ސެޕްޓެމްބަރު 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ދަ ޑިމޮކްރެޓްސްގެ ގިނަ މެމްބަރުން، ޕީއެންސީ/ ޕީޕީއެމްގެ ކެންޑިޑޭޓު ޑރ. މުހައްމަދު މުއިއްޒު ވެރިކަމަށް ގެނައުމަށް ނޭދޭނެ ކަަމަށާއި އެ މެމްބަރުން ވޯޓު ދޭނީ އެމްޑީޕީއަށް ކަމަށް ތޮއްޑޫ ދާއިރާގެ މެމްބަރު ހަސަން ޝިޔާން ވިދާޅުވެއްޖެ އެވެ.
ހޮނިހިރު ދުވަހުގެ ބޭއްވި ރިޔާސީ އިންތިހާބުގައި އަށް ކެންޑިޑޭޓުން ވާދަ ކުރެއްވިއިރު، ދެ ވަނަ ބުރަށް ދިޔައީ އެންމެ މަތިން ވޯޓު ހޯއްދެވި މުއިއްޒާއި އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހެވެ. ތިން ވަނަ އަށް ދިޔަ އިލްޔާސް ލަބީބަށް 15،800 އަށް ވުރެ ގިނަ ވޯޓު ލިބިވަޑައިގެންނެވި އެވެ.
"ދަ ޑިމޮކްރެޓްސްގަ ތިބި ގިނަ މެމްބަރުން ޕީޕީއެމް އަށް ރާއްޖޭގެ ވެރިކަން ދޭކަށް ނޭދޭ. އެއް ވަނަ ބުރު ނިމިއްޖެ. ޑިމޮކްރެޓްސްގެ އާންމު މެމްބަރުން ޑިމޮކްރެޓްސް އަށް ވޯޓު ދީ ރަނގަޅު ނަތީޖާއެއް ނެރެފި. ސެޕްޓެމްބަރު 30 ގަ ޑިމޮކްރެޓްސްގެ މެމްބަރުން ވެސް ނިކުންނަވާ އެމްޑީޕީ އަށް ވެރިކަން ހޯދަން ވޯޓު ދޭނެ. ޕީޕީއެމްގެ ވެރިކަން އެ މީހުން ވެސް ނޭދޭ،" ދަ ޑިމޮކްރެޓްސް އުފެއްދެވުމަށް އުޅުވުމަށް ފަހު ދާދި ފަހުން އެނބުރި އެމްޑީޕީއާ ގުޅިވަޑައިގެންނެވި ޝިޔާން ވިދާޅުވި އެވެ.
އޭނާ އަދަދު ނޫހަށް ވިދާޅުވީ ޕީޕީއެމްގެ ވެރިކަމުގައި ކަންކަން ހިނގާފައިވާ ގޮތް ރަށްރަށުގެ އާންމު މެމްބަރުންނަށް ރަނގަޅަށް އެނގޭ ކަމަށެވެ. އެއީ އެ މެމްބަރުން ވިސްނާނެ ކަމެއް ކަމަށް ޝިޔާން ގަބޫލު ކުރައްވަ އެވެ.
މިފަހަރުގެ އިންތިހާބުގައި ރައީސް ސޯލިހަށް 86،100 އަށް ވުރެ ގިނަ ވޯޓު ލިބިވަޑައިގެންނެވިއިރު، މުއިއްޒަށް 101,500 އަށް ވުރެ ގިނަ ވޯޓު ލިބިވަޑައިގެންނެވި އެވެ.
