތުން މެގުއާ ބުނީ ޕްރެޝަރުގައި ކުޅުމަކީ އޭނާއަށް އާ ކަމެއް ނޫން ކަމަށެވެ. ދަނޑުން ބޭރުގައިވެސް ގިނަ ޕްރެޝަރުތަކާ ޗެލެންޖުތަކާ އޭނާ މީގެ ކުރިން ކުރިމަތިލާފައިވާނެ ކަމަށް މެގުއާ ވަނީ ބުނެފަ އެވެ.
