ލަންޑަން (ސެޕްޓެމްބަރު 11) - އާސެނަލްގެ އެންމެ އަގުބޮޑު އެއް ޓްރާންސްފާގެ ގޮތުގައި އެ ކްލަބާ މީގެ ހަތަރު އަހަރު ކުރިން ގުޅުނު އައިވަރީ ކޯސްޓްގެ މިޑްފީލްޑަރު ނިކޮލަސް ޕެޕޭއާ އެކު އިން ހަދާފައިވާ ހަދާފައިވާ ކޮންޓުރެކްޓް ބާތިލްކޮށް، އެ ކްލަބުން އޭނާ ދޫކޮށްލައިފި އެވެ.
އާސެނަލް އިން ކޮންޓުރެކްޓް ބާތިލްކުރުމާ އެކު ޕެޕޭ ،28، ވަނީ ތުރުކީގެ ޓްރަބްޒޮންސްޕޯ އަށް ބަދަލުވެފަ އެވެ.
ފްރާންސްގެ ލިލް އިން 2019 ވަނަ އަހަރު އާސެނަލް އަށް ޕެޕޭ ބަދަލުވީ 89 މިލިއަން ޑޮލަރުގެ ޓްރާންސްފާ ފީއެއްގަ އެވެ. މިއީ އޭރު އާސެނަލްގެ އެންމެ އަގުބޮޑު ޓްރާންސްފާ އެވެ.
ބޮޑު އަގުުގައި އާސެނަލް އަށް ބަދަލުވިޔަސް، އެ ކްލަބުގައި އޭނާ އަށް އެއް ފެންވަރެއްގައި ކުޅުން ނުހިފެއްޓުނެވެ. އާސެނަލްގައި ހޭދަކުރި މުއްދަތުގައި ޕްރިމިއާ ލީގުގައި އާސެނަލްގެ ފުރަތަމަ 11 ގައި ޕެޕޭ ހިމެނުނީ އެންމެ 43 މެޗުގަ އެވެ.
އާސެނަލް އަށް އެންމެ ފަހުން ޕެޕޭ ކުޅުނު މެޗަކީ 2022 ވަނަ އަހަރުގެ މެއި މަހު އެވަޓަންއާ ދެކޮޅަށް ކުޅުނު މެޗެވެ. މިދިޔަ ސީޒަންގައި ޕެޕޭ ލޯނު އުސޫލުން ކުޅުނީ ފްރާނަސްގެ ނީސް އަށެވެ.
އައިވަރީ ކޯސްޓްގެ ގައުމީ ޓީމުގެ ކުޅުންތެރިއެއް ކަމަށްވާ ޕެޕޭގެ ކޮންޓުރެކްޓް އާސެނަލް އިން ބާތިލްކުރީ ބާކީ އެއް އަހަރު އޮއްވަ އެވެ.
"މި ކްލަބުގައި ހޭދަކުރި މުއްދަތުގައި ޕެޕޭގެ މި ކްލަބަށް ކޮށްދިން މަސައްކަތަށް ޝުކުރު އަދާކުރަން،" އާސެނަލް އިން ނެރުނު ބަޔާނެއްގައި ބުނެފައިވެ އެވެ.
